東張西望|法鬥犬Butter於狗cafe游泳期間不幸離世!cafe負責人現身回應,指女主人突然更改賠償要求?

東張西望|法鬥犬Butter於狗cafe游泳期間不幸離世!cafe負責人現身回應,指女主人突然更改賠償要求?

時事熱話 生活熱話
By Stephanie on 09 Aug 2022
Digital Content Writer

近日《東張西望》報導一名狗主帶愛犬Butter去美孚嘅一間寵物cafe學游水;然而愛犬喺游水不久後失去知覺,後來仲因此離世,令狗主既傷心又憤怒,要求cafe負責人俾一個交代。節目組亦成功搵到狗cafe嘅負責人「文凱」接受訪問,並解釋女主人對佢哋餐廳嘅指責。

法國鬥牛犬Butter於狗cafe游水途中離世,事件引起大眾廣泛關注!Photo from 《東張西望》

陳小姐帶愛犬Butter到狗cafe游水,卻不幸離世!

狗主陳小姐表示喺上個月23日帶愛犬Butter到美孚一間狗cafe與教練一對一學游水,事前Butter並冇任何異樣。其後,陳小姐喺狗狗游水期間發現異樣,認為教練精神狀況「好眼瞓」,仲發現Butter嘅鼻子兩度浸水。雖然當時佢有呼叫教練加緊留意,但卻被對方以「對聲音敏感」作回應。其後Butter就失去知覺離世。

陳小姐表示上個月帶愛犬到狗cafe游水Photo from 《東張西望》

然而愛犬Butter游水中途失去知覺離世!Photo from 《東張西望》

狗cafe事後將閉路電視拆下?

事後,陳小姐要求翻查狗cafe嘅閉路電視片段,但對方只係俾咗一段2秒嘅片佢。陳小姐第二日再去狗cafe就發現餐廳竟然將閉路電視拆咗,仲喺社交平台上公開Butter嘅報告,指佢係因為「中暑」而去世,並呼籲狗主們小心出現同樣情況,疑似暗示狗主未有好好照顧愛犬,令陳小姐更加憤怒!

然而,狗cafe表示當日閉路電視有問題,仲好似將閉路電視拆下?!Photo from 《東張西望》

狗cafe負責人受訪回應事件!

節目組亦成功邀請到狗cafe嘅負責人「文凱」現身接受訪問,並逐一解釋陳小姐對佢哋嘅各種「控訴」:

員工帶Butter游水前已經獲得主人批准Photo from 《東張西望》

1. 導師對聲音敏感

喺Butter游水期間,主人有利用手機幫愛犬拍攝片段或照片。根據當時員工敘述,主人好多時會為咗令狗仔望向鏡頭而發出聲音/動作,但以上舉動都可能會「令狗仔特別緊張,爬多兩下嘅」,因此導師的確有提醒陳小姐要細聲啲。

當時陳小姐亦有攞電話為Butter拍攝游水影片Photo from 《東張西望》

但由於主人發出比較大嘅聲音,令狗狗變得緊張,所以導師有要求對方將聲量降低Photo from 《東張西望》

2. 延誤救援

陳小姐表示導師喺Butter失去知覺後嚇呆咗,企咗喺水中一段時間先開始急救。而負責人引述返導師嘅話語,指當時抱住狗仔嘅腹部位置游水,但游水大約3分鐘後突然發現Butter嘅四肢癱軟。一發現Butter失去知覺後,就立刻大聲呼叫其他員工幫手,但當時Butter「已經完全冇心跳或者呼吸」;與此同時其他同事立刻聯絡附近嘅寵物醫院、幫手攔車等。

負責人解釋當時導師係突然發現Butter四肢癱軟,失去知覺。Photo from 《東張西望》

強調當時導師一發現異樣,就立刻呼叫其他職員幫手進行急救Photo from 《東張西望》

由於狗cafe事先已經向寵物醫院通知咗,所以當Butter一抵達就立刻開始進行急救,而醫生亦向男主人及餐廳職員表示Butter係因為中暑而離世!

因為公司職員事先通知,所以當butter到達醫院就立刻做手術Photo from 《東張西望》

交代當時Butter離開嘅原因係中暑!Photo from 《東張西望》

負責人表示係中暑全因1.探熱後溫度為41度、2.肺部未有發現進水Photo from 《東張西望》

3. 狗cafe如何獲得獸醫報告

負責人表示當日全數支付Butter嘅醫藥費,所以獸醫亦有將醫學報告交俾主人;但佢就並冇解釋點解連佢哋都獲得呢份報告。

當日cafe負責支付醫藥費Photo from 《東張西望》

而當時嘅動物醫院亦有將醫學報告交返俾主人,但負責人冇解釋點解佢哋都攞到Photo from 《東張西望》

4. 關鍵閉路電視片段消失

負責人表示當陳小姐要求翻查閉路電視時,佢哋都非常願意配合對方。直到開始播放片段嘅時候,先開始發現有「跳格」現象出現,畫面可能會突然跳到10秒後/20秒後等,令陳小姐誤會餐廳對閉路電視進行「加工」。

負責人「文凱」表示佢哋好配合咁將閉路電視俾陳小姐翻查Photo from 《東張西望》

但佢解釋自己都係睇閉路電視嘅時候先知道,該片段有嚴重跳格問題,懷疑與Wi-Fi有關Photo from 《東張西望》

節目組重新睇返餐廳交出嘅20分鐘片段,只見片段出現嚴重跳格問題,單憑片段的確難以搵到關鍵嘅一刻!至於點解會有嚴重跳格問題,餐廳解釋可能同Wi-Fi問題有關。

cafe將完整嘅20分鐘片段交俾節目組,喺狗狗落水後片段開始出現跳格問題Photo from 《東張西望》

期間狗狗似乎冇異樣Photo from 《東張西望》

但游水大約3分鐘後,狗狗就被教練等外面嘅職員抬出Photo from 《東張西望》

5. 私下聯絡其他公司盡快幫Butter辦後事?

負責人得知事件後,答應主人會支付Butter辦後事嘅費用;但佢就表示完全係一場誤會,因為佢並非狗牌持有人根本唔能夠自行聯絡其他公司辦後事,現時佢連支付費用都唔得!

狗cafe表示答應主人會支付辦後事嘅費用Photo from 《東張西望》

否認有擅自幫Butter辦後事Photo from 《東張西望》

主人提出3大要求,希望cafe負責人配合?!

負責人「文凱」話十分明白主人失去愛犬嘅傷心心情,所以願意盡量配合對方要求。而陳小姐向佢哋開出3大條件,包括:即時解僱游泳教練,要求教練不能再從事「幫狗狗游水」嘅行業、喺各大社交媒體刊登道歉聲明承認係cafe疏忽導致愛犬離世、要向一間動物慈善機構捐贈$100萬!而負責人就回應主人,要再深入調查係咪真係職員疏忽先回應,但陳小姐已經喺網上不停公開指責佢哋,令佢哋飽受困擾。

陳小姐向cafe負責人提出3大要求!Photo from 《東張西望》

其中一項係要求佢向動物慈善機構捐款$100萬!Photo from 《東張西望》

主人更改要求,要求cafe直接賠償$25萬俾佢?

其後,陳小姐更改要求「向你哋(cafe)賠償我哋心靈嘅損失以及失去狗狗嘅損失,價錢係$25萬」;而負責人詢問「咁呢$25萬係好似之前講咁俾慈善機構?」,而陳小姐回應「直接賠俾我!」

其後,陳小姐向cafe負責人表示只需賠償$25萬俾佢就可以?!Photo from 《東張西望》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

廣告
廣告

東張西望|41歲男子現真身接受訪問!承認同時有好多女友!突然自省懺悔,但又立刻搭訕女主持王嘉慧?

28 Jul , 2022

最近《東張西望》收到唔少女士報料指喺交友App認識一名41歲男子,繼而發現對方一腳踏十幾船。「女友」們一齊假扮成男粉絲開設新帳號接近對方,揭發男方背後嘅種種惡行。而節目組就化身成粉絲,成功約到男事主出嚟!

早前,節目報導有關41歲男子用交友app結交10幾名女友,其後佢哋仲成功約到男子見面?!Photo from 《東張西望》

41歲男子同時與10幾名女生交往,擅自拍攝親密片段?

早前節目報導41歲男子透過交友App認識唔同女生,並與十幾名女生發展情侶關係,欺騙佢哋感情及「食軟飯」,甚至未經許可就拍攝二人親密嘅片段,行為誇張!其中一位「女友」Bonice(化名)指發現對方手機內有超過2、30段影片,而大部分都喺男方居住嘅公屋單位內拍攝。

唔少女生向《東張西望》報料指於交友App認識同一位男子,並揭發對方同時與10幾位女生拍拖嘅事實Photo from 《東張西望》

仲發現男方未經許可就拍攝二人嘅親密片段?!Photo from 《東張西望》

大爆男士交往時惡行!

從影片中嘅角度,女生們相信絕大部分人都唔知道自己被拍,而且佢哋猜測男子將鏡頭擺喺凌亂嘅衣服堆裡面。而「女友」們憶述過往男子同佢哋講嘅說話「話自己(男子)近視好深,所以要開燈」等,令佢哋更加感到心寒;後來男子仲透露所有女士都係「用同一個玩具」,幸好女士們得知後都立刻進行全面身體檢查,全部都並冇大礙!

女士們從影片角度,推測男生將鏡頭放係凌亂嘅衣服堆裡面Photo from 《東張西望》

女生們回想起男士同佢哋講嘅說話,令佢哋更加受驚!Photo from 《東張西望》

對方毫無歉意

然而,男子卻對於自己嘅行為毫無歉意,仲以自己從小缺乏母愛以及近年婚姻、事業不順等作為理由。另一方面,女士們表示曾嘗試報警求助,但被要求搵到實質嘅影片作為證據,而佢哋亦擔心要因此而公開影片。

男子對於自己拍攝影片並唔覺得有問題!Photo from 《東張西望》

女士們曾打算報警,但因為要攞到實質影片以及擔心影片唔小心曝光等問題,最終並未將事件交俾警方Photo from 《東張西望》

節目組成功約男事主見面!

節目組利用「女友」們本身嘅假帳號去聯絡男事主,並以「跟佢學嘢」為理由約對方見面。但當日男子嘅警覺性非常高,激動表示「我知你影緊我啊」並嘗試搶走電話,直到節目組將電話收起先令佢嘅心情穩定落嚟。不過當節目組提及有關「識女仔」嘅話題,佢突然坦承「我一直都有好多女朋友」,並大談自己經營感情嘅方法。

節目組假扮成男粉絲,並以請教「結交女友」秘訣為由約男事主見面!Photo from 《東張西望》

起初男子警覺性極高,直到節目組收埋電話先冇咁激動!Photo from 《東張西望》

但當節目組詢問有關「女仔」嘅話題時,男子即刻心情放鬆晒Photo from 《東張西望》

男子大談「獨特」感情觀!

男子表示過往交往嘅女生「我都冇咩Commitment(承諾)」,仲話因為太多女友根本分唔清佢哋!當節目組提及有關親密片段嘅話題,佢就大聲咁話「冇問題!拍嘅人冇問題,係hack人哋嘅有問題。」然而喺2021年相關法例曾進行修訂,若果未經許可拍攝親密影片都係違法。

男子坦承自己同時有好多女友!Photo from 《東張西望》

而男子深信拍攝影片並冇問題Photo from 《東張西望》

喺2021年,相關法例有修訂:若果未經許可拍攝親密影片即屬違法Photo from 《東張西望》

曾以親密片段作「把柄」要求女生交出手機?!

其後,男子透露最近因為親密影片嘅事宜,與他人有爭吵,認為對方可能係想令佢身邊嘅女友離開佢。不過,節目組早前從女士們嘅口中聽到另一個版本,當中男事主利用親密影片作為「把柄」要求女生將手機俾佢睇,想藉此搵出「二五仔」。

男子突然表示最近因為影片而陷入苦惱?!Photo from 《東張西望》

然而,女士們就透露第二個版本嘅故事,指男士以影片作為「把柄」要求睇佢哋嘅手機Photo from 《東張西望》

而男子口中嘅「恐龍」即係代表影片Photo from 《東張西望》

女主持人當面訪問男子,坦承:識咗4、50個女仔!

後來,女主持王嘉慧直接上前當面訪問男子,對方坦承「有識女仔,約出嚟食飯嘅都有4、50個!」,承認1月到6月所認識嘅女生交往時間有所重疊,而佢就解釋因為自己一個人住好悶。

女主持人王嘉慧當面訪問男事主,而佢坦承只係相約食飯嘅女仔就已經有多達50個!Photo from 《東張西望》

解釋自己係因為獨居,所以特別容易覺得悶Photo from 《東張西望》

否認「食軟飯」!

當被問到是否有欺騙女生時,男子振振有詞咁話「我自己有付出嘅,食飯睇戲都係付出」;仲澄清自己絕對唔係專登挑選有錢嘅女士食軟飯「食餐飯食得幾多錢啊!最多咪一千兩千蚊」,表示約會期間大多數都係俾女生選擇去邊度食。

男子強烈否認「食軟飯」Photo from 《東張西望》

覺得自己都有付出,而且只係食餐飯並唔係花對方好多錢?!Photo from 《東張西望》

突然誠心懺悔自我反省?!

當女主持人直接詢問對方有關親密影片嘅事宜,男子突然扮失憶「我唔記得咗」之後又話「好似有」,仲話自己已經刪除晒啲影片?!過咗一陣,男子態度180度大變語重心長咁話「呢段時間我反省咗自己」向女士們表示歉意,勸喻大眾唔好玩交友apps!

當被問到影片嘅問題時,男子就扮失憶話忘記咗,後來有突然話已經刪除晒啲影片?!Photo from 《東張西望》

佢突然喺鏡頭前懺悔Photo from 《東張西望》

仲警惕世人唔好再玩交友app!Photo from 《東張西望》

訪問後卻向女主持人王嘉慧「抄牌」!

以為男子真係會痛改前非?!受訪後,佢主動詢問女主持人嘅姓名,仲話「我可唔可以Contact(聯絡)到你㗎?」行為同佢口中嘅反省似乎有啲唔同!

上一秒男子仲懺悔緊,但訪問一結束佢就立刻詢問女主持嘅姓名Photo from 《東張西望》

仲嘗試詢問女主持王嘉慧攞電話?!Photo from 《東張西望》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel