download HolidaySmart 假期日常 app
IG Foodie要求餐廳贊助廣告 否則食評較「直率」網民批似收陀地!

IG Foodie要求餐廳贊助廣告 否則食評較「直率」網民批似收陀地!

生活熱話
By Cheryl on 21 Mar 2022
Digital Editor

今時今日,不少人都會透過IG Foodie搵好食餐廳,被Foodie評高分嘅食肆自然較容易吸引客人。不過,當中Foodie與餐廳方合作嘅手法就不時引起質疑。近日,澳門一間餐廳在社交網出post,貼出一幅IG私訊截圖,顯示一個Foodie帳號要求店家出錢贊助廣告帖文,更表示肯合作就會寫更好嘅文案,唔肯就會「比較直率」,事件惹網民熱議。

有澳門餐廳表示近日被Foodie要求支付廣告帖文費用,直批做法猶如現代收陀地。Photo from 連登討論區截圖

澳門餐廳被Foodie索廣告費

位於澳門嘅一間船麵餐廳近日在Facebook專頁發文,上載一幅由某Foodie帳號傳來嘅IG私訊圖圖,Foodie稱自己當日曾到其餐廳拍攝,並將會出食評post,於是希望店家能出錢贊助相關帖文,表示「按慣例店家一般會畀$200-$500,視乎預算」,又稱如果店家接受畀廣告費,就會「執靚啲文案令佢更吸引到人」,但若果出無合作關係嘅帖文就會寫得較直率,「因為想對一啲會付出嘅店家公平」。

餐廳貼出在IG收到嘅私訊圖Photo from 船媽泰麵Facebook專頁截圖

餐廳帖文一出,不少網民都認為Foodie求支付廣告費用手法酷像收保護費。Photo from 《喜劇之王》

猶如現代收陀地招數?!

該餐廳在帖文直批手法猶如「現代古惑仔收陀地招數」,又慨嘆澳門人一向行速食文化,若店家賣貴過成本價就會被外界批評,所以唔少同行都會本著「多一事不如少一事」心態,又怕被負評後無客來,所以寧願就範,支付幾百元廣告費當宣傳就算。而餐廳還擊就只會係餐廳蝕底,「小器無公關唔識做生意」、「久而久之就造就呢班『直率真Foodie』出嚟無本生利搵食。」

餐廳直言Foodie索取金錢手法如收陀地。Photo from 船媽泰麵Facebook專頁截圖

有網民揶揄「原來澳門處處商機」。Photo from 《喜劇之王》

Foodie手法惹網民狠批

店家又揶揄做Foodie好好搵,「諗諗下我都參一腳走去做Foodie,食完嘢走埋去同個收銀講『我好real嫁,後數得唔得先,唔得唔好怪我率直實話實說呀!你唔俾咁樣對付出店家唔公平~』」對此,好多網民都對Foodie做法感驚訝,笑言:「原來依家澳門興咁樣收陀地」、「原來咁易搵錢,唔怪得個個都做」、「原來店家應該付出嘅唔係食物質素,係200-500蚊」、「有錢就好食,冇錢就難食」。

事件火速引起網民關注,並笑言原來做Foodie咁易搵錢。Photo from 《喜劇之王》

有網民進入該Foodie IG帳號查看舊文,見到曾有另一家食肆因為沒有在IG回覆訊息而被扣減兩分服務分,相當嚴格,直言餐廳除了要在現場保持服務態度、提供美味食物之餘,更要準時在IG覆Foodie,生意真係難做。

有餐廳因為無回覆私訊而被Foodie扣服務分。Photo from 連登討論區截圖

Foodie帳號發聲明

該Foodie帳號惹嚟港澳兩地網民聲討,最後在周日(20日)晚上發聲明,稱設立平台只為分享美食和店舖,全無敲詐和勒索之心,又強調過往所有金錢都全數投放在廣告費用上,絕無私吞;佢亦澄清在帖文中扣減某店家服務評分,絕不因為傳言所指嘅「無畀錢」,而係Foodie用私人帳號向店家索取餐單,但數天後仍未得到回覆才扣分,該Foodie承認今次處理事件存在很多不足和過錯,為此致歉,並承諾以後不會主動邀請店家贊助,而帳號亦會暫停更新。

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

 

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel