download HolidaySmart 假期日常 app
台灣「億元男」再出post徵女旅伴!將會支付所有旅遊費用,只需達成3個條件!眼利網民發現超大bug位?

台灣「億元男」再出post徵女旅伴!將會支付所有旅遊費用,只需達成3個條件!眼利網民發現超大bug位?

生活熱話
By Stephanie on 30 Jun 2022
Digital Content Writer

現時唔少單身人士都選擇喺網上認識另一半,部份心急嘅人仲可能會直接寫明徵女/男友~早於今年4月,一位41歲台灣單身漢喺Facebook群組公開徵求老婆,仲因此而上埋當地新聞接受訪問,原來佢嘅感情事有後續,事後曾與一名女子成功交往!最近佢又再公開徵求女旅伴,而佢今次開出嘅條件亦同樣特別。

台灣男子繼早前公開徵老婆後,再次出post招女旅伴?!Photo from TVBS NEWS @ YouTube

41歲黃金單身漢今年4月徵老婆

今年4月,一名41歲嘅台灣伍姓男子於Facebook公開徵老婆,自稱擁有3間房屋、2塊地,完全冇不良嗜好;而佢列出咗3個擇偶條件:分別係年齡35歲以下、BMI正常以及有正當工作,歡迎「有心人」私訊佢。

台灣單身漢聲稱成功交往就會送iPhone13!Photo from 爆廢公社FB

男子列出3個擇偶條件Photo from TVBS NEWS @ YouTube

直言「交往送iPhone 13,結婚送樓」

當時男子仲開出非常「吸引」嘅條件,揚言「成功交往就會送iPhone13,結婚生子後願意送北海道嘅房子」,瞬間引起網民熱議,仲令佢上咗台灣新聞;網民推測佢嘅經濟環境唔錯,仲稱佢為「屏東億元男」!而佢亦透露出post後已經獲得8位女生嘅聯絡,將會進一步同佢哋交談了解佢哋。

後來佢再「加碼」,表示成功結婚就會送位於北海道嘅房子!Photo from 爆廢公社FB

男子仲接受台灣電視台訪問,解釋網上徵友嘅原因Photo from TVBS NEWS @ YouTube

成功與一名女子交往,但對方最終卻「消失」?!

原來男子尋覓伴侶嘅故事有後續!據悉,佢深入了解後與一名黃姓女子發展成情侶關係,而佢亦遵守承諾送對方最新嘅iPhone 13。但對方喺同佢第3次約會時提出要金戒指作為禮物,但遭到拒絕,後來就「人間蒸發」,令佢驚覺可能被騙決定報案處理。

伍姓男子後來成功與一名外型亮麗嘅女生交往,但對方攞完iPhone禮物就唔見咗?!Photo from 爆廢公社公開版FB

再出post公開徵求女旅伴!

最近,男子又再一次喺Facebook公開群組「爆廢公社」出post徵求女旅伴,挑選條件同上次所講嘅擇偶條件差唔多。而佢就表示計劃同該旅伴喺7月到訪泰國普吉島玩5日,將會分房瞓,而且所有費用都係由佢支付;最後仲附上一句「玩出感情我負責」!睇嚟佢已經忘記早前被女生「騙財」嘅經歷喇~

最近,男子再次喺FB群組公開徵求女旅伴,想搵人陪佢去泰國!Photo from 爆廢公社公開版FB

不過男子最終附上一句「玩出感情我負責」,令網民嚇咗一跳!Photo from 《流星》劇照

瞬間獲得大量網民關注!

呢個post一出,只係短短一日就已經過千網民留言「不徵男的試試嗎?」、「那回來會被你告嗎?」、「幹嘛不組團勒!」等,部份網民就大讚男子尋覓伴侶嘅堅定意志,欣賞佢夠直接!

呢個post好快就再次引起網民熱議,而網民都已經認得佢~Photo from 爆廢公社公開版FB

有網民幽默提議佢應該開招埋男旅伴,咁樣先能夠增加報名人數!Photo from 《大叔的愛》

眼利網民發現有bug位?!

不過部份網民好快就搵到旅伴要求嘅重大Bug位,因為男子所列出嘅3個條件中並冇寫明要女方係單身「孕婦可以報名嗎?」、「可以自帶老公伴遊嗎」等;有網民仲提出「可以分房睡、分行程嗎?」,非常爆笑~

眼利網民發現男子開開條件有bug!Photo from 爆廢公社公開版FB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

41歲單身男網上公開徵友,自稱坐擁3個物業!列出4大擇偶條件!成功交往將會送贈iPhone13?!

11 Apr , 2022

疫情之下,單身人士都比較難認識到新對象,大多選擇網上交友。日前,來自台灣嘅單身男於FB群組中公開搵老婆,列出擇偶條件,並且大晒住宅嘅照片,希望吸引到心儀對象~而且佢仲強調結婚生子後,願意送iPhone加房屋作為禮物?!

41歲單身男子網上搵老婆,仲話結婚後願意送物業俾對方?!Photo from TVBS NEWS @ YouTube

# 41歲單身男公開尋找伴侶!

近日,居住於台灣嘅41歲伍姓男子於FB群組「爆廢公社」出post徵老婆:自稱擁有3間房屋、2塊地,居住於屏東區附近,上載咗自家住宅嘅照片。佢平時嘅興趣係去旅行,並且擁有良好生活習慣「不煙小酌不檳榔」。若果成功交往,就會送對方iPhone13!

男子非常直接於FB群組講述擇偶條件,再附上自己住宅照片!Photo from FB群組「爆廢公社」

佢就大晒現時居住緊嘅3千呎住宅~Photo from TVBS NEWS @ YouTube

# 列出3大條件!

伍先生就列出3個擇偶條件,分別係年齡35歲以下、BMI正常以及有正當工作,歡迎有意者私訊。後來,佢又再出post指結婚生子後,願意送對方位於北海道嘅房子,引起網民熱議!

後來,佢又再表示結婚生子後會將北海道嘅房子送俾另一半!Photo from FB群組「爆廢公社」

# 接受台灣媒體訪問!

有台灣媒體成功尋找到伍先生,而佢亦大方接受訪問,解釋公開徵友原因「單身2年多,因為疫情一直沒有辦法相親聯誼。」唔少網民都認為佢嘅住宅照片為虛構,佢澄清所有照片都係真實嘅;而且表示自己嘅職業就係業主,只係靠收租就能夠每個月獲得10萬台幣(約2萬7港幣)!

伍先生接受台灣電視台嘅訪問,解釋公開徵友原因!Photo from TVBS NEWS @ YouTube

伍先生表示自己主要靠收租,每個月至少都有2萬7港幣!Photo from TVBS NEWS @ YouTube

# 愛環遊世界,於北海道有物業!

根據媒體引述,伍先生身高大約1.67米,體重68公斤,曾到訪38個國家!佢已經於北海道置業,單位正在出租,主要目的係將房子留俾小朋友,當作渡假小屋,睇嚟對未來非常有計畫~

就連台灣電視台都幫佢徵友~Photo from TVBS NEWS @ YouTube

# 已經收到8位女生嘅私訊!

而伍先生感情經歷都十分豐富,曾交往過7位女友。對上一次拍拖係3年前居住於上海時認識嘅,女方係一位生意人;但疫情爆發令佢搬回台灣,最終二人因為聚少離多而分開。另外,佢喺受訪時再加多一個條件,希望伴侶學歷能夠達到大學畢業!據悉,現時已經有8位女仔聯絡佢,其中一位來自台中嘅女生已經相約好見面,希望佢能夠儘快搵到另一半啦~

其後,佢再表示希望未來伴侶有大學畢業Photo from TVBS NEWS @ YouTube

# 網民反應熱烈!

事件引起台灣網民熱議~不過唔少網民都認為伍先生嘅做法唔係太好,認為利用自己嘅財產作為「賣點」,只會吸引到比較拜金嘅女生,難以尋覓到真愛!

大部分網民都擔心伍先生可能只吸引到比較拜金嘅女仔!Photo from 韓劇《繼承者們》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel