download HolidaySmart 假期日常 app
陳瀅回應與周嘉洛熱戀中傳聞!細數入行後10位緋聞男友,大部分都係劇中合作拍檔?

陳瀅回應與周嘉洛熱戀中傳聞!細數入行後10位緋聞男友,大部分都係劇中合作拍檔?

娛樂新聞
By Stephanie on 30 Aug 2022
Digital Content Writer

古裝喜劇《痞子殿下》正在熱播中,而劇中周嘉洛陳瀅(Jeannie)亦因為合作拍戲而變得熟絡,繼而傳出交往中嘅傳聞;不過佢哋都堅稱二人只係好朋友關係!其實陳瀅一向都桃花運超旺,曾與唔少合作過嘅男藝人傳出緋聞

陳瀅入行以來緋聞多多,細數佢入行後10位緋聞男友,當中得1位係公開承認過!Photo from 陳瀅IG

陳瀅近日與周嘉洛再度傳出緋聞!

最近,32歲嘅陳瀅因為同周嘉洛合作拍攝《痞子殿下》而感情變好,仲因此而傳出緋聞;有媒體仲大爆見到男方夜訪女方香閨,但事後佢哋就澄清當日係劇組演員嘅聚會,二人只係朋友關係!而佢哋拍攝嘅劇集即將迎來大結局,二人出席宣傳活動時就表示緋聞應該都會隨住劇集播畢而結束。

周嘉洛及陳瀅因為拍劇而傳出緋聞Photo from 周嘉洛IG

近日二人再度為劇集《痞子殿下》出席宣傳活動,再次回應緋聞Photo from 《東張西望》

陳瀅桃花緣超旺,緋聞多多!

事實上,陳瀅自入行以來緋聞多多,桃花緣不斷~而佢亦承認自己嘅緋聞的確比較多,但好多時都只係傳聞而並非真實嘅。宜家即回顧佢過往嘅緋聞對象啦!

陳瀅亦覺得自己緋聞比較多?!Photo from 陳瀅IG

1. 溫家偉

2015年,陳瀅因為拍攝劇集《潮流教主》而認識溫家偉,二人因此而變成朋友,因而傳出緋聞。不過當時陳瀅解釋二人都係從外國回流返港,所以先會特別投契。

2015年,陳瀅同溫家偉傳出緋聞Photo from 溫家偉IG

2.賭王四房兒子何猷亨

2015年9月,陳瀅與賭王何鴻燊兒子何猷亨承認戀情,係入行後首度公開戀情!二人曾被傳媒拍攝到甜蜜遊日本札幌,而且佢哋已經「見家長」嘅階段,四太梁安琪亦曾稱讚陳瀅靚女。可惜二人喺2016年分手,回復朋友關係。

2015年9月陳瀅首度公開戀情,男方係賭王何鴻燊兒子何猷亨!Photo from TVB

2020年,陳瀅連續兩日陪伴何猷亨出席賭王嘅葬禮,而且二人亦被拍到一齊食晚飯,令佢哋舊情復燃嘅消息傳出!

2020年陳瀅連續兩日都去咗賭王嘅葬禮,令外界猜測二人復合?!Photo from TVB

3.富二代劉德俊(William)

2016年12月,陳瀅被拍到與「衣架大王」兒子劉德俊(William)互動親暱,因而傳出緋聞。不過佢哋後來喺受訪時表示只係認識多年嘅朋友。

2016年尾,陳瀅被拍到與「衣架大王」兒子劉德俊(William)互傳緋聞Photo from 陳瀅IG

4.張振朗

回復單身嘅陳瀅一心將時間擺晒去拍戲,當時佢就拍攝緊《全職沒女》,首次與張振朗合作。二人喺劇中有唔少親密鏡頭,亦因此而變得熟悉,有傳二人因私自加吻戲而導致傳出緋聞。

陳瀅同張振朗喺劇集《全職沒女》首度合作Photo from 《全職沒女》

5.余德丞

喺2018年,陳瀅同余德丞因拍攝《福爾摩師奶》而認識,二人因為年紀相近而且共同朋友多而一拍即合。其後,二人連同好友蔡思貝、何雁詩等人一齊出海開船P,而佢就上載咗男方大喊「我愛陳瀅!」嘅影片,令二人陷入熱戀緋聞之中。事後陳瀅澄清當時大家只係玩緊遊戲,並非情侶關係。

2018年陳瀅同余德丞合作Photo from 《福爾摩師奶》

佢哋一齊出海玩,而余德丞就大喊「我愛陳瀅!」Photo from 陳瀅IG

6.羅天宇

陳瀅與羅天宇喺2017年一齊拍攝《跳躍生命線》而成為朋友,當時男方尚與湯洛雯交往中,直到2018年羅天宇正式同湯洛雯分手。後來有傳二人從朋友關係發展成戀人,地下情維持咗半年,仲被指前後腳去睇戲,不過傳聞都被羅天宇一一否認。

陳瀅同羅天宇合作《跳躍生命線》而成為朋友,直到2018年先傳出緋聞Photo from 《跳躍生命線》

7.陳家樂

2018年陳瀅同陳家樂拍攝《廉政行動2019》而結緣,據悉二人都首度擔正做男女主角。喺拍攝完畢後,有傳媒大爆佢哋飛往東京倒數,仲疑似同居嘅傳聞,但二人都並冇理會緋聞,仲索性「情侶檔」咁一齊搵真銀!

2019年,陳瀅與陳家樂因為合作而傳緋聞Photo from TVB

當時仲盛傳二人同居?!Photo from TVB

8.方力申

據悉陳瀅同方力申係透過糖妹介紹而認識嘅,雖然二人嘅緋聞鬧得滿城風雨,但喺2019年男方完成慈善環島遊,當時陳瀅就喺岸邊支持對方,仲獻上擁抱作為鼓勵,令外界更加認定二人嘅關係親密。其後,二人一齊上節目《Tiger's Talk》女方大爆方力申曾單獨約佢食飯,仲超high咁主動與對方合巹交杯!

2019年,陳瀅專登去環島遊嘅岸邊等待方力申,仲俾咗個擁抱對方!Photo from 陳瀅IG

女方曾大大爆方力申約佢單獨食飯Photo from 《Tiger's Talk》

直到宜家二人嘅緋聞都經常被網民提起,但其實陳瀅曾經喺受訪時表示同方力申冇發展機會,坦承自己過往嘅男友們都係認識一陣子就交往。不過佢同方力申認識已經差唔多5年嘅時間,二人卻依然冇spark(火花)。

陳瀅曾喺受訪時表示同方力申認識咁耐,但都未有超越朋友嘅感情,認為同對方發展機會不大!Photo from 娛樂新聞台

9. 周嘉洛

現時播放中嘅《痞子殿下》係上年開拍嘅,當時陳瀅已經同周嘉洛爆出緋聞;與此同時周嘉洛亦與《愛回家》嘅蘇韻姿傳緋聞中,令佢哋陷入「三角戀」之中。直到最近劇集開播後,二人因為宣傳活動而經常見面再度傳出緋聞!

上年,陳瀅同周嘉洛拍緊《痞子殿下》時就已經傳出緋聞!Photo from 曹永廉微博

戲外佢哋幾位主演都感情好好~Photo from 陳瀅IG

10.黃宗澤

2020年,陳瀅與黃宗澤合作拍攝《飛虎3壯志英雄》,二人於戲內飾演情侶。直到今年初劇集先開播,二人喺出席宣傳活動時因為關係親密而導致傳出緋聞,包括:一齊share一杯檸檬茶、陳瀅向黃宗澤嘅紙牌公仔索吻等;當時黃宗澤仲講笑咁指「陳瀅你又話幾愛我,轉過頭就同周嘉洛一齊」,對二人嘅緋聞一笑置之。

陳瀅I同黃宗澤喺劇中飾演情侶!Photo from 《飛虎3壯志英雄》

二人當時為劇集進行抖音直播,而陳瀅就好投入咁同黃宗澤嘅紙牌公仔玩~Photo from 微博

就算黃宗澤提醒陳瀅杯檸檬茶係佢嘅,但陳瀅都唔介意食對方「口水尾」!Photo from 微博

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

《痞子殿下》靠無厘頭情節取勝!周嘉洛/朱敏瀚男扮女裝超搞笑!陳瀅因劇集再度傳出新緋聞?

29 Aug , 2022

周嘉洛陳瀅(Jeannie)、JW以及朱敏瀚主演嘅古裝喜劇《痞子殿下》現正熱播中,而兩位男演員都喺劇中男扮女裝,獲網民大讚靚女!劇情搞怪貼地,竟然仲出現有關「做快測」、戴口罩等情節,令唔少網民都覺得好搞笑~

《痞子殿下》將會喺呢個星期迎來大結局!Photo from 《痞子殿下》

今個星期播放大結局!

大台古裝喜劇《痞子殿下》喺今個星期迎來大結局,已播出嘅第20集講述陳瀅誤會周嘉洛將「護心鏡」送俾JW,而憤怒到將對方推落山,但卻不慎自己都跌埋落去;另一邊廂,朱敏瀚形象突變,變得口齒伶俐,卻被發現疑似係病情加重?!故事嘅種種疑團都即將喺今個星期揭曉~

第20集講述陳瀅因為誤會所以想推JW落山,但卻不小心自己跌左落去!Photo from 《痞子殿下》

朱敏瀚亦似乎以新形象出現喺大家面前?!Photo from 《痞子殿下》

劇情靠搞笑+無厘頭取勝!

劇集成功以搞笑及無厘頭嘅情節吸引到觀眾,雖然佢喺一套古裝劇但內容卻非常貼近宜家嘅生活!喺第13集中,朱敏瀚為咗救妹妹JW幫手拆「屎蜢炸彈」,但就搞到成身都係臭味,導致全村人都避開佢,其後佢就被吳岱融安排去「竹高山」隔離;而JW亦到山上為朱敏瀚「做深喉唾液測試」探測臭味濃度,非常搞笑~

劇情超級無厘頭,最搞笑嘅係第13集中仲出現同宜家好相似嘅情節!Photo from 《痞子殿下》

朱敏瀚因為成身臭味,搞到被安排上山隔離,而其他人一見到去就戴口罩!Photo from 《痞子殿下》

周嘉洛及朱敏瀚男扮女裝 獲讚好靚女!

唔單止係咁,兩位男演員周嘉洛及朱敏瀚為咗幫手調查可疑人物,而選擇男扮女裝接近對方。二人變裝後聲線變得超溫柔,仲嬌羞咁攞住手巾仔,扮得維妙維肖~而唔少網民都大讚二人為劇集放下型男形象,而且仲大讚佢哋打扮後真係好靚女!

為咗調查一位可疑人士,周嘉洛同朱敏瀚男扮女裝Photo from 《痞子殿下》

網民就大讚2位變裝後都好靚女!Photo from 《痞子殿下》

陳瀅+周嘉洛關係太好,而傳出熱戀緋聞?!

喺戲外,4位主演嘅感情變得好好,當中桃花運極旺嘅陳瀅同周嘉洛仲因此而傳出熱戀中嘅緋聞!早前,陳瀅喺IG上載佢哋一齊玩「TRUTH or DRINK ?」嘅片段,期間陳瀅抽到問題「有邊啲緋聞係真嘅?」令在場嘅3位都忍唔住起哄,而佢最終選擇飲酒代替回答問題!

陳瀅上載同3位主演一齊玩遊戲嘅片段~Photo from 陳瀅IG

不過陳瀅抽到有關緋聞嘅問題,而佢就選擇唔回答!Photo from 陳瀅IG

4位演員戲外超friend!

其後陳瀅又再抽到「最多人誤會嘅事」,佢就坦承回應網民為佢改嘅花名同真實嘅佢有出入;而佢就話明白網民係因為佢緋聞太多,先會幫佢改呢個花名!起初佢對呢個花名唔太鍾意呢個花名,但後來慢慢又覺得好有親切感,似乎接受咗呢個稱號?!而其他人就附和表示覺得呢個花名好有型~

陳瀅表示知道好多網民幫佢改咗個花名!Photo from 陳瀅IG

佢宜家反而覺得呢個花名好有親切感!Photo from 陳瀅IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel