美國研究發現人類離世後,眼睛能運作長達5小時!盤點10個人體冷知識:白天與夜晚身高有差別/女生聽力更好?

美國研究發現人類離世後,眼睛能運作長達5小時!盤點10個人體冷知識:白天與夜晚身高有差別/女生聽力更好?

生活熱話
By Stephanie on 19 May 2022
Digital Content Writer

生老病死乃人之常情!最近,美國一項研究指出原來人類離世後,眼睛依然能夠運作長達5小時,並且對光線作出反應!宜家就等我哋一齊睇下10個有關人體嘅冷知識啦,睇下大家又知道幾多個~

有研究顯示原來人類去世後,雙眼依然有反應?!
Photo from 《想見你》劇照

人類去世後,雙眼依然有反應?!

當人類離世後,普遍都唔會再對外界嘅任何刺激有所反應!然而,美國最近嘅一項研究發現人類離世後,雙眼依然能夠運作長達5小時咁耐!喺實驗中,科學家們成功喚醒去世人類嘅眼球功能:發現當雙眼受到光線刺激時,依然能夠捕捉到眼球內視網膜所接收到嘅訊息,確認雙眼依然有反應!

美國研究發現人類離開後,雙眼能夠運作至少5小時。
Photo from 《頭七》劇照

眼睛有反應長達5小時!

根據報導所講,今次係史上第一次有器官捐贈者嘅雙眼能夠對光線有反應;仲表示喺人類離開後5小時都能夠對昏暗、色彩不一等嘅光線產生反應!不過研究人員補充,雖然眼睛尚能夠運作,但由於本體負責處理訊號接受嘅大腦已經停止運作,所以「比較難推斷能夠見到甚麼」。

離世後,雙眼依然會對光線作出反應
Photo from 《德魯納酒店》劇照

1. 男士去世後,依然有生理反應?!

若果男士係以站立嘅方式離世,血液將會聚積於雙腿,導致下半身血管膨脹。隨住時間越耐,男士有可能會因此而導致「升旗」!

原來男生去世後,都有機會出現生理反應?!
Photo from 《夫婦的世界》劇照

2. 人類血管長度能夠繞2.5個地球

每個人嘅身體都佈滿血管,當中微絲血管、動脈、靜脈等血管總長度達到逾10萬公里,足足可以圍繞地球2.5圈!

一個人嘅血管總長度足足可以環繞2.5個地球!
Photo from 《惡作劇2吻》劇照

3. 白天及夜晚身高會不同!

大家早上一起身嘅時候身高都會高啲,但經過一日嘅活動量後,脊柱會受到壓力,導致晚上量度身高嘅時候會有偏差!普遍而言,大家早上嘅身高會高出1cm左右。

原來大家一起床嘅時候身高會比較高!
Photo from 《無間道》劇照

4. 睡覺消耗的熱量比看電視多!

相信大家假期嘅時候都一定會瞓得比較多,原來瞓覺所消耗嘅熱量比坐喺度睇電視更加多!由於瞓覺嘅時候,我哋嘅大腦依然活躍地運作中,而且其他器官都保持運作,所以消耗得比較多;而消耗嘅熱量多少亦同個人體重及睡眠品質有關連。

睡覺所消耗嘅熱量比睇電視多!
Photo from 《The K2》劇照

5. 手指甲生長速度比腳趾甲快4倍!

過去有研究發現人類嘅手指甲一個月大概長3.47mm,但亦會因人而異!手指甲重新生長嘅時間大約係4-6個月;而腳指甲就係6-9個月。

手指甲嘅生長速度比腳指甲快!
Photo from 《德魯納酒店》劇照

6. 成人骨骼數量比出生嬰兒少

初生嬰兒嘅骨骼數量大約係305塊骨頭,但隨住年齡嘅增長,成年人嘅骨骼數量將會變成206塊!原因係我哋喺成長嘅過程中,部份骨頭將會融合埋一齊。

初生嬰兒嘅骨骼數量比成年人多!
Photo from 《殘念丈夫》劇照

7. 普遍男生視力較好;女生聽力更好

男生同女生嘅身體構造本來就有少少唔同:作為「視覺系動物」嘅男生視力相對上比較好;但值得一提嘅係女生對於顏色嘅靈敏度比男生高!而且女生喺聽力方面亦比男生強。

研究指男生嘅視力比女生好,但男生患有色盲嘅機率比較高!
Photo from 《從天而降的一億顆星》劇照

然而,女生嘅聽力比男生好
Photo from 《The Producers》劇照

8. 打噴嚏時,人的心率會降低

過往曾經有流傳「打噴嚏時心臟會停頓一毫秒」,但後來有研究就指係心率降低!由於打噴嚏會出現壓力導致肌肉用力縮緊,短暫影響血液流通速度。

打噴嚏嘅時候,人嘅心率會受到影響而降低!
Photo from 《偶然發現的一天 》劇照

9. 左耳接受甜言蜜語的速度更加靈敏

有指左邊耳朵係受到右腦嘅控制,而右腦則負責主導我哋嘅情感,因此左耳接受甜言蜜語嘅速度比右耳更加快!若果熱戀中嘅情侶想迅速令感情升溫,就記住向另一半嘅左邊耳仔講嘢喇~

左邊耳朵接受甜言蜜語嘅速度比右耳更靈敏!
Photo from 《不能說的秘密》劇照

10. 成年人的頭髮可拉伸25%

成年人嘅頭髮可以拉伸多25%,而且並唔會斷裂!若果未能做到,即係代表頭髮並唔健康。

據悉,人嘅頭髮係可以拉伸25%!
Photo from 《解憂理髮店》劇照

資料來源:網易、heho健康網站

廣告
廣告

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

8個你可能不知道的地震冷知識!香港呢4個地區曾經係震央/火星都有地震?!

15 Mar , 2022

香港昨日(14號)凌晨時分發生地震天文台接受到大約8千位市民嘅報告,係暫時歷年最多人報告地震嘅一次!唔少市民都表示感受到「震到醒咗」、「點解冇緊急警報?」等,過往香港其實亦曾發生地震,宜家就等我哋一齊了解下有關地震嘅冷知識啦~

以下係8個有關地震嘅冷知識,而香港過往亦曾經有過幾次境內嘅地震!
Photo from 《我的小確幸》

1. 香港自1905年至今,紀錄到185次地震紀錄!

根據香港天文台嘅數據顯示,由1905年至今香港已經錄得多達185次強度唔同嘅地震;而香港自1979年引入短週期地震台後開始就錄得76次有感地震,平均每年大約2次。

香港自1905年後,錄得185次地震紀錄!
Photo from TVB

2. 香港破壞力最強的一次地震

紀錄中最嚴重嘅一次地震係發生於1918年,當時在港東北300公里嘅汕頭近岸小島發生發生7.3級大地震!據悉當時所有大廈都有搖晃,而部分建築物仲因此受損,聖若瑟書院因為嚴重破損而搬遷;所幸嘅係香港嘅地震從未引致任何傷亡!

香港最嚴重嘅地震發生於1918年!
Photo from 天文台

聖若瑟書院仲備受破壞,而需要搬遷!
Photo from 聖若瑟書院 網站

3. 令香港受影響的震央區域

雖然香港並非位於活躍地震帶,但鄰近地區嘅地震亦有可能波及香港。當中唔少地震震央位置都喺南海北部、台灣、菲律賓等,視乎地震強度而有所影響。

香港亦有機會受附近地區嘅地震所影響到!
Photo from 《我的小確幸》

4. 香港有4個地區曾經係震央!

位於歐亞板塊內嘅香港距離活躍地震帶非常遙遠,發生地震嘅機會十分微。然而,香港境內有4個地方曾經發生地震:大嶼山以東海域(1982年及1995年)、米埔(1983年)、大欖涌水塘(2014年)以及長洲(2019年),而最近嘅2次都只係分別錄得1.4級同埋1.8級地震,所以市民未必能夠感受到!

大欖涌水塘一帶於2014年錄得1.4級地震!
Photo from Google

長洲2019年亦有發生地震!
Photo from Google map

5. 其他星球都有地震?

除咗地球之外,原來火星都曾經錄得地震!2018年11月美國NASA嘅火星探測器就疑似捕捉到火星震嘅信號,研究顯示雖然火星並冇任何板塊構造,但係一個充滿塵埃、奇怪電磁脈嘅星球,因此被評為地震活躍嘅星球!

原來火星係地震非常活躍嘅星球?!
Photo from Pinterest

圖為美國 NASA 洞察號火星探測器拍攝畫面。
Photo from NASA

6. 史上震級最強的地震

1960年5月22日下午3點,發生於智利嘅9.5級大地震係人類史上觀測記錄規模最大嘅地震!數萬人因此而傷亡,200多萬人嘅家園受到破壞而無家可歸,仲令當地6個火山重新噴發,造成多重傷害。強烈嘅地震亦引發海嘯,激起嘅海浪足足有25米咁高,仲令夏威夷、日本、菲律賓等地方都大受影響!

1960年於智利發生嘅大地震為歷史上最嚴重嘅一次,足足有9.5級!
Photo from Twitter

強烈嘅地震仲誘發海嘯,波及多個國家!
Photo from Twitter

7. 最早出現地震的地方

《國語·周語》記載,陝西岐山喺周幽王二年(公元前780年)曾發生過大地震,係暫時記載得比較詳細嘅地震,所以亦被大家視為最早嘅地震紀錄!根據《中國歷史地震目錄》,當時嘅地震等級大約係7級。

最早記載嘅地震紀錄係發生於周幽王二年(公元前780年)!
Photo from TVB

8. 最早發明地震儀器

中國東漢時期著名嘅天文學家張衡精通天文知識,根據《後漢書·五行志》記載佢喺公元132年發明「地動儀」,藉此探測發生地震嘅方向,有指機器嘅測試靈敏度已經係當時比較厲害嘅機器。

東漢天文學家張衡發明咗地動儀
Photo from 微博

地動儀能夠探測地震嘅確切方向,儘管當時唔少人都唔相信張衡嘅講法!
Photo from 微博

後來科技逐漸發達!直到1880年,第一台精準嘅地震儀係由英國地理學家約翰·米爾恩(John Milne)所發明,仲被大家稱為「地震儀之父」~

1880年,精準嘅地震儀器係由英國地理學家John Milne研發出!
Photo from Twitter

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel

Share to Facebook
Our Videos
官方影片
You may also like
你可能也喜歡
27歲男為迎娶47歲網戀新歡堅持與22歲妻子離婚!母子戀修成正果
27歲男為迎娶47歲網戀新歡堅持與22歲妻子離婚!母子戀修成正果
2 days ago
【迷你兵團2】13個關於Minions冷知識!最初原型係半獸人/全部都係男仔/香蕉語言大解析!
【迷你兵團2】13個關於Minions冷知識!最初原型係半獸人/全部都係男仔/香蕉語言大解析!
2 days ago
港男分享於英國工作感受!列出4大優點 25日AL/準時收工!網民認為:視乎咩工種
港男分享於英國工作感受!列出4大優點 25日AL/準時收工!網民認為:視乎咩工種
3 days ago
內地知名女創業家公開徵友!列出12項擇偶條件!強調:每個條件都需要滿足
內地知名女創業家公開徵友!列出12項擇偶條件!強調:每個條件都需要滿足
3 days ago
老公陪產興奮影BB出世 不慎影埋老婆私密處 奶奶傳上家庭gp
老公陪產興奮影BB出世 不慎影埋老婆私密處 奶奶傳上家庭gp
3 days ago
盤點男女穿搭地雷區大不同,網民話最緊要揀啱自己、著得舒服!
盤點男女穿搭地雷區大不同,網民話最緊要揀啱自己、著得舒服!
3 days ago
Hottest Articles
最熱文章
27歲男為迎娶47歲網戀新歡堅持與22歲妻子離婚!母子戀修成正果
27歲男為迎娶47歲網戀新歡堅持與22歲妻子離婚!母子戀修成正果
2 days ago
內地知名女創業家公開徵友!列出12項擇偶條件!強調:每個條件都需要滿足
內地知名女創業家公開徵友!列出12項擇偶條件!強調:每個條件都需要滿足
3 days ago
港男分享於英國工作感受!列出4大優點 25日AL/準時收工!網民認為:視乎咩工種
港男分享於英國工作感受!列出4大優點 25日AL/準時收工!網民認為:視乎咩工種
3 days ago
【迷你兵團2】13個關於Minions冷知識!最初原型係半獸人/全部都係男仔/香蕉語言大解析!
【迷你兵團2】13個關於Minions冷知識!最初原型係半獸人/全部都係男仔/香蕉語言大解析!
2 days ago