香港金曲頒獎典禮｜8大尷尬位重溫！網民再次質疑獎項認受性？！星夢娛樂歌手成為大贏家/超多《聲夢》學員出席！

By Stephanie on 25 Jul 2022

Digital Content Writer

由大台及港台合辦嘅第一屆《香港金曲頒獎典禮》已經於昨日（24日）完滿結束，全晚一共頒發咗十幾項大獎，部份項目仲分成金銀銅獎。然而，出席嘅歌手並唔算多，大部分都係大台出身嘅歌手藝人，令唔少網民都懷疑獎項嘅認受性？！

Photo from 《香港金曲頒獎典禮》

1. 過半獲獎歌手缺席頒獎禮

昨晚（24日），大台首次與港台合辦《香港金曲頒獎典禮》全晚一共頒發咗13個大獎，而部份項目再被分為金銀銅獎。獲獎嘅歌手人數眾多，不過有份出席嘅就好少，當中缺席嘅包括有正在為演唱會彩排中嘅MIRROR、AGA、衛蘭、MC張天賦等，當中華納嘅歌手一個都冇嚟！而有事先準備感謝詞嘅就只係得Supper Moment、葉巧琳以及被列為密切接觸者嘅張敬軒，現場氣氛似乎不及過往熱鬧。

Photo from 《香港金曲頒獎典禮》

2. 不停表演懷舊金曲

典禮一開始就率先由天王劉德華帶領一班新歌手，包括：炎明熹、姚焯菲、鍾柔美等，當中絕大部分都係《聲夢》嘅學員。其後表演嘅歌曲都以懷舊金曲為主：炎明熹獻唱鄧麗君《但願人長久》及譚詠麟《愛情陷阱》、馮允謙表演張學友《分手總要在雨天》等，令網民都不禁以為自己睇緊《懷舊金曲50年》嘅特備節目！

Photo from 《香港金曲頒獎典禮》

3. 連菊梓喬都悶到瞓著？！

而「香港金曲榮譽大獎」就由資深音樂人鮑比達獲得，而佢亦連同一班音樂人一齊即場表演。喺表演途中，鏡頭突然轉向觀賞中嘅歌手們，有眼利嘅網民發現一姐菊梓喬（Hana）閉上眼睛嘅畫面，疑似瞓著咗覺，瞬間成為熱話！

Photo from 《香港金曲頒獎典禮》

4. 頒獎俾自己人，場面尷尬？

雖然典禮上成功邀請到天王劉德華，但由於曾志偉過往表示希望是次頒獎禮可以好似《金像獎》一樣盛大，不過網民都覺得頒獎人嘅份量似乎唔太夠。其中大台推出嘅女團「After School」嘅Windy及Yumi負責頒發「香港金曲金曲獎」，而獲獎嘅就係同團嘅姚焯菲《原來談戀愛是這麼一回事》，就連Chantel都忍唔住嚇親！

Photo from 《香港金曲頒獎典禮》

5. 獎項認受性再惹爭議？

唔少網民都期望今次兩台合辦嘅頒獎典禮能夠提高公平性，然而今次嘅獎項依然係由「星夢」旗下歌手成為「大贏家」，一共有8名歌手獲獎；而餘下嘅就係環球娛樂嘅5位、華納音樂嘅4位、英皇4位、寰亞4位。而「最佳劇集歌曲獎」則有大台嘅電視劇攞晒，令大家十分驚訝。今年初曾於各大頒獎典禮中獲獎無數嘅林家謙，居然一個獎都攞唔到，亦令唔少網民開始質疑頒獎禮嘅認受性！

Photo from 《香港金曲頒獎典禮》

6.似炎明熹演唱會？！

昨日，炎明熹Gigi可以稱得上係「大忙人」，事關佢表演嘅項目眾多，從出場同劉德華一齊大合唱、表演2首懷舊金曲以及演唱自己嘅歌曲《真話的清高》，睇得出佢現時備受電視台力捧！唔少網民都忍唔住留言「以為係炎老師嘅演唱會！」、「表演咗好多次」等。

Photo from 《香港金曲頒獎典禮》

7. 曾比特勇奪新人金獎贏MC！

曾比特同MC張天賦過往曾多次「正面對決」，喺二人參加《全民造星2》時，MC最終獲得亞軍、而曾比特則獲得第8名。其後二人都各自正式出道，喺《2021年度叱咤樂壇流行榜頒獎典禮》，MC獲得新人金獎，曾比特獲得男新人銅獎。今次曾比特終於榮獲新人金獎，贏咗獲得亞軍嘅MC！雖然曾比特因為唔喺香港未能親身出席頒獎禮，不過佢就隔空表演～

Photo from 《香港金曲頒獎典禮》

8. 主持李志剛超尷尬場面！

早前姚焯菲（Chantel）因為被傳出拍拖嘅消息而受到熱議，而佢昨日就有份演唱自己嘅歌曲《原來談戀愛是這麼一回事》，未知係咪太耐冇公開露面，Chantel似乎都有少少緊張。而主持人之一嘅李之剛喺表演完後，就話「恭喜晒國民初戀！搞到我都想拍拖喇！」但由於現時唔少網民都會以「國民初戀」稱號暗串佢，而另一位主持迅速兜返拍一下李志剛「唔好再將你個人意願講出嚟啦」，令好多網民都覺得場面極尷尬！