【姜濤都識玩穿越？】由未來回到2022年只為父母做一件事！溫柔姜Man最新微電影內容分享＋必去尖沙咀限時大型姜濤打卡點！

人氣爆登嘅姜濤，除咗喺4月30日嘅姜濤誕出新歌之餘～最近又有新搞作啦！講緊嘅係姜濤代言嘅HPV廣告微電影出爐啦！畫面唯美加上姜濤純樸嘅演繹，令人一度以為係愛情片！點知原來係一個好催淚又令人窩心嘅母子情深微電影～小編已經為一眾姜糖整合咗精彩劇照同內容分享，仲有必去嘅尖沙咀限時大型姜濤打卡點！想知姜濤最新動向嘅你，即刻繼續睇落去啦～

#姜濤最新微電影—飾演孝順仔大Show溫柔一面！

劇情一開始係30年後嘅姜濤參加咗為期14日嘅時空旅程，嚟到2022年嘅香港，同「爸爸」一齊整蛋糕，仲有「一家三口」一起慶祝媽媽生日許願，場面勁溫馨～但原來呢啲都係《預防HPV No Regrets》微電影嘅橋段嚟㗎！作為HPV健康教育大使嘅姜濤，喺片中飾演一個孝順仔，「媽媽」因為子宮頸癌過身，令到無好好做足預防措施嘅爸爸好悔疚，所以為咗提醒爸爸要提早預防HPV，姜濤就由未來穿越過嚟啦！喺鏡頭下都睇得出姜濤昇華成姜Man深層次嘅演繹呀～

Photo from MSD YouTube Channel

Photo from MSD YouTube Channel

#姜濤以教育大使身份－呼籲大眾及早預防HPV！

對於坊間依然有唔少人對HPV有誤解，以致輕視感 HPV嘅嚴重性，而未有喺適當時候提早採取預防措施，所以日前喺《預防 HPV No Regrets》微電影發佈會上，姜濤亦以教育大使身份呼籲大家，尤其男性唔好以為唔關自己事！記得要要及早預防HPV。同場亦有臨床腫瘤科專科醫生為大家分享正確嘅醫學資訊，提升對感染HPV嘅關注度！可見姜濤唔止唱得跳得演得，仲好關注健康添㗎！各位姜糖都要注意呀～～

#拍攝趣事多蘿蘿！一句對白令姜濤諗起兄弟瘋狂NG

講到拍攝趣事，不得不提就係令到姜濤NG咗幾次嘅對白，竟然係「如果大家想拎到 Consultation Card，就要問醫生查詢」！原來係因為姜濤一早已經為兄弟準備咗幾張卡，所以講對白果陣，腦入面不停諗住兄弟平日搞笑嘅表情而係咁食螺絲！連NG原因都咁搞鬼，姜濤真係好可愛呀！

Photo from MSD YouTube Channel

#必去！尖沙咀限時大型姜濤打卡點

除咗微電影之外，姜濤灣亦伸展去到尖沙咀！果度除咗有粉絲幫佢搞嘅Pop Up Store，而家仲有「預防HPV  | No Regrets  姜濤。為未來行動」Pop Up喺K11 Art Mall，仲一次過曬冷咗姜濤代言以嚟嘅唔同造型，可以俾姜糖們朝聖之外，仲可以跟溫柔嘅姜濤了解下HPV病毒嘅可怕之處，點解同男女老幼都有關！

Photo from MSD

#微電影場景重現！啱晒姜糖們、情侶齊齊打卡～

而場內亦重現返微電影入面姜濤化身咖啡師嘅場景，有多個靚靚打卡位。姜糖們可以去買杯咖啡，坐喺度幻想吓自己係微電影入面嘅女主角，由姜濤陪你傾偈，仲Man爆咁講「世間最痛嘅痛就睇住愛嘅人受苦」。姜Man獨有嘅溫柔眼神，相信只有置身喺呢個打卡熱點去重溫呢條片就最啱Feel！

最正嘅係，Pop Up入面仲呈現咗唔少微電影入面嘅金句，好似係「愛情之間，兩性同步」等等⋯⋯各位姜糖們，快啲帶埋男朋友嚟，一齊影相打卡之餘，仲可以了解吓預防HPV呢個指定動作，為你哋嘅愛情加上一個完滿無憾嘅約定啦。

Photo from MSD

#即Loop姜濤最新微電影＋Pop Up打卡點分享

講咗咁耐～你係咪都好想睇姜濤最新嘅微電影呢？《預防 HPV No Regrets 微電影》已經喺5月7日晚上9點，喺MSD HK Youtube Channel正式播放啦！想知30年後嘅姜濤同而家有咩分別？即睇足本微電影：https://youtu.be/NB_GkDu-QE0

睇完之後記得去埋K11個Pop Up呀！

「預防HPV  | No Regrets 姜濤。為未來行動」Pop Up
日期：2022年5月9日至18日
地點：尖沙咀河內道18號K11 Art Mall地下中庭

Text：HolidaySmart editorial
Photo Source：MSD YouTube Channel
Featured for：MSD YouTube Channel