李子柒年賺近2億紅爆YouTube，停更300日傳被迫改名？原來無錢落袋現況超慘
李子柒農村田園生活，古法製作美食影片爆紅
李子柒自2016年起拍攝美食影片，佢嘅影片背景多為鄉村田郊，以古法炮製美食，李子柒會著漢服出鏡，又會親自下田採集食材，佢憑反樸歸真嘅風格走紅。除咗喺內地引起關注外，李子柒嘅影片亦深受外國網民歡迎，佢YouTube頻道有唔少其他國家嘅網民留言支持，影片播放量亦極高，幾乎每條片都有超過千萬點擊。
YouTube訂閱打破健力士世界紀錄，年賺近2億
李子柒於國內外走紅，佢嘅YouTube Channel至今已有1,690萬訂閱，佢最高點擊嘅影片播放量更突破1億！李子柒打破健力士世界紀錄，成為「最多訂閱量YouTube中文頻道」。有指佢一年就狂賺1.6億人民幣（約$1.9億港元），吸金力超驚人。
開設天貓店出售食品，李子柒本人無股份？
除咗拍片，佢簽約嘅經紀公司「杭州微念科技」亦為佢開設天貓品牌旗艦店，出售各種佢曾經拍攝過嘅食物料理包，如螺螄粉、火鍋底料等。李子柒天貓店一個月營業額已破億，李子柒螺螄粉每月銷量超過150萬。
李子柒同經紀公司杭州微念科技簽約後聯合成立四川子柒文化傳播有限公司，李子柒個人佔股49%，大股東杭州微念品牌管理有限公司再成立一間食品公司，不過被揭李子柒本人並無任何股份。
YouTube頻道突停止更新，疑與經紀公司有矛盾
李子柒喺中國內外人氣強勁，佢嘅影片更備受內地官媒認可，多次公開讚揚佢傳揚中國文化。而喺事業如日中天之際，李子柒嘅個人頻道卻突然停止更新。
李子柒YouTube Channel自2021年7月14日上傳「我們中國人的開門七件事，柴米油鹽醬醋茶」後就一直未有公開新影片，佢嘅經紀公司亦無再為佢宣傳，其後李子柒被爆與經紀公司有矛盾，雙方喺利益分配上產生分歧，更要對簿公堂。
童年遭遇坎坷，14歲輟學打工養家
其實李子柒童年遭遇十分坎坷，佢原名李佳佳，自細父母離異，爸爸好早就離世，同繼母關係唔好，對方更會動手教訓李子柒，李子柒爺爺嫲嫲睇唔過眼，將佢接返鄉下撫養，但到李子柒小學五年級時佢爺爺亦離世，只靠嫲嫲獨力照料佢長大。
李子柒14歲時輟學外出打工，8年間佢做過唔同嘅工作：服務員、夜店DJ、駐唱歌手等。直至2012年李子柒為照顧病重嫲嫲，決定回鄉。佢之後開設淘寶網店出售家鄉農產品賺取生活費，為咗宣傳店鋪，佢接受表弟嘅建議，開始拍攝短片，正式加入影片創作行業。
停更300日傳被迫改名，李子柒發聲明回應
李子柒與公司出現糾紛，有指佢被架空。停更至今近300日，期間有消息指李子柒除咗唔可以再喺佢嘅頻道更新，更被迫改名！網上有唔少「李佳佳」帳號出現，自稱本人係李子柒，日前李子柒發律師聲明，要求呢啲用戶主動刪除有關嘅影片同文章。
聲明稱喺抖音、微博、小紅書、快手等網絡平台出現唔少帳號指「從此再無李子柒，只有……」、「李子柒被迫改名」等不實言論，李子柒亦留言強調自己唔會改名：「確實讓背後花錢的人失望了，不僅不會改名字，還受法律保護！」
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
內地美女學霸16歲讀牛津，全級第一、狂攞獎學金！網紅風格被質疑
14 Apr 2022
深圳一位28歲女生朱雯琪喺微博走紅，原因係佢16歲就入讀名校牛津大學，攞獎學金之餘更以全級第一嘅成績碩士畢業，不過因為佢平時經常晒日常美照而被質疑係假學霸！仲有數學網紅出題考驗以證真身，朱雯琪喺微博一一公開證明自己並無「學歷造假」。
內地美女學霸牛津大學畢業短片走紅
朱雯琪3月時以牛津大學數學建模與科學計算系（Mathematical Modelling and Scientific Computing）碩士畢業，佢公開咗畢業短片竟意外走紅，引嚟唔少內地網民關注。
被質疑營造學霸人設，其實係賣貨網紅
之後開始有人質疑佢所謂牛津大學碩士畢業嘅學歷並非真實，而係營造學霸人設，加上佢微博經常晒出精心打扮嘅美照，被指其實係網紅為咗賣貨賺錢扮學霸。
有網民直言：「數學建模最多是個專業，不是系，編的時候能不能專業一點」、「打扮是為了拍照吧！完全不像學術圈的優秀學生」，甚至有人以「學媛」稱呼佢。
數學網紅出題考驗，學歷真實性獲肯定
之後微博一位擁近300萬粉絲嘅數學網紅更親自出大學應用數學基礎題目考驗佢嘅知識，朱雯琪隨後喺微博列出解題步驟，並指出題目設定上嘅問題，對方即確認佢應該真係數學系畢業，更讚佢「功底不錯」。
對於佢微博公開嘅相，朱雯琪表示佢都係一個普通女生，都中意奢華嘅嘢，平時會花好多時間P圖，亦會周圍食買玩，打卡影靚相，所以微博睇落似「帶貨網紅」。
學歷、工作經歷都超驚人？！
朱雯琪畢業於名牌大學，佢嘅學習路當然不一般，亦唔係傳統嘅乖學生，10歲時退學在家；靠自學12歲考入深圳國際學校，16歲入讚牛津數學系，畢業後進入金融行業，相繼任職摩根大通同高盛，到2020年重返牛津校園修讀碩士課程。以第一名畢業又攞咗2個獎學金，將繼續攻讀博士。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
