港男嬲女友瞞住自己打針瘦臉,質疑對方其他部位真唔真,網民反應兩極

港男嬲女友瞞住自己打針瘦臉,質疑對方其他部位真唔真,網民反應兩極

生活熱話
By Moon Lam on 13 Jul 2022
Digital Content Writer

現時不少人會選擇修復期短嘅微整形去令自己變得更加美,有網民就發文表示女朋友最近成日搵藉口唔見自己,直至日前見面先發現女朋友個樣有啲唔同咗,竟然係瞞住自己打針瘦面,令佢大感不滿!

《醜女大翻身》劇照Photo from 《醜女大翻身》劇照

網民係討論區以「接唔接受到女朋友/老婆瞞住你去整容?」為題,表示自己女朋友最近好古怪,約出街又話攰,約食飯又話要減肥,用唔同嘅理由拒絕約會,平時明明一定要事主星期六日陪下佢,所以就以為女朋友好攰唔舒服。後來終於約到女朋友食晚飯,一除口罩就覺得女朋友個樣有啲唔同咗,而女朋友仲照鏡問事主有無靚咗,咁事主就老實講覺得女朋友個樣唔自然好假,然後先知原來女朋友唔肯出街係因為同朋友去打針瘦面!

《美女的誕生》劇照Photo from 《美女的誕生》劇照

事主覺得女朋友本身已經好靚又唔肥,只係有啲包包面,覺得無必要醫學美容,仲要價錢唔平,更表示只係為咗瘦面而打啲嘢入身體就唔得,要瘦有好多方法,未到30歲就去打針,點可以次次都用呢啲不勞而獲嘅手段。直言女友依家狀態係「皮笑肉不笑,諗起都恐怖」,仲認為女友打完一次點會唔繼續打,言詞間非常怕女友會「整上癮」,而重點係仲要瞞住自己先斬後奏,令事主覺得女朋友唔老實,更質疑會唔會有其他部位都有整過!

《金大花的華麗冒險》 劇照Photo from 《金大花的華麗冒險》 劇照

文章引起網民討論,有人認為瘦面針唔屬於整容,稱「打針點算整容?過一段時間會還原」,又話微整形還可以接受,亦有人認為事主女朋友有身體自主權,稱「她有自由權,不滿可以分手」、「身體是自己的,有問題的應是樓主!」、「個人自由有乜好講, 唔通你覺得你女友是你財產嗎?」,仲有人話樓主應該關心女朋友搵嘅美容中心信唔信得過。

廣告
廣告

《整容日記》劇照Photo from 《整容日記》劇照

而另一方面就有唔少網友表示接受唔到,有網友就話接受唔到除咗箍牙之外嘅整容方式;而多數網民都係擔心另一半愈整愈膠,稱「好難接受人造人,真係好唔自然」,亦擔心會變成病態整容不能自拔,有人就建議樓主應該強硬啲同女朋友講唔接受,如果唔係成世人流流長有排打,害咗自己。亦有人表示唔接受,「唔想要個膠妻,但亦無得阻止,始終身體係對方嘅。」叫事主同女朋友講可接受底線,對方超越咗底線就應該分開。

《整容日記》劇照Photo from 《整容日記》劇照

不過就有人指出事主同女友發生爭執嘅重點並唔會整唔整容,而係女朋友無坦誠,「雖然佢有權利選擇整唔整,但喺拍拖期間瞞住你去做就唔應該,事前應先討論下以示尊重彼此嘅關係。」亦表示如果兩人打算過人世,但女朋友竟然唔事先坦誠,仲先斬後奏,係情侶相處嘅大忌。

《醜女大翻身》劇照Photo from 《醜女大翻身》劇照

Text: HolidaySmart Editorial (小編公告:如果讀者有任何關於美食、旅遊、玩樂、或者任何新奇有趣事物嘅資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel