download HolidaySmart 假期日常 app
陳展鵬自爆同單文柔相識經過!年少輕狂經常夜蒲!去親蒲都食白果

陳展鵬自爆同單文柔相識經過!年少輕狂經常夜蒲!去親蒲都食白果

娛樂新聞
By Stephanie on 04 Mar 2022
Digital Content Writer

陳展鵬最近就獲邀上由Bob主持嘅節目《人夫放假約出去滾》,仲分享佢同老婆單文柔嘅相識經過,指自己做港姐評判嘅時候就已經「睇中」對方;而佢第一次求婚居然係失敗收場?!

陳展鵬於節目分享同老婆單文柔認識經過!Photo from 陳展鵬IG

# 事業愛情都順利~

現年45歲嘅陳展鵬憑著《城寨英雄》榮奪影帝,近年拍攝嘅電視劇大多都擔正做男一;感情方面佢喺2018年同單文柔結婚,並於2019年誕下囡囡Quinta(小豬比),事業愛情兩得意~

陳展鵬憑著《城寨英雄》勇奪影帝!Photo from TVB

陳展鵬同單文柔於2018年結婚,誕下小豬比~Photo from 單文柔IG

# 自爆年輕超頑皮?!

日前,陳展鵬上節目《人夫放假約出去滾》一開始就先講述年少輕狂嘅事蹟,鍾意去酒吧玩「見到靚女就追下咁」,仲爆「喺bar一定企俗稱狗公位,即係廁所附近好多人出入,可以昅女囉」,但無奈表示冇因此而認識到女仔。佢補充喺圈內亂追女仔好容易出事「可能係導演追緊,或者係監製女友」,必須要謹慎行事!

陳展鵬自爆小時候好貪玩!Photo from 《人夫放假約出去滾》

仲話細個一定要企「狗公位」望女仔!Photo from 《人夫放假約出去滾》

# 入行初期感到迷惘!

陳展鵬話自己貪好玩去報讀訓練班,但過程卻並非想像中順利「嚟到TVB凌晨4點起身,我哋啲小演員當時就只能夠企,一企就10幾粒鐘」,坦承當時經濟狀況十分困難!佢仲為咗生計去地盤打工,日薪大約係$300;同時亦有做乒乓球教練。

陳展鵬初入行時,仲有到地盤打工賺錢維持生計!Photo from 《人夫放假約出去滾》

# 坦承對單文柔一見鍾情!

當被問到同老婆單文柔嘅相識經過,二人其實喺2016年嘅香港小姐選舉中初次見面,當時佢就係台下嘅其中一位評判。陳展鵬直言第一眼望到對方嘅時候「覺得佢(單文柔)好似好冇信心」,反而激起佢嘅保護欲,所以當時俾咗好高分佢!

陳展鵬直言對單文柔算係一見鍾情!Photo from TVB

陳展鵬於「最上鏡小姐」環節中,俾咗好高分單文柔!Photo from TVB

# 女方3大優點成功攻陷陳展鵬!

後來因為工作關係,二人經常都會喺台慶等活動中遇見,但相隔1年後先正式向對方 「抄牌」!而認識加深之後,佢就覺得單文柔「好純、好乖、好簡單」,俾到佢初戀嘅感覺以及自信心。

陳展鵬覺得單文柔令佢有返初戀嘅感覺!Photo from 單文柔IG

# 因為呢件事令佢哋感情升溫!

同一時間,當年陳展鵬同胡定欣因拍攝《城寨英雄》成為螢幕情侶,經常一齊接job出活動;而佢同單文柔就被傳媒拍到喺山頂談心,而搞到網民覺得女方背上小三稱號!不過,單文柔依然非常信任佢,令佢哋二人感情瞬速升溫「唔知點解神推鬼㧬,所有媒體、環境揭發到我哋喺埋一齊」,結婚時間比佢想像中快!

當時陳展鵬因為拍攝《城寨英雄》同胡定欣係螢幕情侶,二人嘅緋聞傳得沸沸揚揚!Photo from TVB

二人卻因為傳聞,而令佢哋嘅感情變得更加堅定!Photo from 單文柔IG

# 第一次求婚失敗!

交往大約2年後,陳展鵬就決定要同單文柔求婚,但第一次求婚卻被女方以為係假「啲戲幾好喎,你視帝嚟㗎嘛!」,以搞笑作為該次求婚嘅結尾!半年後,佢就摺咗隻戒指套進對方手指求婚,仲話《逆天奇案》都係用呢條橋!

陳展鵬第一次求婚被單文柔以為係假嘅!Photo from 陳展鵬IG

陳展鵬第二次求婚時利用手工戒指感動女方~Photo from 陳展鵬IG

# 陳展鵬過往情史

陳展鵬2008年被傳媒拍到與亞姐冠軍姚嘉雯拍拖,不久後佢哋就對外表示已經分手,有傳係因為陳展鵬跳槽去TVB拼搏工作所導致!

陳展鵬2008年被拍到與亞姐姚嘉雯拍拖,亦係佢除咗單文柔之外唯一公開認愛嘅對象!Photo from ATV

# 緋聞女友多數都係合作對象?

2012年,陳展鵬同鍾嘉欣合作拍攝《巨輪》被傳出戲假情真,而佢亦曾經喺接受電台訪問時話對女主角難抽離,被馬明踢爆暗戀對方好耐!後來又被拍到用跑車接載女方搭船出席澳門活動,但中途發生車禍被揭發二人關係親密,2014年再合作電視劇《大藥坊》,緋聞傳足2年咁耐!

陳展鵬2012年同鍾嘉欣合作,仲不時被傳媒拍到二人相聚。Photo from TVB

# 胡定欣傳緋聞!

2016年電視劇《城寨英雄》令陳展鵬同胡定欣嘅人氣到達頂峰,仲令佢哋呢pair螢幕情侶傳出緋聞!當時唔少人都深信佢哋已經係情侶,二人出席活動時都表現得非常甜蜜,後來又在合作拍《同盟》。直到同單文柔拍拖被拍後,謠言不攻自破。

胡定欣彤陳展鵬呢對螢幕情侶,被唔少網民以為已經係真正嘅情侶!Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

陳展鵬透露有意北上搵真銀?!首次開微博直播!期望上綜藝節目做「哥哥」

20 Jan , 2022

影帝陳展鵬(煎pang)近年喺TVB發展得十分唔錯,唔少劇集都擔正做男一,包括而家熱播中嘅《鐵拳英雄》~最近就係佢嘅45歲生日,而佢就首次開微博直播同內地嘅粉絲互動,仲表示希望出演內地綜藝節目,睇嚟有北上賺真銀嘅念頭喇~

陳展鵬最近首次開微博直播,言行中透露即將北上發展?!Photo from 陳展鵬IG

# 陳展鵬已經入行29年!

陳展鵬(煎pang)喺1993年加入TVB而入行,隨後喺2000年就轉往亞視發展,參與多部電視劇以及主持節目,但知名度唔算高。2007年佢再次回巢工作,曝光率開始大增,2016年憑著《城寨英雄》獲得「最佳男主角」,事業登上最高峰!隨後,佢參演嘅電視劇中大多都係飾演男一,成為TVB備受力捧嘅小生之一。有傳事業心強嘅佢續約時,曾經要求加薪至$500萬,但遭到拒絕。

陳展鵬2016年憑電視劇《城寨英雄》獲得影帝!Photo from TVB

之後,佢大部分出演嘅電視劇都係飾演男主角。Photo from 陳展鵬IG

# 45歲生日開微博直播,與內地粉絲慶生!

日前,陳展鵬就趁45歲生日首次喺微博開直播,同內地嘅粉絲們互動聊天。只見一打開個cam佢嘅樣貌就已經容光煥發,但好彩濾鏡效果並未到太誇張,依然認得出陳展鵬本人。而佢就先以廣東話打招呼,並詢問網民想聽邊一種語言,最終佢就以「廣普」 (廣式普通話)同大家交流!

適逢陳展鵬45歲生日,佢就喺當日首次於微博開直播!Photo from 陳展鵬微博

只見佢容光煥發,同內地粉絲以廣普溝通。Photo from 陳展鵬微博

# 坦承依然有歌手夢!

直播中,陳展鵬透露自己並冇放棄做歌手嘅夢想,現時都仲會花時間鍛鍊歌喉。而早前佢就歌曲《零歲》喺「新城頒獎典禮」榮獲「鑽石人氣網絡男歌手」及「鑽石觸目全方位歌手」獎,努力咁想朝住歌手進發嘅佢就話現時大多收聽年輕歌手嘅歌,包括:馮允謙、MC張天賦等,仲會用佢哋歌曲做練習,期望將來可以喺內地粉絲們面前獻唱或者辦演唱會!

陳展鵬表示自己內心依然有歌手夢!Photo from TVB

陳展鵬喺「新城勁爆頒獎禮2021 」獲得獎項!Photo from 新城勁爆頒獎禮2021

# 希望同內地演員合作拍戲!

當提及拍戲嘅話題時,陳展鵬就大sell自己,話願意嘗試唔同嘅角色,認為有時候遇到好嘅角色係非常難得。而佢亦話希望可以同更多演員合作,「唔一定係TVB嘅演員,同內地演員合作都好好㗎」,強調最希望俾觀眾新鮮感。

陳展鵬話願意嘗試唔同嘅角色!Photo from TVB

而佢亦話唔一定只係同TVB演員合作,仲非常樂意同內地演員一齊拍戲!Photo from 陳展鵬IG

# 願意返內地拍綜藝節目做「哥哥」!

甚少出演綜藝節目嘅陳展鵬就話都想嘗試下,有網民就詢問佢想唔想出演內地人氣真人騷《披荊斬棘的哥哥》,佢就非常興奮咁話「他邀請我,我就過去啦!我一定是哥哥啦!」呢場直播足足有19萬人觀看,而佢期望明年可以同內地粉絲們面對面慶祝生日!睇嚟佢打算開始密謀返內地工作喇~

而佢就想出演內地綜藝節目《披荊斬棘的哥哥》!Photo from 陳展鵬IG

因為出演《披荊斬棘的哥哥》而爆紅嘅「大灣區五人組」,仲因此而獲得自己嘅節目!Photo from 大灣仔的夜微博

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel