《一拳超人》真人版選角再掀話題,盤點8個熱門人選,香港網民集氣推薦戴耀明

《一拳超人》真人版選角再掀話題,盤點8個熱門人選,香港網民集氣推薦戴耀明

生活熱話
By Moon Lam on 21 Jun 2022
Digital Content Writer

日本人氣動漫《一拳超人》(One Punch Man)全球銷量超過3000萬本,2015年進軍美國,打入《紐約時報》暢銷書榜單,早係2020年原作者已經指荷里活片商買版權會改編成真人版電影,但因為疫情關係一直拖到依家,最近終於傳出新消息會由Sony Pictures操刀製作,有傳會由《狂野時速》導演Justin Lin執導,而主角埼玉老師嘅人選自然成為討論話題!

Muse木棉花-HK Youtube截圖Photo from Muse木棉花-HK Youtube截圖

近年超級英雄題材大熱,《一拳超人》亦憑住破格人設同題材大受歡迎,故事講述主角埼玉係步入社會後陷入失業嘅頹廢狀態,但因為一次戰鬥搵返細個想成為英雄嘅志向,苦練三年以甩哂頭髮為代價,終於成為毫無弱點嘅英雄,用一拳就可以打敗敵人!然後就同弟子傑諾斯加入英雄協會,開始咗同眾多英雄對抗唔同怪物嘅生活。《一拳超人》仲曾經係2015同2019年推出兩季動畫。

作畫監督再次分享原作者證實拍真人版電影嘅消息Photo from Twitter @kubo_chika

主角埼玉老師為咗變強而光頭當然係角色最大特徵,唔少網民係討論選角時都聯想到演過光頭角色嘅演員!

一拳超人:最強之男 FacebookPhoto from 一拳超人:最強之男 Facebook

1. 狄維·莊遜(The Rock)

外國呼聲最大嘅就係The Rock(巨石強森),佢係美國前職業摔角手,投身影壇多年,又有同埼玉一樣嘅光頭造型,加上本身嘅氣勢,的確有「一拳制敵」嘅感覺,而且佢亦曾經拍攝《狂野時速》,同導演曾經合作過,再次合作機會更加大,難怪外國影迷都期待佢飾演嘅埼玉!不過忠於原著黎講佢嘅身型實在太健碩,加上膚色比較黑,同埼玉係動畫嘅形象似乎有啲落差。

初初公布消息已經大量外國網友估會係The Rock飾演埼玉,仲特登p埋圖呀Photo from Reddit

有網民就認為佢更加適合「性感囚犯」呢個角色。

圖右邊是「性感囚犯」Photo from Muse木棉花-HK Youtube截圖

2. 雲·迪素(Vin Diesel)

同樣係《狂野時速》系列嘅重點演員,亦有常駐光頭造型,打鬥演出自然難唔到佢,不過佢嘅聲線比較低沉,而且同The rock一樣,身型比較大隻,似乎都唔太似埼玉。

RedditPhoto from Reddit

3. 泰達·史雲頓(Tilda Swinton)

曾經係《奇異博士》飾演至尊法師古一,唔少電影嘅真人版改編都會將角色性別改變,就好似古一呢個角色原著都係以男性形態登場多,後來電影就用女性演員。雖然古一大師嘅光頭造型真係好型,但就感覺同埼玉氣場唔太似。

古一當時就有最強近戰法師之稱!Photo from 《奇異博士》截圖

網友仲整左張古一法師mix埼玉嘅memes圖,果然要勁就要付出頭髮做代價!

網民整嘅memes圖Photo from Reddit

4. 喬許·布洛林(Josh Brolin)

就咁睇名可能唔知佢係邊個,但講到《Avengers》入面嘅Thanos就一定知!外國網民搞笑咁話除咗角色一樣係光頭,呢兩個角色似乎都係用一隻手已經可以毀天滅地?

Thanos變咗埼玉個樣就變得好搞笑完全唔嚴肅~Photo from BossLogic Facebook

5. 萊恩·雷諾斯(Ryan Reynolds)

曾飾演《Deadpool》嘅佢其實都剃過光頭,外形黎講同埼玉都有幾分相似,加上deadpool無厘頭嘅形象,似乎比上述幾位人選更貼近埼玉,面相亦更加有25歲禿頭披風俠嘅活力感!不過亦有網友覺得身高188cm嘅佢會令埼玉太突出!

廣告
廣告

網友自己整嘅示意圖,感覺似乎唔差!Photo from Twitter @3hokagespodcast

6. 詹姆斯·麥艾維(James McAvoy)

有睇《變種特攻》系列就會知佢曾經做過年輕版X教授,係《思·裂》同《異能仨》入面更加可以見到佢比想像中精壯,演技亦非常出色,加上身型、膚色都同埼玉相當接近,非常適合演無咩感情嘅埼玉,相信對於忠於原著嘅粉絲黎講會係唔錯嘅人選!

Twitter @grtdredPhoto from Twitter @grtdred

7. 彭于晏(Eddie Peng)

華人演員方面彭于晏係唔少網民嘅心水之選,不過型男就算剃光頭都一樣咁靚仔,但投反對票嘅網民就話彭于晏實在太靚仔啦!作者筆下嘅埼玉除咗光頭同吊眼之外,外貌其實非常普通,有時仲顯得有啲頹廢,相信彭于晏比較適合認真時畫風唔同咗嘅埼玉!

微博圖片Photo from 微博圖片

8. 戴耀明(Sunny Dia)

要講最似原著角色嘅人選,當然係香港代表戴耀明!《一拳超人》曾經出過官方版手機遊戲,當時就係邀請戴耀明cosplay埼玉,無論係頭型、身型、面型同神情都同本尊一模一樣!雖然係荷里活電影,不過網民都話想集氣推到Sony Pictures見到戴耀明,希望佢可以一炮而紅呀!

戴耀明 FacebookPhoto from 戴耀明 Facebook

戴耀明 FacebookPhoto from 戴耀明 Facebook

佢仲影過唔少埼玉係動畫入面嘅日常情節,網民都話佢根本唔洗扮埼玉,佢就係埼玉本人!

《一拳超人》第二季Photo from 《一拳超人》第二季

戴耀明 FacebookPhoto from 戴耀明 Facebook

Muse木棉花-HK Youtube截圖Photo from Muse木棉花-HK Youtube截圖

戴耀明 FacebookPhoto from 戴耀明 Facebook

戴耀明 FacebookPhoto from 戴耀明 Facebook

戴耀明 FacebookPhoto from 戴耀明 Facebook

不過除咗主角埼玉,網民仲更加期待超能力姐妹龍捲同吹雪由邊個出演!真係好想快啲公布選角呀!

一拳超人:最強之男 FacebookPhoto from 一拳超人:最強之男 Facebook

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel