英女王逝世｜與菲臘親王結婚74年，甘願忍受丈夫婚後多次外遇？！
英女王逝世，終年96歲，佢離世嘅消息震驚全球。王夫菲臘親王於去年離世，佢同英女王相愛逾70年，菲臘親王更為英女王甘願放棄王位繼承權，而英女王亦曾表示對方係佢嘅精神支柱同力量嘅來源。
英女王13歲邂逅菲臘親王，對高大俊朗嘅Philip一見鍾情
菲臘親王係英女王「背後男人」，兩人相愛超過70年，菲臘親王Philip更係英女王Elizabeth嘅初戀。Philip擁有希臘王室血統，更係Elizabeth嘅表哥。
1939年，Elizabeth喺皇家海軍學院（Royal Naval College）邂逅18歲嘅Philip，當年Elizabeth只有13歲，但Philip身高已有1.9米，而且生得英俊瀟灑，加上個性風趣幽默，有指Elizabeth就此墜入愛河。
菲臘親王為娶英女王放棄所有王室頭銜及繼承權
據指Elizabeth對Philip一見鍾情，之後Philip於二戰期間喺皇家海軍服役，雙方只能透過書信來往。不過未有令兩人愛意減退，1946年Philip向當時嘅英國國王George求娶Elizabeth。
不過Philip同Elizabeth結婚並唔容易，因為Elizabeth已經係英國王儲，所以唔可以下嫁別國，而Philip為咗迎娶心上人，主動放棄所有希臘同丹麥嘅王室頭銜及繼承權，更跟母親改姓。終於1947年，Philip同Elizabeth正式結婚，婚後外父授予佢愛丁堡公爵等爵位。
即睇更多人氣文章：
菲臘親王做女王「背後男人」
成為女王「背後嘅男人」一啲都唔容易，Elizabeth登基後成為英國女王，菲臘親王出門要行喺英女王後面，算係英國王室嘅一個「潛規則」，菲臘親王亦曾經向女王屈膝下跪表示會一直效忠於佢。
另外王室後裔姓氏亦係一個問題，因為英女王嘅祖母十分反對英女王嘅後代跟隨菲臘親王嘅姓氏「Mountbatten（蒙巴頓）」，喺祖母去世後英女王就發佈御令，宣佈後裔嘅姓氏結合丈夫菲臘親王同佢自己姓氏「Mountbatten-Windsor（蒙巴頓-溫莎）」。
有指英女王王夫婚後外遇不斷？
英女王在位期間與丈夫感情好好，兩人相守74年。不過兩人婚後依然有好多傳聞指菲臘親王風流不斷，更有傳媒指菲臘親王有超過20個私生子女，又刊登出「情婦名單」，當中菲臘親王嘅外遇對象，包括多位女明星，更有啲係佢親戚！例如女王堂妹雅麗珊郡主、兒子安德魯王子前妻嘅媽媽Susan Barrantes。
Netflix根據英國王室故事改編嘅大熱劇集《王冠》（The Crown）亦對此有所暗示，不過王室一直都否認此事，有留意英國王室嘅記者指英女王對丈夫外遇一直啞忍。
英女王曾大讚王夫係佢嘅精神支柱
王夫菲臘親王於2021年4月離世，終年99歲。英女王曾表示丈夫係佢嘅精神支柱同力量來源。佢哋結婚逾70年，育有4名子女，菲臘親王講過維持婚姻嘅秘訣在於「寬容」。喺王夫逝世一年後，英女王亦離世，縱使兩人嘅婚姻經過唔少風浪，但能夠互相扶持超過70年，絕不簡單。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
