姚焯菲自認有公主病，2件事常被媽媽狠批！坦承要外傭姐姐幫忙

By Jennifer on 12 Aug 2022

Digital Editor

姚焯菲（Chantel）近日上電台節目《口水多過浪花》，DO姐（鄭裕玲）訪問佢時提到好多人都稱佢為「小公主」，姚焯菲自認有時會有公主病，又大談日後個人發展，表示希望推出個人品牌。

Photo from DO姐IG

姚焯菲讚炎明熹參加《聲生不息》後更成熟、專業

Chantel早前推出單曲《#BFF》，之後都有上唔同嘅電台節目做宣傳，近日佢就擔任商台《口水多過浪花》嘅嘉賓。參加《聲夢傳奇》出道嘅Chantel提到佢同其他參賽者關係好好，而炎明熹（Gigi）之前北上參加內地節目《聲生不息》，自己十分不捨。

Photo from 姚焯菲IG

Chantel表示得知Gigi要返內地工作後曾忍唔住喊咗出嚟，佢稱對方返內地後工作好忙，所以兩人都無乜聯絡。《聲生不息》完結之後Gigi返港，Chantel覺得對方長大咗、成熟咗。佢又指Gigi依家好專業，以前彩排時兩人會傾下偈，但依家佢同Gigi say Hi，Gigi會回一句「Hi」，之後就進入「工作mode」，Chantel大讚Gigi成熟咗。

Photo from 姚焯菲IG

Chantel自認有公主病，要外傭姐姐幫手執房

姚焯菲出道以嚟都獲fans小菲象稱為「小公主」，呢個幾乎已經成為佢嘅個人暱稱。DO姐問佢覺唔覺自己係小公主，Chantel坦言想係，但因為覺得自己有時都好粗魯，所以都唔知算唔算係「小公主」。

Photo from 姚焯菲IG

DO姐又問佢有無公主病，Chantel笑言有時都有，佢指媽媽經常都話佢有公主病，例如食完嘢有時唔執碗，就咁擺喺度，每次佢唔將啲碗拎入廚房就會被媽媽話有公主病。Chantel坦承自己間房好亂，要外傭姐姐幫手執房，媽媽就會話佢唔自己執房有公主病，Chantel指自己會同媽媽講：「我好忙㗎！」Chantel表示佢無動力去執房，雖然內心係想執下但因為懶所以咩動力都無晒。

Photo from 姚焯菲IG

姚焯菲有意創立個人品牌，已與爸爸初步商量

除咗被媽媽指有「公主病」之外，Chantel亦十分愛美，DO姐指留意到佢有gel甲，Chantel就話自己13歲嗰時已經有gel甲，更曾被父母反對，但14歲嗰陣媽媽帶完佢去gel甲後成品亦獲得爸爸認可，自此佢都有繼續gel甲。

Photo from 姚焯菲IG

Chantel年紀輕輕就出道做歌手，原來佢唔止想喺樂壇發展，佢表示有計劃創立個人品牌，有意推出貼紙、香水、衣服等產品，但佢稱自己嘅美術同數學都好差，可能要妹妹幫手。Chantel推個人品牌唔係玩玩下，佢已經同咗身為投資公司首席財務官（CFO）嘅爸爸討論過，可能喺不久嘅將來就會睇到Chantel嘅產品面世！