HKTVmall人手短缺或Cut單！網民湧入FB負評「不如搞自行取貨啦」

By Cheryl on 03 Mar 2022

Digital Editor

第五波疫情嚴峻，好多商鋪都宣布縮減營業時間，甚至停業。而網上超市 HKTVmall則在今日（3/3）上載公告，指確診數飄升下人手極為短缺，導致已付款訂單有機會被取消，網民見此即湧入其官方Facebook，怒斥HKTVmall各種送貨及退款問題，怨聲四起。

Photo from HKTVmall

HKTVmall人手超短缺，顧客或被cut單！

消息盛傳港府會因應全民檢測而實施禁足令，大批市民聽罷即湧到各區超市搶貨，所以近期有不少「貨架空空如也」嘅照片在網上流傳。實體店無貨下，唔少人即轉向網購，唔使同人爭之餘，仲可享送貨服務。不過，知名網上超市HKTVmall今日都終於頂唔住，貼出公告表示，由於疫情嚴重下訂單量同時急升，而確診及隔離個案都上升，即使全體員工已盡力維持運作，前線人手仍極之短缺，而供應商、物流夥伴嘅服務都有延誤或暫停，各種因素加上或將公佈嘅「全民強制檢測」下，已付款嘅訂單有可能被取消。

Photo from HKTVmall

官方仍上載不少優惠帖文

早在2月27日時，HKTVmall曾在Facebook上載招聘廣告，聘請職位包括司機、倉務、派貨等等，以臨時解決嚴重嘅人手短缺問題，可惜仍無法追上訂單需求。而官方到今日仍貼出多項優惠，包括「30分鐘送上門」優惠，以及防疫產品優惠等。

Photo from HKTVmall

顧客湧入官方專頁表達不滿

但好多受影響嘅客人則非常不滿，紛紛留言控訴官方各種送貨問題，例如「訂單遲遲唔送貨，到呢家仲有機會被cut單」，有顧客稱：「真係送到貨？送咗我嗰個先啦！2月15日落單，今日都送唔到！」，亦有人呻2月24日落單，原定3月5日送貨，豈料被官方取消整張訂單，「係有貨我先落到單，太過分了，我急住用啲日用品！」