容祖兒接讀名校姪女放學玩燈籠被封絕世好家姐/姑媽擁12物業身家5億?

By Moon Lam on 15 Sep 2022

Digital Content Writer

容祖兒（Joey）日前宣布佢嘅巡迴演唱會正式重啟，近日佢終於返港享受兩個多月假期，正值中秋節仲接姪女蘇菲亞放學，夜晚一齊賞月，場面溫馨。而容祖兒不單止係好姑媽，更加係「絕世好家姐」！

Photo from 容祖兒小紅書

巡迴演唱會重啟

容祖兒原定2019年8月係紅館開完出道20周年紀念演唱會就到世界各地巡迴演唱，不過因為疫情關係一直停擺，事隔3年近日終於宣布重啟。11月初會先到馬來西亞嘅吉隆坡開唱，然後係加拿大嘅溫哥華同多倫多，然後到美國大西洋城、拉斯維加斯同內華達州，暫定一個月做7場，仲有世界其他演唱會地點斟洽緊。Joey指重啟巡演係佢嘅中秋節禮物，更表示「期待已久的全場大合唱」。

Photo from IG ＠yungchoyee

近兩年事業重心於內地

Joey過去兩年大部分時間都係內地工作，上年更參加真人騷節目《乘風破浪的姐姐2》，最終以第4名成團，之後亦參加唔同大小節目，近日播出嘅節目《牧野家族》更引起網民熱烈討論。佢上月由內地返港，享受剩低近兩個月假期，佢曾經話擔心姪女唔認得佢，今次就襯呢兩個月盡量陪伴家人，早前胞弟為佢親自下廚，佢更係社交平台發文大表安慰，大讚每道菜都係水準之作，更表示「其實可以一家人坐埋一齊食飯就已經係100分」。

Photo from IG ＠yungchoyee

接姪女放學

正值中秋節佢就曬接姪女蘇菲亞放學嘅相，可見姪女身穿名校維多利亞國際幼稚園（Victoria Kindergarten）嘅校服，唔少星二代都係銅鑼灣分校就讀，學校以IB探究式學習，深受星媽歡迎，每年淨學費要10萬左右，天王郭富城女兒、關心妍女兒等等都有讀過！

Photo from 容祖兒小紅書

絕世好家姐供書教學

身為家姐嘅Joey出道成名後為弟弟容逸恆（Samuel）供書教學，仲出錢供弟弟去馬來西亞讀汽車零件課程，知道弟弟愛車仲打本比佢開設汽車零件公司，幫細佬圓夢。而弟弟結婚時更送超厚禮，送咗層樓比一對新人，仲包辦香港瑰麗酒店20圍酒席，對家人無微不至，真係錫細佬錫到燶！

Photo from IG ＠yungchoyee

分享中秋夜節目

而姪女出世後亦愛屋及烏，不時分享同姪女嘅互動，中秋夜仲同姪女係海濱玩燈籠，Joey弟弟抱住愛犬同拎住燈籠，而姪女開心到手舞足蹈，場面開心又溫馨。Joey更有感而發：「我們都很老派，我希望任何佳節都可以一家人渡過，看著小朋友一天一天長大，期盼健康純真快樂一直能夠陪伴着她到老」。

Photo from 容祖兒小紅書

Photo from IG ＠yungchoyee

出道多年投資有道

Joey出道22年，被形容為「在粵語歌壇擁有無可動搖的地位」，而佢向來投資有道，係2007年開始入市港島區豪宅，包括淺水灣道56號嘅雙號複式戶、東半山松柏新村、渣甸山名門、鴨脷洲深灣軒同堅尼地城維壹，近年更轉攻工業大廈同地鋪，手持12個物業，保守估計身家約5億！有咁雄厚嘅資產全憑實力，近年主力北上發展令佢吸金力更強！