袁偉豪罕有地於慈善活動載歌載舞,老婆張寶兒化身小粉絲激讚!大晒丈夫年輕時照片,狂讚靚仔有型!

袁偉豪罕有地於慈善活動載歌載舞,老婆張寶兒化身小粉絲激讚!大晒丈夫年輕時照片,狂讚靚仔有型!

娛樂新聞
By Stephanie on 31 May 2022
Digital Content Writer

袁偉豪張寶兒於2020年結婚,二人亦不時於IG上大晒恩愛。最近,袁偉豪與男團Super Tiger於《萬眾同心公益金》表演唱歌跳舞;而作為妻子嘅張寶兒就化身做小粉絲,大讚老公能歌善舞;仲大晒老公年輕時做模特兒嘅照片,狂讚靚仔!

袁偉豪與Super Tiger一齊表演,獲老婆張寶兒大力支持!Photo from 《萬眾同心公益金》

袁偉豪 張寶兒婚後依然好恩愛!

現年41歲嘅袁偉豪喺2020年與張寶兒結婚,仲因此被冠上「千億駙馬」嘅稱號。但兩夫婦懶理外界傳言,感情依然十分甜蜜,成日都會喺社交媒體上大晒恩愛~

張寶兒同袁偉豪於2020年結婚!Photo from 張寶兒IG

二人婚後都成日晒恩愛!Photo from 張寶兒IG

袁偉豪聯同Super Tiger一齊表演!

上個星期六(28日),袁偉豪獲邀於《萬眾同心公益金》獨自表演唱歌,隨後再同男團Super Tiger一齊大晒舞技表演《這個冬天不太冷》以及《頭髮亂了》,向歌神張學友致敬!不過唔少網民都表示舞蹈十分尷尬「8個男人喺度跳緊80年代健康舞」、「為我提供咗歡樂」等;亦有人表示袁偉豪嘅唱功尚可接受,作為演員而言算係唔錯~

袁偉豪率先獨唱《祝福》!Photo from 《萬眾同心公益金》

而佢仲同Super Tiger連跳2首歌!Photo from 《萬眾同心公益金》

大部分網民都表示舞蹈表演真係非常尷尬!Photo from TVB YouTube

老婆化身小粉絲於電視前觀看直播!

正所謂「情人眼裡出西施」,雖然大部分網民都對舞蹈表演有意見,但作為太太嘅張寶兒當然100%支持老公啦!佢喺電視前面緊守節目直播大讚「唔錯唔錯!有d料到」,無意中透露原來袁偉豪嘅服裝係由佢所準備嘅;仲興奮咁話「袁太$1,000」,行動上都好支持老公~

張寶兒守住電視睇袁偉豪嘅表演直播!Photo from 張寶兒IG

大讚老公唱歌跳舞都好厲害~Photo from 張寶兒IG

原來表演服裝都係佢準備~Photo from 張寶兒IG

大晒丈夫模特兒時期照片,狂讚有型!

兩夫妻今年即將踏入結婚2週年,二人感情一直都有增無減,而張寶兒仲似乎化身做袁偉豪嘅「小粉絲」一樣~早前,佢喺IG大晒袁偉豪年輕時擔任模特兒嘅照片,只見當年嘅袁偉豪神情害羞又青澀,而張寶兒就忍唔住瘋狂大讚好靚仔!

張寶兒大晒袁偉豪年輕時擔任模特兒嘅照片。Photo from 張寶兒IG

忍唔住不停大讚老公靚仔,變身做小粉絲!Photo from 張寶兒IG

二人已經準備好做父母?!

而袁偉豪最近接受媒體訪問時,自爆婚後變得更加宅「連揸電單車出去都少咗」,仲話以前嘅自己比較強勢,但現時就甘願遷就太太做「小男人」,又難怪張寶兒咁愛佢嘅~而佢亦透露二人對「生B」計劃抱持順其自然嘅諗法,但就直言已經隨時準備好做爸爸!

袁偉豪最近受訪時表示,婚後變得更加鍾意留喺屋企!Photo from 張寶兒IG

袁偉豪話自己隨時準備做爸爸,但直到妻子正值事業上升期,所以抱持順其自然嘅心態!Photo from 張寶兒IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

廣告
廣告

更多相關文章

袁偉豪唔介意在太太面前做弱者 曾自覺娛樂圈不再需要自己「啲人以為我嫁咗俾張寶兒就唔使做」!

10 Mar , 2022

林盛斌(Bob)主持嘅訪談節目《人夫放假約出去滾》在最新一集中請來袁偉豪做嘉賓,二人一邊打邊爐,一邊大談事業與感情世界。袁偉豪直言與太太張寶兒一直面對好多困難和閒言閒語,但兩人性格互補、能互相支持,佢更表示在太太面前做一個弱者都不尷尬!

由林盛斌(Bob)主持嘅J2節目《人夫放假約出去滾》請了袁偉豪擔任嘉賓。Photo from 《人夫放假約出去滾》TVB

袁偉豪初入TVB不愛交際

袁偉豪奪得「2007年度香港先生選舉」冠軍後正式加入TVB,但因為不愛交際又安靜,所以甚少出席圈中人飯局,寧願享受me time,「其實啲人我唔熟,我都唔知有咩可以破冰,初到貴境嘅時間,冇嘢可以做,不如淨係做好自己,不如返屋企瞓。」

袁偉豪性格安靜不愛social,要頻繁出席飯局嘅話倒不如返家睡覺。Photo from 袁偉豪 IG

袁偉豪被張寶兒讚似鬼佬冧爆?!

袁偉豪表示太太張寶兒性格較為活潑和外向,同自己一凹一凸。偉豪提及二人係由到非洲拍攝節目時開始了解對方,在一次轉機途中,袁偉豪如常在每天朝早喝咖啡,寶兒見到就話:「你都幾鬼佬喎!」偉豪直言呢句話令佢覺得對方欣賞自己,亦係由呢句說話開始,大家開始互相試探。

寶兒見到袁偉豪早上有飲咖啡習慣,就表示對方似鬼佬。Photo from 《人夫放假約出去滾》TVB

袁偉豪因此認為寶兒好欣賞自己。Photo from 《人夫放假約出去滾》TVB

袁偉豪一句話令場面尷尬?

自此,二人便開始進行了解,「傾吓人生,傾吓你鍾意聽咩歌,傾吓你會唔會想快手結婚,你點睇啊?」不過,偉豪說出一句話令氣氛瞬間變得尷尬,「講講吓,咁如果你做我背後嘅女人咁會點啊?佢冇答我。」

袁偉豪自爆曾在認識初期,問寶兒點睇做佢背後的女人,結果令氣氛尷尬。Photo from 《人夫放假約出去滾》TVB

袁偉豪大讚張寶兒好識照顧自己

二人回港後再認識對方,隨後開始交往,袁偉豪直言寶兒好照顧到自己,「佢好照顧到我,佢好take care到我屋企嘅嘢,咁我覺得呢個係幾好嘅女仔。」至於為何決定結婚,佢坦言係唔想再重複發生前一段關係嘅嘢,「上一段感情本身想低調,但係因為記者朋友,或者某啲人報咗料,你都唔知點對策,喺事業上升期嘅時候,只能夠話我哋係好朋友。」到事業穩定時認拍拖,其他人又會作出比較,「好喇我認拍拖,甚至介紹:『呢個係我太太』,啲人就會比較,話我嗰時唔係咁講,明明上一個就好低調,而家呢個就曬恩愛。」佢無奈表示:「大佬唔關我事架,係你哋想我點?」而偉豪所提嘅上一段戀情,大有機會係佢同岑杏賢嘅一段情。

袁偉豪認為寶兒好懂得照顧別人。Photo from 張寶兒 IG

曾有感演藝圈不再需要自己

袁偉豪又指,佢同寶兒宣佈結婚後聽到好多唔好嘅說話,「甚至乎我覺得呢一行好似唔係好需要我,因為啲人覺得係我已經同一個屋企幾好環境嘅女仔結咗婚,我就唔使做。」但二人都互相扶持,偉豪亦讚寶兒有邏輯、好理性,好慶幸自己能夠搵到一個在心靈上可依靠嘅人,「我可以喺佢面前做一個弱者。」佢又指同太太相處舒適,「其實做一個弱者,聽老婆話,有乜咁難啫?幾開心,幾舒服。」同時,佢認為女性做決定某程度上比男性高一籌。

袁偉豪婚後曾認為外界不再需要自己在圈中工作。Photo from 《人夫放假約出去滾》TVB

與太太互相扶持

張寶兒現時除了幕前工作,亦有參與一些幕後形象指導工作,但其實寶兒都曾疑問公司會唔會仲有位置畀到自己,偉豪解釋:「好多人都覺得佢嫁咗啦!正如好多人都話我都嫁咗畀張寶兒,使乜做啫?」正係呢啲難關,令夫婦二人互相慰藉,關係更鞏固。

袁偉豪與太太張寶兒一起經歷好多難關,過程中互相支持。Photo from 袁偉豪 IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel