大埔友叫樓下餐廳外賣慘變自取，外賣員嫌近又嫌攰，網民一面倒支持投訴

By Moon Lam on 13 Jun 2022

Digital Content Writer

安坐家中就可以享用環球美食一向都係外賣App嘅口號，有時唔想行就叫外賣真係好方便！不過叫外賣真係頻頻出意外，有人就係網上分享遇到奇怪外送員，搞到叫外賣仲衰過自取？

Photo from 《福秀回来了》劇照

有網民係Facebook群組「大埔 TAI PO」發帖，內文只有一張圖片，但短短幾個鐘已經引起大量網友討論。樓主係留言回應指自己住係大埔寶湖花園，因「唔想行」就透過外賣平台係樓下嘅日式餐廳落單，但過咗好耐都未收到外賣，就打開外賣App，發現「步兵」外賣員原來一早留咗幾條訊息！

Photo from Facebook 「大埔 TAI PO」

外賣員抱怨樓主「這麼近的距離不會自己去買？」，要佢係其他地方跑過來取餐送餐全身大汗，而最令人意外嘅係，外賣員並無按樓主提供嘅地址送餐上門，而係將外賣掛係街上嘅共享單車上，「不要話我沒有良心，外掛在富盈門旁邊的共享單車，自己來取」，樓主見到後都呆咗，只能回覆一個「下？」字。

Photo from 《金宵大廈2》劇照

樓主回應網友話無前提，只係見咁耐未有得食就見到訊息，網友就再提問咁樓主最後有無拎到外賣，樓主就話有去到拎外賣，事後先再向外賣平台投訴。有網民仲整理路程，步兵要經過林村河行大約10分鐘去餐廳取餐，而餐廳就係樓主屋企樓下，但係外賣員就將外賣掛係一條街外嘅共享單車上，最後樓主叫外賣仲要行得遠過自己落樓買！

Photo from 小編製地圖

唔少網友都認同「真係奇聞」，更指外賣員「佢明唔明自己做緊咩工作？」、「運費嘅意義，唔係就係包運送咩」、「唔知以為佢無收錢」，支持樓主要向外賣平台投訴該員工。不過有網民就自稱做過外賣員，指外賣員需要四處走，又要日曬雨淋，大家應多體諒，惟即被反駁「做外賣係個人選擇，尊重其職業唔等於要接受擅離職守！」亦有網民話樓主落樓下都懶，但都即被反駁近唔近都好，有時就係唔想出街，或者忙緊行唔開所以先叫外賣。