張智霖抗日神劇翻紅，情節離譜、特效尷尬！大結局令網民笑到肚痛

電視電影娛樂新聞

By Jennifer on 14 Sep 2022

Digital Editor

現年51歲嘅張智霖北上發展，原來早喺2013年就主演過抗日神劇《終結杉計劃》。最近呢部舊作突然獲網民關注，其中誇張嘅劇情，以及離地嘅道具掀起關注，有網友直言套劇根本係笑片，睇完一定笑到抽筋咁話？！

Photo from 《終結杉計劃》

張智霖2013年抗日神劇《終結杉計劃》翻紅

張智霖近年同老婆袁詠儀返內地發展，上過好多夫妻綜藝，又參加《披荊斬棘的哥哥》，喺內地人氣大急升！佢更再上《披荊斬棘》第二季，務求力保自己人氣。張智霖北上賺人仔發展咁好，其實佢早喺2000年起就拍攝過好多內地劇。

Photo from 張智霖微博

其中一部於2013年播出嘅《終結杉計劃》近日出土，突然翻hit，原因竟然係內容太過離奇？！《終結杉計劃》被網民歸類為「抗日神劇」，改編自一本長篇小說《蛙女》。

Photo from 《終結杉計劃》

張智霖飾演特工，劇情騎呢惹笑

張智霖飾演男主角「張沖」，係水警隊隊長，佢嘅真實身份係潛伏喺上海灘嘅特工。身為特工，自然要保衛國家，張智霖同女主角蛙女為咗保護中央印鈔廠嘅法幣印鈔模板唔好落入日軍手中而同敵人「鬥智鬥勇」。

Photo from 《終結杉計劃》

不過叫得做「抗日神劇」，當然有啲騎呢位，《終結杉計劃》情節十分離奇，尤其係大結局一幕，更係為人「津津樂道」。印鈔模板經過多次爭奪，依然不幸落入日軍手中，張智霖作為特工，梗係唔可以眼白白睇住印鈔模板畀日軍帶返去，於是決意同對方同歸於盡。

Photo from 《終結杉計劃》

大結局張智霖攬魚雷一幕成焦點

女主角蛙女同張智霖一齊追截日方船隻，此時同伴嘅漁船駛到，兩人即上船追日軍，最離譜嘅係一艘漁船上竟然有一支魚雷，魚雷就咁打橫放喺甲板上面，已經十分奇怪，但奇處未算奇，之後張智霖仲同女主魚攬住支魚雷跳落海，追擊日軍船隻！

Photo from 《終結杉計劃》

兩人推住魚雷接近日軍，之後魚雷一枝箭咁飛埋去，最終成功擊中船隻。不過有網民直言劇情完全唔合理，首先漁船帶住個魚雷已經離地，劇情更安排男女主角攬住支魚雷撞向日軍更令人難以理解，唔少網友指：「其實佢哋知唔知魚雷有幾重?」、「人間魚雷」、「可以忍得住唔笑拍完場戲都幾好野」，連內地網民都頂唔順，紛紛評價一星：「我爸都看不下去！」