劉小慧直播晒「驅狗器」惹爭議發道歉文卻火上加油？網民斥誤導大眾

生活熱話娛樂新聞

By Cheryl on 05 Jun 2022

Digital Editor

前藝人劉小慧近年已轉型做KOL，日前佢同老公蘇志威開直播放狗時，曬出一件趕唐狗專用嘅「驅狗神器」，被大批網民聲討後，小慧發文解釋背後原因，不過網民都唔太收貨，繼續留言反駁對方！

Photo from 劉小慧 FB

劉小慧直播放狗曬神器

50歲劉小慧與草蜢成員結婚後淡出娛樂圈，並育有兩名女兒，一家人同三隻貓狗同住一間價值千萬嘅飛鵝山獨立屋，生活相當愜意。

Photo from 劉小慧 FB

日前，劉小慧同老公放狗狗Scooby時開直播，並向觀眾分享三件神器，分別係用來冷靜Scooby嘅「皮鞭」、處理排泄物嘅「執便便神器」、以及「超聲波驅狗神器」。

Photo from 劉小慧 FB

被網民質疑歧視唐狗

小慧在直播表示Scooby太唔冷靜，有機會在行山時被唐狗騷擾，由於深怕愛犬受傷，小慧在淘寶購入一部驅狗神器，又強調對唐狗特別有用，名種狗則免疫，「一撳部機，唐狗即刻雞飛狗走」。佢更即場示範，對著兩隻名種犬播放頻率，可見兩犬都只有輕微反應。

Photo from 劉小慧 FB

直播一出，大批網民不滿小慧將狗分成等級，直指佢歧視唐狗，並非真正愛犬之人，「你只係想養名種狗攞威但唔係鐘意狗，你自己管唔掂自己嘅狗就去傷害其他狗，你都幾不知所謂。」不過，都有人認為網民太嚴厲，表示呻器只有驅嚇作用，不會對狗隻造成生理傷害。

Photo from 劉小慧 IG

Photo from 劉小慧 FB

澄清文火上加油？

事件引來熱議後，劉小慧在FB留言區發文，為直播引起巨大迴響致歉。佢解釋，以往愛貓曾被犬隻咬到身亡，所以對過分熱情嘅狗狗感到恐懼，又澄清無歧視個別品種，只會在最後關頭才動用驅狗器，「一般帶小寵物岀街時，我都會帶備驅狗器，我不是因為什麼狗種或流浪與否而去用，只會在生命受到威脅時才會用。」

Photo from 劉小慧 FB

不過，小慧回應卻火上加油，網民繼續留言狠批佢誤導公眾：「個個睇完你個post，唔鍾意唐狗嘅人走去買呢一舊嘢嘅時候，你知唔知影響係幾大？」，又指佢論點不合理：「你講你因為貓貓被咬而對狗感到恐懼，咁請問Scooby係咩『物種』嚟？」、「正如Scooby對其他狗激動，你諗到嘅唔係教好隻狗而係軀趕其他狗？」可見，雖然小慧已趕緊作出道歉，但其解釋未能平息網民怒火。