【新展覽登場!】走入敦煌世界飽覽洞窟壁畫、文物與絹畫,感受敦煌獨有美學!

【新展覽登場!】走入敦煌世界飽覽洞窟壁畫、文物與絹畫,感受敦煌獨有美學!

香港好去處 香港展覽
By Chavi Lee on 16 Sep 2022
Project Editor

敦煌洞窟係舉世聞名嘅佛教藝術文化寶庫,洞內保存咗精美嘅壁畫同塑像。香港文化博物館繼2014及2018年後,今年第三度同敦煌研究院合作,舉行「香港賽馬會呈獻系列:敦煌—千載情緣的故事」展覽。除咗約50件敦煌文物,必睇嘅1:1複製榆林洞窟,展覽仲加入唔少藝術科技及多媒體元素,令人好似走入畫中一樣,體會到敦煌世界中獨有嘅靈氣同神韻。以下就等小編帶大家睇睇展覽有咩精選展品啦!

「香港賽馬會呈獻系列:敦煌—千載情緣的故事」展覽現已開始啦!Photo from HolidaySmart

 

#焦點1:藝術x科技,敦煌石窟藝術活現眼前!

一入場就見到好大幅數碼展示「觀無量壽經變」,非常震撼!Photo from HolidaySmart

今次展覽加入咗好多Art Tech元素,例如一入到去就會見到好大幅數碼展示「觀無量壽經變」,可以見到畫中人物隨住音樂跳舞,活現西方極樂世界嘅景象!觀眾可以一邊聽住敦煌音樂,一邊仔細欣賞畫作嘅細節,感受敦煌獨有嘅靈氣同神韻。地下仲有蓮花投影,真係令人有淨化心靈嘅感覺。

 

#焦點2:必到打卡位「山水之間」、「敦煌搜畫」,猶如穿梭時空進入敦煌石窟中!

「山水之間」以大型沉浸式投影展示咗敦煌壁畫中嘅自然景色,畫面顏色都非常優美,親身感受「青綠山水」嘅魅力!Photo from HolidaySmart

小編行到入去「山水之間」就好似化身成畫中人物一樣喺山中遊走。Photo from HolidaySmart

另外小編推薦必去打卡位「山水之間」投影。山水元素經常喺敦煌畫作中出現,而「山水之間」就以塵世嘅山水景物作為構圖,將世俗人物置於山水之中,呈現人同自然相依共存嘅和諧之美。配上現場嘅流水、動物聲音,完全感受到萬物有靈嘅意念。走入「山水之間」成為畫中嘅人物,背對山水畫遠距離影出人嘅剪影,效果超靚呀!

「敦煌搜畫」就好似行入時光隧道一樣,了解到古人生活嘅各種面貌。Photo from HolidaySmart

「敦煌搜畫」則以數碼時光隧道形式展示,觀眾可以跟住地下投影方向,一覽敦煌壁畫中所展示古人嘅生活,例如分娩、育兒、婚嫁同喪葬等,題材與眾生緊密相連;畫作雖然歷經千年,但係當中情誼至今仍能引起我哋嘅共鳴!

 

#焦點3:進入榆林窟1:1複製洞窟,尋找小彩蛋!

榆林窟第25窟嘅1:1複製洞窟感覺超真實!入到去記得睇埋介紹壁畫亮點嘅動畫呀!Photo from HolidaySmart

小編已成功搵到小彩蛋「瑞鼠」喺邊喇!原來瑞鼠喺敦煌作品中係代表財富嘅意思。Photo from HolidaySmart

未能親身去到敦煌旅行?喺香港文化博物館都可以走入敦煌洞窟啦!展覽中1:1複製榆林窟第25窟保存咗盛唐風韻及吐蕃文化,入到去見到四面壁畫所畫嘅人物都非常傳神、畫功細膩,非常震撼。想了解壁畫嘅背後故事,仲可以睇埋洞窟裡螢幕中嘅壁畫介紹,記得搵埋小彩蛋「瑞鼠」喺邊呀!

 

#焦點4:超有共鳴! 必看「報父母恩重經變」

「報父母恩重經變」15則連環故事圖以數碼展示於大螢幕放映,大家嚟到可以坐低慢慢了解故事。Photo from HolidaySmart

去到展覽館五,觀眾可以欣賞「報父母恩重經變」嘅數碼展示,呢幅絹畫係內地現存幅面較大同埋有明確紀年嘅絹本佛畫,非常有代表性!畫中嘅15則連環故事圖講述父母養育子女嘅艱辛同子女對父母應有嘅孝道,相信無論係身為父母定子女嘅大家都會搵到共鳴!記得平日要好好表達對父母嘅愛意啦。大家可以坐喺展覽中央嘅蓮花座位上慢慢睇,好Mindfulness呀!

 

#焦點5:必睇一級文物,彩繪大日如來佛鎏金銅頭像

一級文物「彩繪大日如來佛鎏金銅頭像」。Photo from HolidaySmart

除咗必睇嘅複製洞窟、臨摹絹畫、數碼同多媒體展品外,今次展覽仲展出咗唔少來自敦煌嘅文物。特別係國家一級文物「彩繪大日如來佛鎏金銅頭像」,其巨大嘅尺寸同精湛嘅工藝,都反映咗當時吐蕃王室致力宣揚佛教。

同場大家仲可以留意埋展廳入面來自不同洞窟、結合佛教元素同蓮花裝飾圖案嘅地氈、天花等,打卡影出嚟嘅效果都超靚,一定要到場感受整個展覽嘅環境呀!

 

#睇完展覽,想同父母表達愛意?必儲存AR心意卡!

大家可以喺香港文化博物館大堂大樓梯前同AR人物打卡留念。Photo from HolidaySmart

嚟到今次敦煌展覽,記得要整埋AR心意卡,只要用手機Scan香港文化博物館大堂地上嘅巨型QR Code,或者入場時派發嘅屋型心意卡上嘅QR Code,就可以進入網頁製作電子心意卡。仲可以即場同「報父母恩重經變」故事入面嘅AR人物影相留念,孝仔孝女快啲帶埋屋企人嚟展覽參觀同打卡啦!

除咗以上小編介紹嘅必睇重點外,同場仲有好多精彩展品㗎!想更深入了解敦煌文化,就唔好錯過今次「香港賽馬會呈獻系列:敦煌—千載情緣的故事」展覽啦!

了解更多「香港賽馬會呈獻系列:敦煌—千載情緣的故事」展覽
即Click:https://bit.ly/3e6kOpc

地址:香港文化博物館(沙田文林路1號)
展覽日期:即日至2022年11月21日
入場費:標準票$10;團體票$7;優惠票$5

 

Text:HolidaySmart editorial
Photo source:HolidaySmart
Featured for:香港文化博物館

**本文章的圖片均經其本人或其公司授權,其他媒體不得轉載

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel