download HolidaySmart 假期日常 app
諸朋好友|胡定欣單身6年拒認揀擇 直言有人因自己身份才想發展關係!

諸朋好友|胡定欣單身6年拒認揀擇 直言有人因自己身份才想發展關係!

電視電影 娛樂新聞
By Cheryl on 08 Mar 2022
Digital Editor

TVB訪談節目《諸朋好友》由崔建邦麥美恩主持,最新一集邀嚟胡定欣林夏薇任嘉賓,大談二人嘅姊妹情,以及感情世界。胡定欣唔認同自己選偶挑剔,但認為自己身份係阻礙愛情發展嘅因素之一!

胡定欣同好友林夏薇一同擔任《諸朋好友》嘉賓,大談愛情與事業。Photo from 胡定欣 IG

胡定欣本想做歌手

胡定欣提到其入行經過,原打算做歌手嘅佢參加「TVB第三屆Cover Girl選舉」後,加入TVB藝員訓練班,佢漸漸被喜愛演藝嘅同學們熏陶,愛上演戲。實習期間,佢已獲得參演《衝上雲霄》機會,定欣直言首套劇集已經可以「黐住主角」好好。到拍攝《拳王》時,佢感受到自己非常投入去演活角色。

胡定欣早年參選「TVB第三屆Cover Girl選舉」。Photo from 胡定欣 IG

唔知道好友林夏薇要結婚

胡定欣和林夏薇老友鬼鬼,但原來連定欣都唔知道夏薇當年準備結婚嘅消息。林夏薇2015年低調與年長16年金融才俊莫贊生結婚,並選址太平山頂豪宅設宴,但好多圈中好友都對唔知道佢結婚。

林夏薇結婚低調到連好友胡定欣都唔知,知情後也無法即時相信。Photo from 胡定欣 IG

胡定欣和林夏薇在15年拍攝劇集《公公出宮》時,夏薇有一日突然表示要即日來回去「簽嘢」,定欣聞言即開玩笑問:「有咩咁緊要呀?結婚呀?」夏薇雖直接承認,但由於定欣從未聽夏薇講過有男友,所以當刻未能相信,只說了句「黐線」作回應。直到結婚當日,定欣才知道夏薇係真結婚,而最後佢都被邀請出席第二日嘅婚宴。

林夏薇與老公莫贊生合照。Photo from 林夏薇 微博

否認擇偶要求高

現年40歲胡定欣坦言已有6年無拍拖,而現時嘅佢與以往相比已無咁易愛上人,直言:「呢家係比以前懶咗」。佢亦唔認同外界指佢揀擇和挑剔嘅講法,「我唔鍾意亦唔同意人哋話要求高,就係因為你經過咁長時間去建立自己,你梗係希望搵到個真真正正,真心對待你嘅另一半,無論心靈或者係生活上,都係一個好配合嘅一個人,咁點解唔去揀個最好嘅先至一齊呢?」

胡定欣直言不認同亦不喜歡擇偶「太挑剔」講法。Photo from 《諸朋好友》TVB

胡定欣身份阻礙感情發展?

林夏薇大爆定欣有好多追求者,而定欣都直言有遇到心儀對象,但卻因環境因素無法走下去,主持崔建邦繼續追問下,定欣透露其身份係其一因素,「我諗最緊要嘅一個可能身份問題,呢個都真係幾令人concern(在意)嘅一樣嘢。我以前唔會咁樣諗。」

胡定欣認為自己身份係影響關係發展因素之一。Photo from 胡定欣 IG

以往有其他閨蜜認為定欣嘅職業導致佢難以結識男友, 定欣都不同意,當時佢認為自己係一個能照顧自己,工作開心嘅獨立女生。但隨著時間過去,定欣一直專注工作,「再識人嘅時候,到近呢幾年,我真係經歷過嘅一啲情況係,原來我嘅職業或者崗位上嘅因素… 有啲人會因為你係胡定欣而好想識你」、「但係我識嘅,我會選擇,我去喜愛,就係唔想佢係因為我係胡定欣而同我一齊。」崔建邦直言呢種情況好衰但無可避免,定欣續指:「嗰個矛盾位,真係只有自己先知道。」

胡定欣指有啲人因為佢身份才想發展關係。Photo from 《諸朋好友》TVB

胡定欣不想一段關係以「身份」行先。Photo from 《諸朋好友》TVB

希望真命天子能帶領自己

被問到現時嘅擇偶條件,定欣坦言自己希望有個人可以帶領到佢,又指愛情和伴侶係兩回事,愛情可以好快嚟亦好短暫,要點樣維持之後嘅關係與生活先係難題。對於在大時大節會否感到寂寞,定欣就話已經無曬感覺「呢樣嘢係磨到滑晒」,又言冇唔渴望節日有個伴,但亦唔會求其搵人。

胡定欣表示節日有無人陪伴已不太重要。Photo from 胡定欣 IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel