泰國女星墜河案 疑點重重引熱議!同行人士證詞不一 媽媽收錢後態度180度改變

泰國女星墜河案 疑點重重引熱議!同行人士證詞不一 媽媽收錢後態度180度改變

生活熱話 娛樂新聞
By Cheryl on 04 Apr 2022
Digital Editor

37歲泰國女星Tangmo(Nida Patcharaveerapong)於今年2月不幸墜河身亡,由於當中充滿可疑細節,案件轟動全泰,涉案人士嘅證詞不僅互相矛盾,Tangmo媽媽態度更係離奇,痛失女兒嘅佢收到一筆可觀賠償後竟要求大眾不要再追查下去。

泰國女星Tangmo墮河案轟動全個泰國。Photo from IG@melonp.official

泰國女星不幸墜河身亡

事緣Tangmo在2月24日晚與經紀人,一位名媛,和3位富商一起乘快艇出遊,不久後,Tangmo在船尾墜河失蹤,遺體直到隔日才被發現,泰國警方指離世原因為溺水,同時發現遺體肺部有泥土,腿部亦有創傷,並表示傷勢有可能被螺旋槳弄傷所致。

涉案嘅同船人士Photo from Youtube@Thairath Online

涉案人士證詞不一

由於案件疑點重重,所以惹嚟網民熱烈討論。單係同船人士嘅證詞已經不一,Tangmo經紀人兼好友Gatick與名媛初時均表示,Tangmo在船尾小解時不慎跌落水,但很多網民都覺得,知名女星會當著其他人面前小解說法不合理,而警方重組案件時也發現名媛描述嘅姿勢奇怪。之後,經紀人竟更改證詞,表示Tangmo係因為太專心於船上拍照,又無穿救生衣,導致滑倒落水後失救。而駕駛快艇嘅富商Tanuphat Lertthaweewit亦被發現係無照駕船。

Tangmo經紀人(右)在案發後證詞被網民質疑有古怪。Photo from IG@melonp.official

女星IG帖文離奇被消失

案發後,船上眾人竟然只向搜救隊求助,並無主動報警,所以警方要收到搜救隊通知後才加入搜索行動。事發後,Tangmo嘅社交網亦有怪事發生,粉絲發現佢失蹤後有多篇IG帖文被刪除,亦有部分內容被修改過。除了女星本人,其經紀人亦有帳戶密碼,所以不少人推斷帖文係被經紀人刪去,佢其後亦提供了數張Tangmo當晚在船上拍嘅照片,都被網民發現拍攝時間有造假嫌疑,原因不明。

網民發現,Tangmo失蹤後,佢部分IG帖文被刪除。Photo from 連登討論區 截圖

網民指,經紀人展示嘅照片拍攝時間有修改痕跡。Photo from 連登討論區 截圖

經紀人背景不單純?

同時,呢位經紀人背景都引起熱議,佢以前曾擔任另一女星經紀人,之後佢竟與女星嘅老公發生關係並誕下一名女兒。後來,一直想成為媽媽嘅Tangmo就收養了經紀嘅女兒,視如己出,可見雙方感情不錯,所以好多網民都不忿經紀人對Tangmo失蹤案嘅處理手法。

富有愛心嘅Tangmo收養了經紀人女兒。Photo from IG@melonp.official

網民懷疑船上曾發生爭執

驗屍報告指,Tangmo在右側大腿有一個30厘米傷口,左腳亦有不明抓痕,由於遺體被水浸泡時間耐,亦難以證明造成傷口嘅原因。此外,有搜救人員曾在電視台爆出一些法醫報告中未有提及嘅傷勢,令人懷疑官方報告隱瞞事實。在出事當晚,涉事人員上岸時,有記者留意到佢哋身上疑似有傷,部分人衣服更似被扯爛,所以有人懷疑船上曾發生過打鬥。

涉案人士一度聲稱Tangmo在船上小解時不慎跌落水。Photo from Youtube@Thairath Online

報告指Tangmo身上有多處傷痕。Photo from Youtube@Thairath Online

疑似最後片段曝光

最近,網上流傳疑似係Tangmo最後畫面嘅片段,有網民懷疑影片展示船上曾發生爭執,Tangmo繼而被推落水,亦有另一片段疑似影到在水中掙扎嘅Tangmo伸出手想抓著遊艇嘅浮標,惟說法未能證實。

廣告
廣告

網迷懷疑穿船上曾出現打鬥場面。Photo from Youtube@Thairath Online

女星媽媽收錢後態度逆轉

Tangmo媽媽起初認為案件好有可疑,曾多次公開指責船上眾人嘅行為。但之後佢收到匿名恐嚇包裹,疑似想佢停止追究。當外界都正同情媽媽之際,佢嘅態度突然出現180度轉變。涉案嘅其中兩位富商Por和Robert向Tangmo媽媽親身致歉,Por更表示要做對方嘅兒子,聲稱自己以後會在經濟上照顧佢,而Tangmo媽媽亦公開接受佢嘅提議。除此,富商們又叫Tangmo媽媽說出賠償金金額,於是,媽媽假設Tangmo還在生並工作多30年,金額將會喺3,000萬泰銖(約7百萬港元)。所以,富商們就畀咗上述賠償金額畀佢。

富商Por竟然要做Tangmo媽媽契仔?Photo from Youtube@Thairath Online

Tangmo媽媽表示自己被富商嘅行為打動。Photo from Youtube@Thairath Online

記者事後問媽媽點解會就此原諒兩位富商,佢表示由於佢哋非常有禮,亦欣賞二人每日都去寺廟為Tangmo祈福,佢哋嘅行為深深打動了自己。之後,媽媽仲親手寫信叫大家唔好再調查此案,態度轉變令人嘩然。

Tangmo媽媽在收錢好友出現態度大轉變。Photo from IG@melonp.official

涉案富商去出家?

Tangmo葬禮舉辦過後,涉事嘅同行富商更決定剃頭出家,據聞出家為期15天。不過,泰國網民都認為佢哋只係為了躲避警方調查才有此行動,而且,15天嘅修行亦不夠真誠。不過,有消息指,泰國警方在群眾壓力下再次啟動調查,並將正前往修行嘅富商們召回國家協助調查。

同船嘅其中兩名富商竟然決定去出家,不過網民無多buy。Photo from YouTube截圖

經紀人錄音文件曝光,女星媽媽禁止調查

最新消息指,在案發當晚,慌亂嘅經紀人找來另一朋友,駕駛Tangmo嘅私家車離開現場,而車上嘅行車記錄儀錄低了佢同朋友在事發當晚嘅對話,當中內容顯示經紀人坦言事件並非意外。但係,當Tangmo媽媽知道錄音文件曝光後,就即時入紙申請所有非相關人員要即時停止調查案件。睇嚟,呢單案件嘅查明過程不斷受阻,但各界都希望事件最終能夠水落石出。

經紀人在事發後離開現場時,疑似在車上說出事件並非意外咁簡單。Photo from Youtube@Thairath Online

Tangmo媽媽堅決不讓別人插手案件。Photo from Youtube@Thairath Online

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

 

 

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel