download HolidaySmart 假期日常 app
網民分享於日本迪士尼獲得「未來快證」?!2個情況就會獲派發!仲可以無限期使用?

網民分享於日本迪士尼獲得「未來快證」?!2個情況就會獲派發!仲可以無限期使用?

旅遊攻略 生活熱話
By Stephanie on 17 May 2022
Digital Content Writer

相信大家去主題樂園最害怕嘅就係太多人,導致玩遊樂設施要大排長龍!不過現時唔少主題樂園都增設Fast Pass(快速通行證),希望幫手減少排隊時間,等大家可以盡情玩~最近,有網民於FB群組分享自己過往去日本迪士尼遊玩嘅經驗,仲驚爆原來擁有隱藏版嘅快證?!

入主題樂園排隊嘅時間長,但有網民就分享於日本迪士尼所獲得嘅隱藏快證!Photo from 《MIRROR GO 》

日本網民分享16年前於迪士尼取得「未來快證」!

日前,有網民分享於Twitter上見到嘅迪士尼樂園遊玩經驗,指自己於5月10日到訪日本迪士尼,但就竟然仲用到16年前所獲得嘅「未來快證」?!據悉,當年網民因為身高不足冇得玩過山車「忿怒雙神」(Raging Spirits);而工作人員就俾咗一張未來可以使用嘅「過山車通行證」俾佢,希望等佢大個之後能夠玩返,真係好sweet~

有日本網民分享近日拜訪迪士尼嘅經歷,仲成功用返16年前獲得嘅「隱藏快證」?!Photo from DAN_4114_IEL @ Twitter

原來好多遊客都曾經收到?!

呢個post瞬間引起日本傳媒關注,而唔少網民都紛紛留言分享相似嘅經歷!有網民就表示17年前曾經取得「Space Mountain(飛越太空山)」嘅未來通行證,相隔咁多年搵返都令佢嚇一跳;而最特別嘅就係快證上有埋米奇老鼠嘅簽名㗎,,真係好有紀念價值~

唔少網民都分享有同樣經歷,而且部份快證上仲有埋米奇老鼠嘅簽名㗎~Photo from DAN_4114_IEL @ Twitter

「未來快證」無時間限制!

其後就掀起網民們大晒「戰利品」嘅留言,睇嚟好多日本網民都曾經收到呢張獨特嘅Fast pass呢~而且大家所展示嘅「未來快證」並冇寫上有效日期,等大家隨時都可以去兌換遊玩機會!但當大家使用咗快證後就會喺下方填上日期,只係能夠用一次~

好多網民都喺留言區分享佢哋過往嘅「戰利品」~Photo from DAN_4114_IEL @ Twitter

呢類型嘅快證上並冇標明有效日期!Photo from DAN_4114_IEL @ Twitter

遊樂設施故障時亦能獲得!

不過網民亦對於如何取得「未來快證」而感到好奇!除咗上述所講嘅身高不足之外,原來當大家花時間排隊但遊樂設施不幸發生故障時,都會獲派發㗎~網民都忍唔住大讚迪士尼真係非常貼心;然而部份網民就突破盲點表示「又可以讓他(客人)付一次入場費了」,覺得迪士尼樂園嘅經營方法的確非常厲害!

有網民就表示原來不幸遇上遊樂設施故障都會取得特別快證㗎!Photo from 日本省錢小站 @FB

大部分網民都係因為身高不足,所以小時候就取得「未來快證」!Photo from 《反起跑線聯盟》

大阪環球影城都有?!

另外,網民指出其實並非得日本迪士尼有呢項服務,就連大阪環球影城都有㗎!網民上載2007年所獲得嘅「Jurassic Park: The Ride」嘅遊玩證,不過呢個遊樂設施喺2018年嘅時候重新改建咗喇,就算再去玩返都已經唔同咗喇~

有網民分享15年前去大阪環球影城所獲得嘅快證!Photo from DAN_4114_IEL @ Twitter

不過呢項遊樂設施喺2018年嘅時候已經重新改建咗喇~Photo from unistudios @ IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

港男陪女友去迪士尼反而激嬲對方? 網民一面倒力撐女友:唔嬲就奇!

1 Nov , 2021

唔少情侶都喺假日尋找唔同嘅地方去玩,一齊製造美好回憶~最近,有位港男於討論區大呻陪女友迪士尼樂園玩,不過就因為「一蚊都冇洗過」而激嬲女友,搞到佢非常無奈,詢問網民究竟係佢孤寒定女友太「港女」?!

港男專程陪女友去迪士尼樂園玩,但卻無意中激嬲女友?!Photo from TVB

# 港男陪女友去迪士尼卻激嬲對方?!

相信大家都會同另一半佢唔同嘅地方玩,一齊創造屬於兩人嘅甜美回憶,而主題樂園就一定係其中一個好去處喇~日前,有位港男就表示同女友入迪士尼樂園玩,但就反而激嬲咗女友,並以「女朋友嬲我去迪士尼一蚊都冇洗過 點算」為題開post詢問網民意見。

港男於討論區大呻陪女友去迪士尼,卻反而激嬲咗對方?!Photo from 連登討論區

# 女友想買頭箍!

港男表示最近就利用迪士尼樂園嘅門票優惠,打算陪本身已經有全年証嘅女友入迪士尼玩。入樂園之後,女友非常興奮去店舖裡面尋找鍾意嘅頭箍,不過港男就勸喻「唔好嘥錢啦!」,只係幫女友影相。而女友就似乎有少少唔開心,不過佢亦覺得唔抵買,所以好快就放棄咗想買嘅念頭!

女友入園後立刻去店舖睇頭箍,經港男勸喻後就放棄購買!Photo from YouTube @余思霆 思家霆園

# 女友想打卡買飲品!

兩人繼續於迪士尼樂園內遊玩,而女友經過小食亭嘅時候就見到好適合打卡嘅飲品,不過購買嘅人龍超級長,所以港男就一下子拉走咗佢!自此之後,女友嗰日全日就黑口黑面咁。

女友本身想買飲品打卡,不過最終被港男一下子拉走咗!Photo from YouTube @余思霆 思家霆園

# 女友坦白生氣原因!

港男見狀心感不妙追問女友,但女友都唔肯講只係默默咁留咗幾滴眼淚。後來,女友終於卸下心防表示唔開心係因為「今日去迪士尼乜嘢都冇買,乜嘢都冇食過!」

兩人玩完一日後,女友就嬲咗港男!Photo from TVB

# 港男表示:唔明點解嬲!

港男聽到女友嬲嘅真正原因後,就十分不解「心諗陪咗你去迪士尼打卡做港女,仲想我點,唯有同佢講下次聖誕節去再買過啦!」事後港男依然諗唔明,所以就詢問網民嘅睇法「係我太唔識浪漫情趣定女友太港女」?!

港男對於女友嬲嘅原因感到無奈!Photo from TVB

# 大部分網民都覺得港男好掃興?!

呢個post隨即引起網民關注!大部份嘅網民就表示明白點解女友會嬲,認為入得主題樂園就當然會「打卡」,而且女友亦唔係胡亂花錢,覺得港男未免「太唔識做!」

有網民就認為港男嘅行為,難免會令女友嬲嘅!Photo from 連登討論區

唔少網民都表示替女友感到可憐,難得拍拖入迪士尼樂園玩都有咁多限制!Photo from TVB

# 有網民覺得女友鍾意亂花錢?!

不過亦有網民同港男有同樣嘅睇法,覺得女友想買嘅嘢並唔實用,係浪費金錢嘅行為!網民就覺得女友竟然因此而嬲,實在不可理喻?!

有網民就認同港男嘅睇法,覺得呢位女友性格港女?!Photo from 連登討論區

部份網民就認為女友嘅行為的確好「港女」!Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel