download HolidaySmart 假期日常 app
喪盡癲才丨尼古拉斯基治玩自嘲獲好評,一洗「爛片王」污名,仲靠片酬還清債務?

喪盡癲才丨尼古拉斯基治玩自嘲獲好評,一洗「爛片王」污名,仲靠片酬還清債務?

電視電影 娛樂新聞
By Cheryl on 22 Apr 2022
Digital Editor

尼古拉斯基治(Nicolas Cage)曾為荷里活片酬最高演員之一,惟理財不善導致債台高築,要狂拍戲還債,搞到被封「爛片之王」。但佢在新戲《喪盡癲才》中飾演自己,憑自嘲與高質製作獲得爛蕃茄接近90%好評!

尼古拉斯基治(Nicolas Cage)在新作《喪盡癲才》中瘋狂自嘲,電影獲得影迷喜愛。Photo from Jimmy Kimmel Live

Nicolas Cage曾為最高收入演員之一

尼古拉斯基治(Nicolas Cage)1982年展開演藝生涯,更在1995年憑《兩顆絕望的心》(Leaving Las Vegas)連奪金像獎、金球獎及美國演員工會獎三大影帝殊榮。佢主演過多套賣座電影,例如《驚天動地》(Con Air)、《奪面雙雄》(Face/Off)、《驚天奪寶》(National Treasure)系列等。身價暴升嘅佢,當時每部片酬約2千萬美元,係有史以來收入最高演員之一。

《驚天奪寶》係Nicolas Cage著名電影系列之一。Photo from 《驚天奪寶》劇照

不斷揮霍臨近破產邊緣

雖然演技精湛,但Nicolas不擅理財,揮霍無度嘅佢曾在巴哈馬買下2座私人島嶼、收購15套房子、坐擁2座城堡、2座莊園,又曾花錢買各式奢侈品、罕有汽車、私人遊艇、及一架私人噴射飛機。因此,佢欠下美國國家稅務局630萬美元(約4,914萬港元),更傳出破產消息,雖然被本人否認,但仍引起熱話。

Nicolas花錢太勁,欠下巨款。Photo from 《驚天動地》劇照

Nicolas Cage出產了不少meme圖Photo from 《驚天動地》劇照

狂接戲還債被封「爛片王」

Nicolas曾透露當年欠債情形,佢指當時被多名債主和稅務局追數,每月又為媽媽花2萬美元(約15.6萬港元),好讓佢唔需要入精神病院,所以支出龐大。雖然好多人勸佢申請破產,但佢都拒絕。為了還債,佢開始接怕好多直出影碟嘅電影,由於不少觀眾認為質素參差,所以佢被封為「爛片王」。但即使如此,Nicolas早前透露,自己會認真讀劇本,盡力演好每個角色,絕不揸流攤。

Nicolas Cage因為不斷接拍電影還債而被封「爛片王」。Photo from 《喪盡癲才》劇照

第5任妻子比大仔更年輕

Nicolas共有5段婚姻,育有2子及4名孫兒。佢同第4任妻子Erika Koike在拉斯維加斯結婚後僅4天便離婚。現年58歲嘅Nicolas去年二月與小30歲嘅日本藝人芝田璃子(Riko Shibata)結婚,並與今年一月宣布有喜。另外,Nicolas大仔現年29歲,即係比爸爸嘅第5任妻子年紀更少,所以有網民都笑言Nicolas猶如領養女兒。

Nicolas第5任妻子仲細過佢大仔。Photo from ExtraTV YouTube

新作《喪盡癲才》裡狂自嘲獲好評

在新作《喪盡癲才》(The Unbearable Weight of Massive Talent)裡,Nicolas飾演「Nick Cage」,角色為一個曾經當紅,但現時欠債累累,接近破產嘅演員,所以同飾演自己無咩分別。戲中講述佢出席狂迷兼富豪哈維(Pedro Pascal飾)嘅生日派對,以賺取100萬酬勞,之後展開連串搞怪刺激嘅故事。

Nicolas在新電影《喪盡癲才》裡面有驚喜演出。Photo from 《喪盡癲才》劇照

Nicolas在當中自嘲其事業不濟、濫拍、豪花錢、欠債等等,劇情仲不時提及佢多套舊作,又會重現一些經典電影場面,風格將現實與虛構混合,一班影迷都睇得好有樂趣,電影在著名影評網Rotten Tomatoes更獲得89%好評。而Nicolas在現實中亦靠《喪盡癲才》片酬成功還清債務,所以無論戲裡戲外都猶如翻身一樣。

電影獲得不少好評Photo from 《喪盡癲才》劇照

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel