荃灣街市豬肉檔型男店員出沒！激似AK、張天賦、羅志祥？

By Moon Lam on 04 May 2022

Digital Content Writer

近日係FB群組「荃灣人」流傳荃灣街市有型仔店員出沒，事主仲勁開心上傳合照，可見圖中店員濃眉大眼，就算戴住口罩都覺得係個型男，唔怪得一班家庭主婦咁熱烈討論啦！即睇豬肉檔到底係邊！

Photo from Facebook群組荃灣人

買餸偶遇SSR級靚仔豬肉佬

女網民在帖文中表示自己少去買餸，無諗過會見到咁靚仔既豬肉佬！並隨帖附上合照，一出就引起大批荃灣街坊留意～男店員染一頭金髮，一對大眼有神又深邃，著住反領Tee同戴銀鏈耳環，有打扮過絕對唔係我地平時見既豬肉佬，就算戴左口罩都覺得會係一個型男呀！合照中樓主以心心眼emoji遮左自己個樣，但就算隔左個emoji都感受到佢興奮既心情呀！

Photo from Facebook群組荃灣人

店員唔止靚仔仲態度好

睇完圖片一眾街坊當然想知邊到先會見到靚仔店員，一番追問下終於得知係，即楊屋道街市對面兩條街既「鮮味」豬肉檔。及後又有網民留言，指男店員唔止幾靚仔仲幾好人，有次去買豬肉仲教佢點煲湯，仲有網民話佢係「漆黑中的螢火蟲」，靚仔又態度好，呢個形容真係當之無愧！

網民大讚有明星相

唔少網民更加表示「mirror執漏左一子」，指佢粗眉大眼，同Anson Kong＠mirror有啲似，又有網民話係似小豬羅志祥，仲有網民話同MC張天賦都似呀，所以就出現左「楊屋道AK」、「荃灣小豬」等等既花名！但唔理似邊個，總之都係似係靚仔，有明星相啦！更加有網民誇張咁講為左見店員哥哥，黎緊一個月要要煮豬全宴！但亦有清醒派既網民話要見一見真面目，除左口罩先知係咪真係靚仔！

Photo from 羅志祥 IG

Photo from MC張天賦 IG

Photo from Anson Kong IG

專程幫襯卻失望而回

有女街坊睇到post後專程去「鮮味」豬肉檔，諗住會一會靚仔店員，點知就有緣無份，不過都照買左一份豬肉支持下，係同一群組發帖表示「專登搵靚仔買豬肉，點知變左個阿姐，小豬去左邊？」，剩係睇圖都感受到事主有幾失望。不過就有唔少網民回覆，有網民話靚仔店員可能係太子爺，只係間唔中落場幫手，亦有網民話成日經過都見到佢鋪，可能只係咁岩放假，仲叫街坊們唔好放棄呀！