60歲杜德偉登台跳唱獲激讚似30歲分享凍齡之道表演竟因「00後」落敗?

By Moon Lam on 28 Sep 2022

Digital Content Writer

杜德偉因參加內地節目《披荊斬棘2》人氣急升，有關佢既話題不斷，特別係凍齡外表同身材引起網民關注，佢近日接受內地媒體訪問，分享工作、家庭同生活、仲透露保養秘訣！

Photo from IG＠alexto_dudewei

第一季本身有份！？

現年60歲既杜德偉因為參加《披荊斬棘2》而引起唔少話題，唔少觀眾大讚佢認真敬業、唱跳俱佳、愛妻號等。佢係節目中透露其實節目第一季已經有搵佢做「哥哥」，不過當時因為愛子要報考小學，所以要留係佢身邊陪佢面試而錯過，今次終於係第二季亮相，雖然未至於爆紅，但佢表示路人同粉絲係街上撞到佢都熱情好多，令佢感到開心。

Photo from IG＠alexto_dudewei

60歲唱跳俱佳寶刀未老

有留意節目既觀眾同網友大多都係被杜德偉對舞台既認真「吸粉」，首次公演同曾比特同另外兩位哥哥一組唱跳《紅雲袍》，除左積極練習唱跳、親身上陣指點其他隊員演戲之外，更為左表演而動用自己資源，係短短三日內完成超高還原度既表演服裝，仲「貼錢」邀請Rap老師由北京飛去長沙面對面教學同改編歌曲，真係落足重本！最後表演上無論唱跳都超有水準，寶刀未老！

Photo from 《披荊斬棘2》截圖

舊患復發食藥止痛照上場

作為32位「哥哥」中年紀最大既一位，佢表示對每一個表演都付出唔少感情同心機，自己亦唔會有負擔，將年齡睇得太重要反而會識唔到朋友，不過就直言練習過程非常辛苦。而密集既排練亦令腳踭舊患復發，隊友亦非常擔心佢既傷勢陪佢睇醫生，雖然醫生建議佢做手術，但佢最後都係選擇食藥止痛﹐等演出完成再作打算。

Photo from IG＠alexto_dudewei

高質表演因「無人識」落敗

因為有豐富既舞台經驗，杜德偉被隊員稱為「大佬」，雖然佢舞台魅力不減，表演質素亦有目共睹，連其他隊都深感壓力，奈何現場觀眾都係較年輕既一群，對佢比較陌生，最後表演評分以第8名墊底，要淘汰兩名隊員，令佢非常自責，忍唔住落下男兒淚。

Photo from IG＠alexto_dudewei 截圖

Photo from 《披荊斬棘2》截圖

陳小春30年前做過佢伴舞！

係近日播出既一集入面杜德偉同陳小春既聯盟合作，係選擇舞台時雖然杜德偉猜拳落敗，正打算灑脫地上場，但因為杜德偉腳傷仲未好返，陳小春就自告奮勇完成今次舞台，揭露兩人30年前既緣分。原來陳小春係30年前做過杜德偉既伴舞，兩人認識多年，所以唔想兄弟帶傷上陣，令人不禁讚嘆哥哥之間既真摰友誼。

Photo from 杜德偉微博

分享凍齡之道？

杜德偉出道多年，至今已經年過半百，但仲表演到咁高質素既唱跳舞台，早前上載假日泳照，皮膚光滑同一身健美肌肉，令唔少觀眾激讚佢似30出頭！面對眾人好奇佢既保養之道，佢就回應「真的沒有」。對此佢表示可能成長背景令佢保持到心態年輕，從小就係家中年底最細，自入行後亦備受關愛，即使太太比佢細24年，都係對方非常細心咁照顧自己，就連年齡不相上下既外父外母亦仍然當佢小孩。