download HolidaySmart 假期日常 app
Frankie@MIRROR演唱會不慎跌倒,舞台安全問題掀熱議!盤點歷年5宗表演意外

Frankie@MIRROR演唱會不慎跌倒,舞台安全問題掀熱議!盤點歷年5宗表演意外

娛樂新聞
By Stephanie on 27 Jul 2022
Digital Content Writer

人氣男團MIRROR於週一(25日)開始喺紅館舉辦12場演唱會,大批鏡粉到場支持偶像~然而喺首場演唱會後,有觀眾留意到舞台上危機重重,第二場演唱會中Frankie仲從升降台上跌落台,令粉絲們喺享受表演之餘,更擔心偶像會唔小心發生意外

12人男團MIRROR最近喺紅館舉辦演唱會,大批鏡粉都買飛支持偶像~Photo from MIRROR IG

MIRROR演唱會舞台安全問題,引起熱議!

男團MIRROR近日於紅館舉行演唱會,吸引大批鏡粉支持,演唱會門票可以話係「一票難求」~喺舉辦首場演唱會前夕,就傳出有舞蹈員喺總綵排受傷,令dancer們爆發不滿喺IG大吐苦水。而觀眾睇完第一場演唱會後,都認為舞台嘅設計似乎有啲危險,包括:長升降橋晃動、巡遊車冇圍欄等,令台下觀眾都替成員嘅安全感到擔憂!

喺首場MIRROR演唱會後,唔少台下觀眾都表示覺得舞台設計危機重重!Photo from viu_pls_do_ur_job IG

而巡遊車周圍並冇圍欄,成員們跳舞期間都差啲跌倒!Photo from viu_pls_do_ur_job IG

Frankie第二場演唱會中不慎跌落台!

喺第二場演唱會,成員Frankie喺台上走動期間,懷疑因為燈光太暗而不慎「叉錯腳」從升降台中跌落台,瞬間令鏡粉們極擔心!而Frankie亦立刻安撫粉絲「冇事,sorry!我自己跌親」,其後喺演出完畢後再去睇醫生,並貼心向粉絲們報平安「完全冇事只係擦傷,大家唔洗擔心!」

Frankie@MIRROR喺第二場演唱會期間,不慎從升降台上跌倒,令粉絲超擔心!Photo from 網上圖片

其後Frankie好快就喺IG同大家報平安!Photo from Frankie IG

喺演出完畢後,仲立刻去睇醫生,表示只係擦傷Photo from Frankie IG

鏡粉發起「關注MIRROR演唱會安全問題」聯署

然而,鏡粉們已經發起「關注MIRROR演唱會安全問題」嘅聯署,截止27日下午4點為止已經有逾1.1萬人簽名支持。事實上喺第二場演唱會中已經取消天橋上嘅表演,俾MIRROR「腳踏實地」咁喺大舞台上唱《IGNITED》,似乎都有留意到網民們嘅聲音。

有鏡粉發起「關注MIRROR演唱會安全問題」聯署,已經有過萬人簽名Photo from change.org

其實網民們今次對舞台安全問題有咁大反應都係人之常情,事關過往曾有唔少藝人喺表演途中受傷,而呢類型嘅意外往往都係大家最唔想見到嘅!以下等我哋為大家盤點歷年嘅表演意外:

1. 陳奕迅

2002年,陳奕迅飛往台灣出席台北校園演唱。Encore時,懷疑因太興奮一腳將音箱支撐架踩斷,右腳跌落台下;左腳卻依然喺台上,身體卡住喺台中。據悉,當時陳奕迅強忍痛楚,演出後並未有立刻送院。直到後來佢發現撞傷位置越來越疼痛,才去台灣醫院求醫,結果發現右邊「蛋蛋」被撞破!其後外界一直盛傳佢已經摘除一邊「蛋蛋」,而佢曾受訪回應「我現是比兩顆少一點,比一顆多一點,說不定還有三顆呢。」

2002年,陳奕迅喺出席台灣校園演唱會時不慎將支撐架踩斷,令右腿跌落台下,下半身卡住喺台中Photo from 《台灣大明星》

其後,佢被發現右邊「蛋蛋」撞破,經歷「男人最痛」!外界盛傳佢一邊「蛋蛋」被摘除,而佢一直都以講笑嘅方式回應傳媒Photo from 《台灣大明星》

2. 林子祥

2003年,林子祥獲邀成為汪明荃演唱會嘅嘉賓,然而舞台中間嘅圓形升降台突然出現問題,降落時間比預期早,令佢唔小心跌落8呎高嘅台底!當時佢頭部撞到,仲傳出送院時昏迷,即使醒來後都有短暫失憶,而且右耳聽力永久受損。

2003年,林子祥獲邀成為汪明荃演唱會嘉賓,獻唱《男兒當自強》Photo from TVB

然而,台中間嘅圓形升降台比預期中早降落,令佢一不留神就跌咗落去!Photo from TVB

3. 郭富城

2012年,郭富城喺紅館舉辦《舞臨盛宴》嘅尾場演唱會,當佢演唱歌曲《鐵幕誘惑》時升降台嘅鋼絲突然斷裂,令佢從3米高台跌下。而當時擁有豐富舞台經驗嘅城城忍痛起身擺pose,強調自己身體無大礙;但台下嘅經理人已經嚇到流淚。

2013年,郭富城喺《舞臨盛宴》尾場演唱會中因為升降台鋼絲斷裂而從3米高空跌落Photo from 郭富城微博

不過跌倒後,佢立刻企起身擺pose,強調冇受傷Photo from 郭富城微博

4. 蔡一智

2017年,草蜢成員蔡一智為擔任林敏驄《35年腦交戰作品展》演唱會嘉賓出席下午綵排。然而,台上圓形台版突然傾斜近6呎,令本身喺台上嘅3男6女跌傷,當中包括蔡一智;而佢喺意外中跌傷臀部,並由其餘兩名成員繼續完成演出。

2017年,蔡一智擔任林敏驄演唱會嘉賓,彩排期間不慎跌落台!Photo from TVB

當時台上圓形台出現故障,傾斜近6呎Photo from TVB

5. 古巨基

喺2018年,古巨基舉行《WE我們世界巡迴演唱會香港站特別版》第二場表演時,唱咗兩首歌就不小心向後跌落升降台個大窿,並大叫咗一聲,令全場觀眾都好擔心!事後古巨基堅持繼續表演,揚言「我係背脊落地安全冇事。不過一陣如果換衫位耐啲,跳舞嗰啲!大家體諒吓﹗」演出後,佢到醫院進行檢查發現頸部肌肉拉傷。

2018年,古巨基喺演唱會中不慎跌落升降台嘅大窿裡面!Photo from TVB

其後古巨基喺FB拍片報平安,指自己只係頸部肌肉拉傷!Photo from 古巨基FB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

鏡粉前夫不滿MIRROR演唱會安排,宣佈將永久關閉關注組:當鏡粉係ATM係水魚

3 Jun , 2022

MIRROR人氣極高,有網友因為老婆熱愛MIRROR而喺Facebook開設「我老婆嫁左比Mirror導致婚姻破裂關注組」,不過Admin卻指對是次Mirror演唱會嘅安排感到極度不滿,並宣佈將會於演唱會後永久關閉群組,引起熱議!

MIRROR IGPhoto from MIRROR IG

MIRROR紅館演唱會購票安排惹鏡粉MIRO不滿

「我老婆嫁左比Mirror導致婚姻破裂關注組」(下稱「鏡粉前夫群」)好多成員嘅另一半都係鏡粉,而前夫們亦因此喺群組訴苦,目前鏡粉前夫群有逾35.5 萬位成員,絕對係一大鏡粉集中地!

目前鏡粉前夫群有逾35.5 萬位成員Photo from 「我老婆嫁左比Mirror導致婚姻破裂關注組」

早前MIRROR宣佈舉辦紅館演唱會,一眾鏡粉MIRO努力撲飛不果,眼見一票難求,黃牛飛炒到幾十萬,主辦再加開兩場MIRO特別場,並以實名制賣飛。不過到MIRO特別場開賣當日,網站運行仍然十分緩慢,成功購票嘅MIRO仍然屈指可數,令大批鏡粉十分不滿!

早前MIRROR宣佈舉辦紅館演唱會,一眾鏡粉MIRO努力撲飛不果Photo from MIRROR IG

眼見一票難求,黃牛飛炒到幾十萬,主辦再加開兩場MIRO特別場,並以實名制賣飛。Photo from MIRROR IG

「鏡粉前夫群」谷主RC宣佈將永久關閉「我老婆嫁左比Mirror導致婚姻破裂關注組」

主辦再宣佈推出演唱會網上直播,務求令MIRO可以參與MIRROR嘅演唱會。而曾經上過《晚吹》嘅「鏡粉前夫群」谷主RC就無預警突然宣佈將永久關閉群組。

主辦再宣佈推出演唱會網上直播Photo from MIRROR IG

曾經上過《晚吹》嘅「鏡粉前夫群」谷主RC就無預警突然宣佈將永久關閉群組。Photo from 《晚吹》

佢指出喺開設群組一年嚟MIRROR代言、出席活動、推新歌都有好多鏡粉落力支持,MIRROR出道首個紅館演唱會雖然預咗會難買飛,但佢表示:「一睇個floor plan,喂黑洞咁嘅樣嘅?」

MIRROR出道首個紅館演唱會雖然預咗會難買飛,但佢表示:「一睇個floor plan,喂黑洞咁嘅樣嘅?」Photo from MIRROR IG

Admin直言主辦單位自己做黃牛:當鏡粉係ATM係水魚

Admin又形容好似湊大兒子準備去睇佢畢業典禮,竟然仲要唔知買唔買到飛,又直斥主辦乘機要鏡粉幫襯贊助商先攞到飛:「你當鏡粉係ATM係水魚。錢係要賺,但食相唔係咁難睇掛?!」

Admin又形容好似湊大兒子準備去睇佢畢業典禮,竟然仲要唔知買唔買到飛,又直斥主辦乘機要鏡粉幫襯贊助商先攞到飛Photo from MIRROR IG

Admin指:「你地係咪真係以為d鏡粉個個都幾億身家?我地成日鬧黃牛,你地就自己做大黃牛」,佢表示今次MIRROR演唱會實有人睇,下次就唔知嚕。

Admin指:「你地係咪真係以為d鏡粉個個都幾億身家?我地成日鬧黃牛,你地就自己做大黃牛」Photo from 「我老婆嫁左比Mirror導致婚姻破裂關注組」

網民評論兩極

貼文掀起網民關注,現已吸逾4.1萬個like!好多鏡粉前夫表示同意,指對主辦方十分失望:「講出我哋心聲!」但亦有表示對Admin要喺演唱會之後先關閉群組嘅決定十分不解:「咁不滿點解唔即刻閂咗個group佢?!」

貼文掀起網民關注,現已吸逾4.1萬個like!Photo from MIRROR IG

好多鏡粉前夫表示同意,指對主辦方十分失望:「講出我哋心聲!」Photo from 「我老婆嫁左比Mirror導致婚姻破裂關注組」

亦有表示對Admin要喺演唱會之後先關閉群組嘅決定十分不解:「咁不滿點解唔即刻閂咗個group佢?!」Photo from 「我老婆嫁左比Mirror導致婚姻破裂關注組」

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel