乘風破浪3｜薛凱琪爆喊、自作多情惹內地網民反感：情商好低

娛樂新聞

By Jennifer on 25 Jul 2022

Digital Editor

內地綜藝《乘風破浪3》4位香港女星中阿Sa阿嬌人氣最高，而胡杏兒就已經被淘汰，薛凱琪雖然人氣不及Twins，但仍有望成團。不過日前一集佢嘅表現卻令內地網民大為不滿，認為佢唔遵守規則、情商低，更直言對佢無晒好感？！

Photo from 《乘風破浪3》

《乘風破浪3》薛凱琪人氣大急升！

《乘風破浪3》自播出以嚟都收穫網民嘅關注，其中除咗阿Sa阿嬌之外，薛凱琪人氣亦唔低，個人喜愛度一直位列前十，喺啱啱完結嘅第四次公演中，佢嘅個人喜愛度更一躍登至第四！僅次於王心凌、Jessica（鄭秀妍）、阿Sa（蔡卓妍）。

Photo from 《乘風破浪3》

喺節目以外Fiona爽直性格亦獲網民熱議，早前佢未經後期修圖嘅直拍照曝光，獲網友力讚佢保養超好，仍係滿滿少女感。

Photo from 薛凱琪微博

Photo from 微博

薛凱琪組員被淘汰，王心凌、Jessica可選新組員加入

Fiona第三次公演個人喜愛度仲係第8，到第四次公演即升至第4，但人氣大急升嘅佢似乎面臨危機？！喺最新一集《乘風破浪3》中只有喺第四次公演擊敗師姐組嘅Jessica組同排名第一嘅王心凌組可以全員晉級，其他兩組都要淘汰組員。

Photo from 薛凱琪微博

Photo from 《乘風破浪3》

胡杏兒就係喺呢次公演中被淘汰，而身為排名第二譚維維組嘅薛凱琪亦面臨組員被淘汰嘅命運。喺淘汰後迎嚟最後一次公演嘅分組，全員晉級嘅Jessica組同王心凌組可以喺敗者組選擇新組員加入，而獲選擇嘅組員並無拒絕嘅權利。

Photo from 《乘風破浪3》

王心凌有意邀請薛凱琪，Fiona爆喊稱唔想

王心凌喺選人時就表示想揀主唱加入，歌手出身嘅薛凱琪同郭采潔成為佢哋心目中嘅人選，而隊長譚維維亦表示王心凌同郭采潔都有可能獲選，Fiona一聽到即崩潰爆喊！Fiona指：「我真的不想走！」見到Fiona喊得咁犀利，其他姐姐都十分動容。

Photo from 《乘風破浪3》

王心凌組員阿嬌同張天愛面色尷尬

王心凌內心想選擇音樂人，但同組嘅組員見到薛凱琪咁難受，吳謹言、阿嬌同張天愛都露出不忍神情。Fiona嘅組員都安慰佢，叫佢唔好喊。王心凌經過一番考慮後決定揀舞蹈員出身嘅唐詩逸加入。

Photo from 《乘風破浪3》

而薛凱琪成功留喺譚維維組後佢再次落淚，並過去王心凌組感謝對方，佢用廣東話表示：「多謝你！多謝阿Sa！多謝你為我哋考慮！」王心凌、阿Sa等組員又送上擁抱，阿Sa以廣東話回應：「唔使（多謝）～我係覺得我哋想做嘅（表演）你未必想做。」場面感人！

Photo from 《乘風破浪3》

內地網民斥薛凱琪唔遵守規則、成日喊EQ低

不過節目播出後，Fiona嘅表現卻掀起內地網民討論，有唔少人認為規則講明被選擇嘅組員會直接加入新組別，即係無得「say no」，但薛凱琪咁樣即係逼人唔好揀佢，等同唔遵守規則。網友指佢此舉情商低，更令王心凌一組嘅組員十分尷尬。

Photo from 《乘風破浪3》

Photo from 微博

亦有人表示王心凌從頭到尾都無公開佢想揀嘅人選，薛凱琪唔知對方揀咩人就喊晒口咁分分鐘係自作多情。有網民則表示喺節目播出以嚟薛凱琪經常都忍唔住眼淚，直言佢「哭多就太作了」，又指佢唔應該靠喊要人哋遷就佢。不過都有網友表示Fiona只係重情義，同組員有感情先唔捨得走。王心凌組都係高人氣成員，Fiona只要加入就穩贏，但佢堅拒入組反而證明Fiona真性情。