泰國女星墜河案疑點重重引熱議！同行人士證詞不一媽媽收錢後態度180度改變

By Cheryl on 04 Apr 2022

Digital Editor

37歲泰國女星Tangmo（Nida Patcharaveerapong）於今年2月不幸墜河身亡，由於當中充滿可疑細節，案件轟動全泰，涉案人士嘅證詞不僅互相矛盾，Tangmo媽媽態度更係離奇，痛失女兒嘅佢收到一筆可觀賠償後竟要求大眾不要再追查下去。

Photo from IG@melonp.official

泰國女星不幸墜河身亡

事緣Tangmo在2月24日晚與經紀人，一位名媛，和3位富商一起乘快艇出遊，不久後，Tangmo在船尾墜河失蹤，遺體直到隔日才被發現，泰國警方指離世原因為溺水，同時發現遺體肺部有泥土，腿部亦有創傷，並表示傷勢有可能被螺旋槳弄傷所致。

Photo from Youtube@Thairath Online

涉案人士證詞不一

由於案件疑點重重，所以惹嚟網民熱烈討論。單係同船人士嘅證詞已經不一，Tangmo經紀人兼好友Gatick與名媛初時均表示，Tangmo在船尾小解時不慎跌落水，但很多網民都覺得，知名女星會當著其他人面前小解說法不合理，而警方重組案件時也發現名媛描述嘅姿勢奇怪。之後，經紀人竟更改證詞，表示Tangmo係因為太專心於船上拍照，又無穿救生衣，導致滑倒落水後失救。而駕駛快艇嘅富商Tanuphat Lertthaweewit亦被發現係無照駕船。

Photo from IG@melonp.official

女星IG帖文離奇被消失

案發後，船上眾人竟然只向搜救隊求助，並無主動報警，所以警方要收到搜救隊通知後才加入搜索行動。事發後，Tangmo嘅社交網亦有怪事發生，粉絲發現佢失蹤後有多篇IG帖文被刪除，亦有部分內容被修改過。除了女星本人，其經紀人亦有帳戶密碼，所以不少人推斷帖文係被經紀人刪去，佢其後亦提供了數張Tangmo當晚在船上拍嘅照片，都被網民發現拍攝時間有造假嫌疑，原因不明。

Photo from 連登討論區截圖

經紀人背景不單純？

同時，呢位經紀人背景都引起熱議，佢以前曾擔任另一女星經紀人，之後佢竟與女星嘅老公發生關係並誕下一名女兒。後來，一直想成為媽媽嘅Tangmo就收養了經紀嘅女兒，視如己出，可見雙方感情不錯，所以好多網民都不忿經紀人對Tangmo失蹤案嘅處理手法。

Photo from IG@melonp.official

網民懷疑船上曾發生爭執

驗屍報告指，Tangmo在右側大腿有一個30厘米傷口，左腳亦有不明抓痕，由於遺體被水浸泡時間耐，亦難以證明造成傷口嘅原因。此外，有搜救人員曾在電視台爆出一些法醫報告中未有提及嘅傷勢，令人懷疑官方報告隱瞞事實。在出事當晚，涉事人員上岸時，有記者留意到佢哋身上疑似有傷，部分人衣服更似被扯爛，所以有人懷疑船上曾發生過打鬥。

Photo from Youtube@Thairath Online

疑似最後片段曝光

最近，網上流傳疑似係Tangmo最後畫面嘅片段，有網民懷疑影片展示船上曾發生爭執，Tangmo繼而被推落水，亦有另一片段疑似影到在水中掙扎嘅Tangmo伸出手想抓著遊艇嘅浮標，惟說法未能證實。

Photo from Youtube@Thairath Online

女星媽媽收錢後態度逆轉

Tangmo媽媽起初認為案件好有可疑，曾多次公開指責船上眾人嘅行為。但之後佢收到匿名恐嚇包裹，疑似想佢停止追究。當外界都正同情媽媽之際，佢嘅態度突然出現180度轉變。涉案嘅其中兩位富商Por和Robert向Tangmo媽媽親身致歉，Por更表示要做對方嘅兒子，聲稱自己以後會在經濟上照顧佢，而Tangmo媽媽亦公開接受佢嘅提議。除此，富商們又叫Tangmo媽媽說出賠償金金額，於是，媽媽假設Tangmo還在生並工作多30年，金額將會喺3,000萬泰銖（約7百萬港元）。所以，富商們就畀咗上述賠償金額畀佢。

Photo from Youtube@Thairath Online

記者事後問媽媽點解會就此原諒兩位富商，佢表示由於佢哋非常有禮，亦欣賞二人每日都去寺廟為Tangmo祈福，佢哋嘅行為深深打動了自己。之後，媽媽仲親手寫信叫大家唔好再調查此案，態度轉變令人嘩然。

Photo from IG@melonp.official

涉案富商去出家？

Tangmo葬禮舉辦過後，涉事嘅同行富商更決定剃頭出家，據聞出家為期15天。不過，泰國網民都認為佢哋只係為了躲避警方調查才有此行動，而且，15天嘅修行亦不夠真誠。不過，有消息指，泰國警方在群眾壓力下再次啟動調查，並將正前往修行嘅富商們召回國家協助調查。

Photo from YouTube截圖

經紀人錄音文件曝光，女星媽媽禁止調查

最新消息指，在案發當晚，慌亂嘅經紀人找來另一朋友，駕駛Tangmo嘅私家車離開現場，而車上嘅行車記錄儀錄低了佢同朋友在事發當晚嘅對話，當中內容顯示經紀人坦言事件並非意外。但係，當Tangmo媽媽知道錄音文件曝光後，就即時入紙申請所有非相關人員要即時停止調查案件。睇嚟，呢單案件嘅查明過程不斷受阻，但各界都希望事件最終能夠水落石出。