download HolidaySmart 假期日常 app
金像獎2022|林家棟貼心攙扶謝賢領獎獲大讚!揭過往暖男事蹟:保護小朋友而受傷/照顧獨居前輩夏萍

金像獎2022|林家棟貼心攙扶謝賢領獎獲大讚!揭過往暖男事蹟:保護小朋友而受傷/照顧獨居前輩夏萍

電視電影 娛樂新聞
By Stephanie on 18 Jul 2022
Digital Content Writer

昨日(17日)《第40屆香港電影金像獎》已經完滿結束,其中林家棟貼心攙扶謝賢(四哥)上台攞獎嘅畫面,獲網民大讚係暖男!其實過往佢曾經默默地做過唔少窩心嘅事蹟,唔單止會照顧比較年長嘅演藝圈大前輩,亦提供不少機會提攜後輩,係圈中眾所周知嘅好前輩~

林家棟喺金像獎中悉心照顧謝賢嘅場面,獲網民大讚超暖男!Photo from 林家棟IG

林家棟貼心攙扶謝賢上台領獎!

《香港電影金像獎》已於昨日(17日)結束,謝賢(四哥)成功勇奪影帝殊榮獲得在場觀眾嘅熱烈鼓掌;而同樣有份角逐影帝嘅林家棟細心陪伴身體抱恙嘅四哥上台領獎。儘管四哥曾嘗試拉開口罩,但林家棟都立刻阻止並向大家解釋「醫生叮囑唔好除口罩」,令網民都忍唔住大讚超貼心!

喺謝賢獲得影帝嘅時候,坐喺身旁嘅林家棟在旁扶住對方,陪伴佢上台Photo from 《第40屆香港電影金像獎》

謝賢講感言期間,林家棟多次為對方拉上口罩,指醫生叮囑要戴口罩。Photo from 《第40屆香港電影金像獎》

二人憑電影《殺出個黃昏》而結緣

其實今次謝賢獲獎嘅電影《殺出個黃昏》,林家棟有份做監製及編劇。而林家棟曾提及四哥喺電影首度願意「除黑超」嘅原因,指佢同導演高子彬都親自搵四哥傾「其實佢(四哥)唔介意除眼鏡做戲,但因為佢唔熟我,驚我哋只係玩下當噱頭」,但最終成功用真心打動四哥。喺開拍期間,林家棟每次都會去四哥屋企接佢開工,相信二人都因為合作拍戲而變得感情深厚~

二人曾一起受訪,表示四哥願意除黑超,全因受林家棟真心打動Photo from 《東張西望》

喺拍攝電影期間,林家棟每次都親自去接載對方到片場,超細心!Photo from 《東張西望》

早前拍攝為保護小朋友而受傷

悉心照顧四哥嘅林家棟今次都係「帶傷上陣」,據悉喺本月12日拍攝電影《潛行》期間,佢拍攝「抱小朋友奔跑」嘅場面時不慎跌倒,由於當時拍攝場地地面凹凸不平,佢為咗保護小朋友而不惜用身體單側著地,仲一度傳出身體不能動彈嘅傳聞。而佢昨日受訪表示只係留院觀察咗幾日,傷勢看似嚴重,只係傷及氣門,所幸同行嘅小朋友並冇受傷,真係好有愛心!

林家棟本月12日驚傳喺拍攝電影《潛行》時受傷,為保護小演員不惜側身落地Photo from 林家棟IG

悉心照顧圈中前輩夏萍,視對方如媽媽

林家棟從影至今已經34年,曾先後與唔少圈中大前輩合作,悉心照顧前輩們之餘,就算拍完戲都會同佢哋保持聯絡。佢曾經係女演員夏萍嘅契仔, 夏萍與第二任丈夫離婚後甚少與兒女聯絡,並且長期獨居;林家棟經常探望對方,二人感情猶如親生母子。直到2019年8月5日夏萍因病去世,佢亦難掩傷痛落下男兒淚「依家等於少咗個親人」。

林家棟多年前同夏萍合作拍戲,其後仲做埋對方契仔,感情非常好!Photo from 《東張西望》

 

直到2019年夏萍因病離世,林家棟不忍落淚Photo from 《東張西望》

當時佢喺內地工作並趕回香港,陪伴契媽走過最後一程Photo from 《東張西望》

從影34年演藝事業困難重重

54歲嘅林家棟嘅演藝事業經歷重重波折,曾抱住嘗試嘅心態報考TVB藝人訓練班,歷經2年先成功考上,因此入行後佢特別珍惜每個演戲嘅機會,即使喺「茄喱啡」角色都十分認真對待。後來,佢曾感謝當年嘅伯樂萬梓良嘅提攜「令我獲得做舞台劇嘅機會,可以做男主角。」

林家棟入行至今34年,曾花2年事件考入TVB藝人訓練班Photo from 林家棟IG

即使當時飾演嘅角色大多數都係路人角色,但佢都態度認真!Photo from 《娛樂3兄弟 》

離巢後加入劉德華創立公司,被提議息影3年?

林家棟於大台默默工作長達13年,參演唔少電視劇,但事業發展一直都平平無奇。其後,佢決定加入劉德華所創立嘅公司「映藝集團」轉投電影圈發展。不過劉德華曾提議佢先暫時息影3年「錢我會照俾你,但唔好接戲住」;當時嘅林家棟十分不解,一度誤會被雪藏,但實際上劉德華察覺到對方因為飾演嘅角色都太過相似,反而導致演藝事業停滯不前,而佢最終亦接納息影嘅提議!

林家棟加入劉德華旗下公司12年,感謝對方一直給予機會,二人仲成為朋友!Photo from 《星級會客室》

2016年勇奪金像獎影帝!

喺2016年,林家棟憑電影《樹大招風》勇奪《第36屆香港電影金像獎》影帝殊榮,係佢首次入圍金像獎「最佳男主角」就成功奪獎,事業發展再創高峰!過往佢曾自嘲係「3無影帝」:冇女友、冇樓、冇片酬;入行至今甚少傳出緋聞,曾揚言擇偶條件係孝順,只要婚後肯同媽媽一齊住就得,真係好有孝心!

2016年,林家棟憑電影《樹大招風》獲得「最佳男主角」!Photo from 《第36屆香港電影金像獎》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

【港產片】《手捲煙》首條預告曝光!林家棟零片酬接拍 問鼎金馬影帝

16 Oct , 2020

由《歎息橋》演員陳健朗執導嘅香港電影《手捲煙》終於公開咗首條預告片啦!呢部電影逆市開拍,成為香港電影業界難得喺 2020 年開戲嘅一員,所以有唔少人都好期待可以盡快睇到呢部疫情下嘅電影!

Photo from Facebook @hand.rolled.cigarette

《手捲煙》講述回歸之後失去原本身份嘅華籍英軍關超(林家棟 飾)喺重慶大廈庇護一個被仇家追殺嘅南亞裔古惑仔文尼(Bipin Karma 飾)期間建立出兄弟情,後尾關超更加為咗救出兄弟而同黑社會硬碰硬。

新晉演員Bipin Karma飾演一名毒販,同林家棟有唔少對手戲Photo from Facebook @hand.rolled.cigarette

喺預告入面,關超有句對白好矚目:「唔講一,唔講三,講義!唔講風,唔講雨,講咩呀?」,而網民就推測佢係想講「雷」,因為「義氣」喺口語又可以稱為「雷氣」。

Photo from Facebook @hand.rolled.cigarette

雖然呢部電影係陳健朗首次導演嘅劇情長片,但電影成績驕人,唔單止係亞洲電影節嘅開幕電影同金馬影展嘅閉幕電影,仲喺今屆金馬獎獲得 7 項大獎提名,當中包括最佳劇情長片、最佳新導演、最佳男主角、最佳剪輯、最佳美術設計、最佳造型設計及最佳動作設計。

右:新晉導演陳健朗Photo from IG @kinlongchan

班底亦雲集咗唔少金像獎最佳男主角同配角,如林家棟、太保、白只、袁富華等。

白只Photo from Facebook @hand.rolled.cigarette

林家棟Photo from 《手捲煙》

而《叔・叔》入面 Sweet 到漏嘅太保同袁富華今次就反目變成死對頭,好期待佢哋嘅演出呀~

袁富華Photo from 《手捲煙》

太保Photo from 《手捲煙》

為咗支持新晉導演,影帝林家棟仲答應零片酬接拍電影,希望為電影行業出一分力。

Photo from Facebook @hand.rolled.cigarette

唔少網民睇完預告都覺得好正呀~

Photo from Facebook @hand.rolled.cigarette

《手捲煙》暫定喺2021年3月上映,大家到時記得入場支持呀!

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel