download HolidaySmart 假期日常 app
鞏姿希擁有靠山不停狂串6號?!近年備受力捧!曾向高層曾志偉派心心 入行4年已經主持4個節目

鞏姿希擁有靠山不停狂串6號?!近年備受力捧!曾向高層曾志偉派心心 入行4年已經主持4個節目

娛樂新聞
By Stephanie on 21 Mar 2022
Digital Content Writer

最近備受力捧嘅27歲鞏姿希(Krystl)日前獲邀成為肥媽陸浩明(6號)主持嘅TVB飲食節目《煮.野食》壓軸嘉賓!然而,佢喺節目上嘅表現卻被網民直指無禮貌,事關佢句句都串6號,導致場面有少少尷尬,好彩最終6號都輕鬆應對~

鞏姿希日前出演肥媽、陸浩明嘅節目《煮.野食》做壓軸嘉賓!Photo from 《煮.野食》

# Krystl自小就認識肥媽?!

落選港姐兼娛樂新聞台主播鞏姿希(Krystl)最近獲邀出演節目《煮.野食》嘅壓軸嘉賓,仲自爆原來同肥媽好有淵源,而肥媽亦解釋「同Krystl媽咪好熟,細細個就睇住佢大。」擁有肥媽撐腰嘅佢表示出演節目就係為咗食嘢,仲開始發揮搞怪本能將粗重工作俾晒6號,再同肥媽一唱一和「窒」6號!

鞏姿希媽媽原來同肥媽係好朋友!Photo from 《煮.野食》

Krystl同肥媽非常老友,一見面就攬住大家!Photo from 《煮.野食》

# 瘋狂串6號!

煮雞煲嘅時候,Krystl就同6號講「我講你煮」,並將食品包裝後面所詳列嘅步驟讀出。期間,Krystl都有幫忙「炒幾下」,但肥媽就立刻指住6號「本身係你做㗎!人哋係客人」,6號亦只好乖乖繼續煮,而Krystl亦有嫌棄對方話「乜都唔做」,場面爆笑!

Krystl一開始就同6號講「我講你做」,隨後就攞住食品包裝朗讀步驟。Photo from 《煮.野食》

肥媽見6號冇嘢做,就立刻叫佢幫KrystlPhoto from 《煮.野食》

# 同時亦好識哄長輩~

隨後,6號曾要求Krystl稱讚佢靚仔,但佢坦承「冇可能!我唔會講大話!」;仲立刻好識做咁大讚肥媽好靚女~當肥媽唔小心失誤,佢立刻企出嚟為肥媽撐腰「咩都話女人啱先係好男人」,真係非常識得哄長輩歡心~

6號曾要求Krystl讚佢靚仔,但卻遭到無情拒絕!Photo from 《煮.野食》

而Krystl就立刻大讚肥媽靚,非常識做~Photo from 《煮.野食》

# 大部分網民認為態度欠佳?!

節目播出後,唔少網民都認為Krystl作為嘉賓未免太無禮貌「又串又唔識尊重人」、「真係教壞細路」等;但亦有網民認為純屬節目效果,認為佢本身同6號關心應該幾熟先會咁。

有網民直斥Krystl於節目表現得十分冇禮貌!Photo from 鞏姿希IG

# 曾於節目向曾志偉發送愛心,被網民指駁上位!

其實Krystl近年受力捧,逐漸獲TVB提供更多出演綜藝節目嘅機會!上年就有份參加《明星運動會》,最令人深刻嘅就係於射箭比賽期間,佢主動向高層曾志偉派心心,令對方冧爆~當時有唔少網民見到呢一幕就認為Krystl心機非常重,喺節目都公然「擦鞋」!

Krystl近來備受TVB力捧,上年有份參與重頭綜藝節目《明星運動會》!Photo from 娛樂新聞台

當時節目就捕捉到Krystl向曾志偉送上大心心嘅畫面!Photo from 《明星運動會》

# 入行時間短,但工作機會超多!

Krystl係2018年落選港姐,其後佢立刻加入TVB,一直擔任娛樂新聞台主播,有網民認為佢參選時樣貌比宜家更自然。佢有份參與多個節目,包括:《出走地圖》、《Do姐有問題》,仲即將主持《陀地外國人》;亦獲邀客串《愛回家之開心速遞》,係TVB最近火速上位嘅女新星!而佢曾經於多個地方留學,精通5國語言(廣東話、普通話、英語、韓語、日語)亦成為咗佢嘅優勢之一~

有網民覺得Krystl2018年參選時樣貌比較自然,質疑佢有微調?!Photo from TVB

Krystl一直都係娛樂新聞台嘅主播,仲同時主持多個節目~Photo from 《娛樂新聞》

仲有喺《愛回家》客串,似乎有意發展成為演員~Photo from 鞏姿希IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

【十月初五的月光】胡鴻鈞演技大爆發連續3場喊戲! 網民有讚有彈!備受公司力捧事業得意

10 Dec , 2021

TVB電視劇《十月初五的月光》正在熱播中!最近,劇情就講到由胡鴻鈞所飾演嘅「文初」同生母再度重逢嘅感人畫面,當中胡鴻鈞嘅爆喊演技就獲得網民兩極嘅評論,部份網民認為佢「唔夠肉緊」!

胡鴻鈞於《十月初五的月光》有唔少哭戲,其中網民嘅反應有讚有彈!Photo from 《十月初五的月光》

# 《十月初五的月光》獲得多項提名!

由胡鴻鈞以及何依婷主演嘅電視劇《十月初五的月光》,因為翻拍自經典同名神劇,而引起網民們嘅關注!呢套劇亦抓得住《萬千星輝頒獎典禮》嘅尾巴,獲得多項提名,而胡鴻鈞就憑呢套劇獲提名「最佳男主角」、「最受歡迎電視男角色」、「飛躍進步男藝員」、「最受歡迎電視拍檔」以及「最受歡迎電視歌曲」五個獎項。

胡鴻鈞首次於電視劇擔正做男主角,就獲得5項獎項提名!Photo from 《十月初五的月光》

拍檔何依婷亦同樣第一次做女一,就獲得「最佳女主角」提名!Photo from 《十月初五的月光》

# 劇情播出至文初與生母重遇!

最近,劇情播出到文初(胡鴻鈞)重遇返生母文貴方(楊玉梅),不過生母一直故意避開文初,後來佢仲無理要求文初開口叫「媽媽」。儘管如此,文初依然用心自製紀念冊俾生母,成功打動母親,並願意再度同佢見面。兩人相認時痛哭流涕,場面令人動容,不過生母為咗前程,最終只係向文初提供假地址,再一次傷透文初嘅心!

文初(胡鴻鈞飾)向生母(楊玉梅飾)展示小時候嘅哨子,希望能夠同母親相認。Photo from 《十月初五的月光》

不過生母卻居然要求文初開口叫「媽媽」!Photo from 《十月初五的月光》

《十月初五的月光》最近播出文初與生母再度重逢嘅場面。Photo from 《十月初五的月光》

# 網民對胡鴻鈞喊戲有讚有彈!

以上2幕嘅「相認」場面,胡鴻鈞都需要施展佢嘅喊功,對於演技經驗尚淺嘅佢而言,難度都算高!對於胡鴻鈞今次嘅演出,網民有讚有彈,有網民就大讚胡鴻鈞演技比以前進步咗好多「文初演技爆seed」、「睇到一齊喊」等。

胡鴻鈞於劇中有唔少喊戲。Photo from 《十月初五的月光》

有網民大讚胡鴻鈞演技,認為佢比以前進步咗好多!Photo from TVB FB

# 網民批評表情過度生硬!

不過亦都有網民認為胡鴻鈞嘅喊戲似乎仲有待改進,認為佢喊得好奇怪「喊到好似便秘咁」、「聾啞人士演到變咗弱智人士」等留言,亦有網民將佢同舊作張智霖比較,認為張智霖演繹得比較好!然而,有網民就話可能係因為拍檔楊玉梅演技太好,先令到兩人有對比,認為胡鴻鈞今次嘅表演已經算好好。

網民認為胡鴻鈞喊戲嘅表情生硬!Photo from 《十月初五的月光》

有網民就覺得應該係因為同經驗老道嘅前輩合作,所以先更加凸顯胡鴻鈞嘅青澀演技!Photo from 《十月初五的月光》

唔少網民都批評胡鴻鈞嘅喊戲,認為佢演技尚有進步空間!Photo from TVB FB

# 獲得TVB力捧,資源超多?!

胡鴻鈞近年似乎備受TVB力捧,單單係今年頒獎禮就已經獲得5個提名,而佢今年初亦從TVB轉為邵氏旗下藝人。胡鴻鈞除咗做咗電視劇男主角之外,仲可以繼續發展自己嘅歌手事業,公司專登為佢度身訂做歌曲,喺11月尾仲喺九展舉辦一連2日嘅演唱會,備受公司重視!

胡鴻鈞近來被TVB力捧,唔少網民都猜測佢可能會奪得今年嘅「飛躍進步男藝人」獎項!Photo from 胡鴻鈞IG

胡鴻鈞11月時仲開咗演唱會,睇得出公司非常重視佢!Photo from 胡鴻鈞IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel