download HolidaySmart 假期日常 app
屎萊姆復出拍片收海量Dislike 直言不介意被狠批 網民:試完水溫未?

屎萊姆復出拍片收海量Dislike 直言不介意被狠批 網民:試完水溫未?

生活熱話 娛樂新聞
By Cheryl on 23 Mar 2022
Digital Editor

知名YouTuber屎萊姆」早前被「慕容公子」指控吸納大量同行做「屎家軍」,壟斷網絡界利益和輿論後深潛。一年後佢終於復出,上載DIY木枱嘅新片,但影片立即收獲海量負評,睇嚟好多網民仲未原諒到佢。

屎萊姆前年被慕容公子拍片指控後深潛一年,日前復出上載影片。Photo from 屎萊姆 FB

屎萊姆曾簽約英皇娛樂

屎萊姆在2013年起開始拍攝遊戲攻略等玩樂日常影片,人氣不俗。到2018年更加盟英皇娛樂,成為首位以長約身份與主流娛樂公司合作嘅YouTuber,雖然合約至19年屆滿,但佢在網絡界仍相當有熱度。

屎萊姆曾加盟英皇娛樂,知名度更上一層樓。Photo from 屎萊姆 FB

曾被慕容公子指控壟斷網絡界利益

到2020年,YouTuber慕容公子突然上載影片,大爆香港網絡界一直存在細思極恐嘅利益關係,並指控以屎萊姆為首嘅「屎家軍」一直控制輿論,同時進行利益壟斷。慕容公子直指,英皇娛樂一直想在電競市場裡分一杯羹,後來與電競公司Cyber Games Arena(CGA)合作成立「英皇電競」,並簽下屎萊姆作旗下藝人。

慕容公子曾出片解釋本港網絡界存在嘅利益關係,相關人士包括屎萊姆以及其同行朋友。Photo from 慕容公子 YouTube

慕容公子曾出片打爆屎萊姆與CGA等部門之間關係。Photo from 慕容公子 YouTube

屎萊姆因此接獲更多廣告工作,當中嘅利益吸引不少YouTuber埋堆,關係網逐步發展成「屎家軍」,網民推斷成員包括「電競女神」Rosa Ma、Deer Chan、與CGA關係密切嘅細B、林仔、屎嫂程程等。慕容公子更提到,屎萊姆有CGA做靠山,背後仲有英皇及政府撐腰,裡面涉及嘅利益龐大,因此唔埋堆就好難在本地YouTube界生存。

Rosa Ma等人被猜測係「屎家軍」其中一員。Photo from 屎萊姆 IG

屎萊姆復出拍片

當時事件掀起網民熱議,並狠批屎萊姆等人有損香港網絡生態。雖然佢曾拍片否認指控,但隨後一整年都無再見觀眾,而該回應短片亦相信已被刪除。不過,昨日(22日)屎萊姆終於復出上載新片,內容係有關佢學習自製一張桌子,讓日後進行試食、開箱等拍片活動更方便。

屎萊姆當年回應指控嘅影片相信已被刪除。Photo from 連登討論區截圖

屎萊姆日前上載復出後第一條影片。Photo from 屎萊姆 YouTube

屎萊姆亦有在新片留言,感謝各位嘅評論,又表示:「無出片咁耐唯一最對唔住都係啲老觀眾!」影片嘅Dislike數在上傳不足2小時內已超過一半,而截至今早已大幅拋離Like數,多出約4千5百個,但影片同時躋身熱門榜第7位。

屎萊姆復出影片收到大量Dislike。Photo from 屎萊姆 YouTube

直言不介意狂收Dislike

屎萊姆在留言提到:「Dislike我都唔會介意,我已經被X到~化晒~ X我一嘢,你開心左,我都算做咗件功德~有意見歡迎留低,會消化會睇。」佢同時表示時間會證明一切,因為自己熱愛拍攝,所以兜兜轉轉都返嚟拍片,現時佢亦唔會趕出片,「想拍乜就拍乜~回歸最初嘅隨心是但拍。」

屎萊姆在留言區表達復出想法。Photo from 屎萊姆 YouTube評論

屎萊姆在留言區表示唔介意收到負面評論。Photo from 屎萊姆 YouTube

大多網民唔Buy

影片至今已有超過1千5百條留言,好多都係負評,例如有網民指:「期待你再次收山,我都好少DISLIKE人,我永遠DISLIKE你!」、「唔需要重新開始喎,直接摺埋佢會快啲」、「阿屎好勁,出片幾個鐘就已經有5500 dislike,果然係負評王始祖!」不過都有粉絲為佢加油,期待未來觀賞佢更多影片。

有網民指出影片上傳短時間內已收超過5千嘅Dislike。Photo from 屎萊姆 YouTube評論

網民留下負評,而屎萊姆則親自Like下評論。Photo from 屎萊姆 YouTube評論

屎萊姆在新影片中公開DIY新桌子過程。Photo from 屎萊姆 YouTube

而連登討論區都有多個帖文討論佢復出拍片,不少人都好奇慕容公子會否再出片追擊佢,亦有人直斥:「試完水溫未呀屎家軍,收皮啦~」睇嚟不少網民仍未忘記屎萊姆被指控嘅行為。

有討論區網民不滿屎萊姆拍片試水溫。Photo from 連登討論區

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel