開心無敵獎門人|炎明熹玩遊戲超投入扮豬叫!「獎老」麥美恩奇特打扮,被網民指:真係認唔到!

開心無敵獎門人|炎明熹玩遊戲超投入扮豬叫!「獎老」麥美恩奇特打扮,被網民指:真係認唔到!

電視電影 娛樂新聞
By Stephanie on 29 Aug 2022
Digital Content Writer

大台經典遊戲節目《開心無敵獎門人》最近正在熱播中,最新一集就邀請到「聲夢傳奇」嘅學員們及「J2ers」主持人們上節目,嘉賓人數超多!而喺內地人氣飆升嘅Gigi(炎明熹)喺玩遊戲嘅時候都非常投入,仲爆笑咁扮豬叫,引起網民熱議。

獎門人同獎老們以中秋節作為裝扮主題,由曾志偉扮演嫦娥!Photo from 《開心無敵獎門人》

麥美恩為博觀眾一笑 打扮成光頭佬!

《開心無敵獎門人》昨日(28日)播放第5集,邀請咗《聲夢傳奇》嘅學員們及J2嘅節目主持人出演,陣容鼎盛~獎老們一向都會cosplay盛裝打扮,而佢哋今次嘅主題就應該係「嫦娥奔月」,由「獎門人」曾志偉打扮成嫦娥,而新「獎老」麥美恩就以光頭嘅打扮亮相,為博觀眾一笑而放低包袱!

最新一集《開心無敵獎門人》邀請咗聲夢學員以及J2ers做嘉賓!Photo from 《開心無敵獎門人》

獎老麥美恩仲打扮成光頭佬!Photo from 《開心無敵獎門人》

佢仲貼上假嘅毛髮,令其他人都忍唔住大笑~Photo from 《開心無敵獎門人》

Gigi首次體驗經典遊戲!

而節目就首度重現經典環節「開心無敵爆大波」,Gigi(炎明熹)仲成為第一個玩嘅嘉賓;喺佢玩嘅時候心口嘅氣球不停咁漲大,令佢越來愈緊張開始飆高音,直呼「呢個真係好刺激啊!」

Gigi成為第一個試玩「超級無敵爆大波」嘅嘉賓Photo from 《開心無敵獎門人》

而佢就超緊張咁飆高音Photo from 《開心無敵獎門人》

被森美誤會聞汗?!

玩完之後,曾志偉發現Gigi不停流汗,而Gigi就即刻用件衫抹汗,被在旁嘅森美講笑咁話「話你多汗,做咩聞胳肋底啊?!」令在場嘉賓都大笑~

隨後獎門人話Gigi玩完流晒汗!Photo from 《開心無敵獎門人》

而佢就疑似用衫抹汗Photo from 《開心無敵獎門人》

但就被森美誤以為係聞胳肋底!Photo from 《開心無敵獎門人》

C君大膽「抽水」!

之後輪到森美玩嘅時候,好搭檔之一嘅麥美恩就企喺佢身邊,希望令佢嘅壓力指數上升;面對氣球不停漲大,就連擁有豐富遊戲經驗嘅森美都覺得緊張啊!而另一位大台高層「J2台節目創意總監」C君都有出演,仲喺玩嘅時候大膽提及獎門人「我以後會矮過曾志偉」!

森美嘅其中一位好搭檔麥美恩負責幫佢擺氣球,仲不停靠近佢俾壓力佢!Photo from 《開心無敵獎門人》

C君仲超大膽咁喺獎門人面前用佢嘅身高開玩笑~Photo from 《開心無敵獎門人》

森美爆笑準備「私家遮」玩遊戲

其後喺「開心無敵大電視」中,當Gigi負責做動作俾隊友估詞語時,佢就放下偶像包袱扮豬叫,令網民大讚佢玩遊戲超投入!而差唔多包攬晒所有笑點嘅森美同C君喺「開心無敵彈遮遮」,因為不停答錯問題而被迫「淋雨」,而森美就好醒目咁自備「私家遮」,但最終被獎門人沒收咗!

Gigi玩遊戲嘅時候超投入,仲扮豬叫Photo from 《開心無敵獎門人》

森美超醒目咁收埋咗自己把遮喺褲袋!Photo from 《開心無敵獎門人》

成功挽救大台綜藝節目收視?

根據CSM媒介研究以及Adobe Analytics收視資料數據顯示,《獎門人》首集嘅最高收視達24.5點,比過往同時段嘅節目成績好咗;而睇返上星期嘅《獎門人》最高收視都有24.2,能夠同《東張西望》並列,似乎成功用《獎門人》挽回綜藝節目嘅收視!

獎門人嘅首集最高收視達24.5,比過往同時段嘅節目收視好!Photo from 《開心無敵獎門人》

而上星期(第4集)嘅最高收視都超過24點,同《東張西望》睇齊Photo from 《開心無敵獎門人》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

廣告
廣告

更多相關文章

《開心無敵獎門人》正式回歸!3位新「獎老」加入!曾志偉解釋重啟節目原因:想拍俾年輕人睇!

5 Jul , 2022

大台經典遊戲節目獎門人》系列深入民心,陪伴咗唔少港人成長~日前,電視台總經理(節目內容營運)嘅曾志偉宣佈將會重啟《獎門人》節目,引起網民熱議。7月3日,《開心無敵獎門人》就開始首集錄影,仲加入咗3位新「獎老」!

《開心獎門人》已經開始拍攝,並將於7月31日推出!Photo from 娛樂新聞台

《獎門人》1995年開始播放

《獎門人》自1995年開始播放,推出過十輯遊戲節目,並由「獎門人」曾志偉以及「獎老」們主持,邀請嘉賓一齊玩遊戲贏獎品。第一輯嘅「獎老」只得林曉峰、陳小春(其後因工作檔期換上錢嘉樂),呢兩位都可以稱得上係元老級主持;其後亦有王祖藍、阮兆祥、金剛等加入成為「獎老」,主持班底越來越多人!

《獎門人》節目其實由1995年就開播,推出過10輯遊戲節目Photo from 《超級無敵獎門人》

主持班底不停增加!Photo from 《超級無敵獎門人》

曾志偉宣佈《獎門人》回歸!

早前,電視台總經理曾志偉喺55週年台慶宣佈《獎門人》回歸,揚言要為觀眾帶來歡樂!據悉,今輯一共推出63集,第一集暫定於7月31日推出,橫跨台慶前後,播足3個幾月,希望勾起香港人嘅童年回憶~

今輯《獎門人》預計將會播放3個幾月,重溫各種經典遊戲~Photo from 娛樂新聞台

2位經典「獎老」超感慨:回憶返晒嚟!

3日,《開心無敵獎門人》舉行首次錄影,「獎門人」曾志偉帶同2位舊拍檔錢嘉樂、阮兆祥接受訪問,二人就非常「識做」咁話再度主持節目獲益良多,錢嘉樂表示「我好多嘢都係獎門人度攞返嚟㗎!我成個屋企都係佢度攞㗎!」;而阮兆祥就話玩返過往嘅經典遊戲,令佢回憶不停湧現有啲感動。

2位經典「獎老」錢嘉樂及阮兆祥都表示好開心可以再做返《獎門人》!Photo from 娛樂新聞台

《開心無敵獎門人》已經喺7月3日開始拍攝!Photo from 娛樂新聞台

加入3位新主持人!

今輯《獎門人》將會有3位新「獎老」加入,包括有麥美恩、吳嘉儀及程浩駿。3位新主持都難掩興奮之情,麥美恩表示獲邀成為主持感到十分榮幸;而吳嘉儀就話「一聽到以為係拍緊整蠱節目。」而當日拍攝獲邀嘅嘉賓就有周嘉洛、陳瀅、連詩雅、張頴康及王灝兒(JW)等。

今次仲加入咗3位新嘅「獎老」,包括有麥美恩、吳嘉儀及程浩駿Photo from 娛樂新聞台

解釋重啟節目原因

而闊別主持「獎門人」長達10年嘅曾志偉都坦承有啲緊張,並介紹今次節目嘅亮點「我哋從當年175個遊戲揀大家最鍾意嘅出嚟重溫,暫時揀咗30幾個」,仲表示希望強調今次再次開播節目嘅原因,「成日俾途人問幾時開拍(獎門人),覺得係時候同大家重溫獎門人,最緊要係好多遊戲宜家嘅小朋友或者年輕人未睇過啦,俾佢哋開心下!」

曾志偉受訪時表示,希望能夠俾現時嘅年輕人及小朋友玩新遊戲!Photo from 娛樂新聞台

大約430位現場觀眾到場支持

曾志偉曾提及希望邀請到過往主持過嘅「獎老」出演節目,而佢就表示「陳小春、王祖藍同林曉峰搵夠就會返嚟,金剛就掛住溝女」,似乎尚未邀請到佢哋。而佢仲表示今季嘅獎品非常豐富「已經有價值1千萬獎品,我哋多多益善、少少無拘!」,而首集拍攝就招待咗大約430位現場觀眾,場面十分熱鬧~

曾志偉表示正嘗試邀請返元老級「獎老」做嘉賓Photo from 《超級無敵獎門人》

曾志偉仲表示今次嘅獎品非常豐富!Photo from 娛樂新聞台

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel