「連登女神」Serco被前員工爆料N宗罪！拖糧唔供MPF？當貓打卡工具

By Jennifer on 05 Jul 2022

Digital Editor

近日連登討論區有網民開post「連登女神serco有花生」，原來係Serco經營嘅網店Serco Store前員工喺網上爆料「真面目」，指佢拖糧、唔供MPF、OT唔補錢、喺馬路影相等，事件喺連登引起熱議，更開咗7個post跟進事件！而Serco亦喺個人IG對前員工提出嘅數宗罪逐一回應。

Photo from Serco IG

1. 當店舖所養嘅貓係打卡工具、唔裝窗網

Serco嘅Studio有養貓貓，不過前員工就指啲貓只係打卡用，佢稱貓房衛生情況好差，好多時貓貓都滿身排泄物要由員工清理，身為主人嘅Serco幫手清潔嘅情況少之又少，前員工又指貓貓多年嚟都無沖過涼，到後尾覺得貓房味道難聞，仲滋生唔少昆蟲，有蚤等，令佢除非值日否則都唔再入去。

Photo from Serco IG

前員工表示Studio 7,000幾呎嘅地方都無裝窗網，曾經有貓貓逃出貓房走咗去開窗嘅地方，十分危險。Serco喺IG回應指自己絕對無當貓貓係打卡工具，佢為醫治其中一隻患病嘅貓貓不惜花3個月時間，每日有近20個鐘留喺Studio陪伴貓貓、醫療開支亦超過6位數（10萬以上），幾乎花光佢嘅積蓄。

Photo from LIHKG

Photo from Serco IG

佢又反駁指貓貓因為患病睇唔到嘢先會搞到滿身排泄物，而佢一見到就會主動清理，絕對唔係袖手旁觀，佢亦問過醫生意見指貓唔一定要沖涼，之前因為患病所以無帶佢沖涼，依家貓貓康復就一直都好乾淨，Serco稱貓貓從來都無蚤，有昆蟲可能係貓砂嘅緣故，佢已即時處理。

Photo from Serco IG

至於窗網，Serco表示貓房長期開恆溫冷氣同空氣清新機，而Studio 9成窗都係閂埋，貓貓去到嘅地方都係無開窗，貓房因為唔開窗所以就無安裝窗網，但佢稱呢件事係佢唔啱，佢指大半年前已將貓貓帶回家並裝咗窗鎖。

Photo from Serco IG

2. 凌晨炒人

前員工指Serco曾凌晨炒人令有關同事無法交接工作，前員工又晒出「員工通告」指對方「屈」人刪走公司硬碟嘅檔案，但佢稱自己被炒一刻已login唔到，根本無可能刪除到公司嘅file。不過Serco就指佢有證明某同事被解雇後用個人gmail刪除檔案內容。

Photo from Serco IG

Photo from LIHKG

3. 喺馬路違規影相，P走雙黃線

Serco店舖嘅model照背景因為喺單車徑入面，被質疑影響其他人，事後Serco都有道歉，但卻被踢爆佢之後仍有喺馬路影相，更P走雙黃線，避免再被斥影響道路安全。Serco承認拍攝時曾短暫停留喺雙黃線內，表示願意承擔法律責任。

Photo from LIHKG

Photo from Serco IG

Photo from Serco Store IG

4. 呃學歷唔夠嘅人幫手洗廁所

前員工稱Serco想請個妹妹做清潔，指「總有人因為學歷問題入唔到嚟做，又好想加入Serco Store就可以做清潔」，男店主仲指：「講出嚟唔太好聽嘅，可能改過個好聽嘅名」，前員工指title可能係「Studio assistant」，Serco解釋指入職前已講清楚職務，所以唔存在呃，而且現時嘅Studio assistant工作內容亦唔包括洗廁所，佢指洗廁所只發生過一次，當時搬新Studio，幾位同事幫手清潔，事後佢已承諾所有同事都唔使洗廁所。