《爆谷一周》COLLAR芯駖Winka變佈景板？座位安排被指大細超網民：以為係觀眾

By Cheryl on 29 Mar 2022

Digital Editor

女團 COLLAR最近亮相谷德昭主持嘅ViuTV節目《爆谷一周》，擔任嘉賓嘅佢哋大談出道3個月後嘅感受，而經理人Wing（戴穎）亦大爆成員「秘密」！不過，當中嘅座位安排就引起部分粉絲熱議，因為芯駖及Winka被安排坐到後方偏遠位置，節目被質疑有「大細超」之嫌。

Photo from COLLAR Facebook

芯駖Winka變佈景板？

COLLAR近日推出新曲《Never-never Land》，為宣傳新歌，8位成員包括：Marf邱彥筒、Gao沈貞巧、Day許軼、Soching蘇芷晴、Candy王家晴、Winka陳泳伽、Ivy So蘇雅琳、Sumling李芯駖，以及經理人Wing（戴穎）齊齊上《爆谷一周》做嘉賓。但可能因為多人，所以大家嘅座位編排比較特別，芯駖與Winka都慘變「邊緣人」，坐到後方，而其他成員和主持谷德昭則一起坐在前方嘅橘色梳化。對此，不少網民都認為安排大細超，直言：「唔知以為兩人係觀眾」、「喺後面做佈景板」。

Photo from 《爆谷一周》ViuTV

Photo from 連登討論區

最後一位入選成員係Ivy So

經理人Wing在節目透露了選人入團嘅過程，更大爆原來Ivy係最後一位入選成員，Wing坦言：「好多人都估唔到，佢係最尾一個入。本來以為大家覺得Ivy ok，點知唔係，佢哋好多有疑問，但我話Ivy一定要喺度。」Wing解釋，Ivy嘅親和力唔係咁容易搵到，可能大家覺得佢笑容有陽光氣色無乜特別，但佢認為，一個藝人擁有親和力並非簡單事。所以佢最後力排眾議，堅持保Ivy入團。

Photo from 《爆谷一周》ViuTV

Marf紀律最差？

Wing亦點評了COLLAR各成員嘅表現，佢認為Gao可以多站出來表達己見，諗多啲「隊長」可做嘅工作；而Day自我紀律分為6，因為佢特別為食而需要減肥；Marf嘅紀律分則係全團最低，只有5分，因為佢經常遲到，需要改善，而Marf都表示日後會改善貪睡問題。

Photo from 《爆谷一周》ViuTV

有感COLLAR似虛擬偶像

節目中，Marf坦言出道至今正值疫情時期，由於好多事情都未回復正常，所以一班成員都未感受到成為藝人後，同以往有何分別。而Wing都話現時COLLAR似虛擬偶像，「由出道嗰刻已經冇機會同fans接觸，成班都係Online互動，係疫情下嘅女團。」早前COLLAR原定了3月底舉行演唱會，但因第5波疫情爆發，Wing表示將順延至今年年底舉行。