東鐵車廂鬧出「讓座」事件，2名媽媽要求乘客讓座給小朋友？！事後發長文解釋：大家對關愛座的定義不同！
讓座問題經常都成為網民熱話！近日，網上就瘋傳一段於東鐵車廂內拍攝嘅影片，有指2名媽媽帶同3名小孩上車，其後女子要求坐喺度嘅男乘客讓座，但對方拒絕而引發爭吵；最終列車暫停行駛，需要港鐵職員介入幫手。其後兩位「台灣媽媽」就托人解釋事件，令大家對關愛座嘅定義再次受到關注！
Photo from 「大埔TAI PO」 FB群組
東鐵車廂內出現「讓座爭議」！
今次發生「讓座爭議」事件嘅地方係香港東鐵車廂內，有指2名媽媽分別帶著3位小朋友上車，並同時推住BB車以及兒童用嘅滑板車。不過其後有人要求坐喺度嘅一名男乘客讓座俾小朋友，不過男乘客卻一口拒絕，令佢哋開始發生爭吵。
Photo from 「大埔TAI PO」 FB群組
2名媽媽要求乘客讓座俾小朋友？
根據網民喺FB上載嘅影片中所見，當時2名媽媽依然同男乘客嗌緊交。不過身穿黃色背心嘅媽媽已經同其中一名小朋友坐低咗，而身穿淺藍色衫嘅媽媽就話「小朋友同老人家有優先座，都要坐」，並解釋想乘客讓座嘅原因「小朋友驚跌親啊嘛！」
Photo from 「大埔TAI PO」 FB群組
雙方互相拍片，激動大喊：不要拍我小孩！
其後坐喺度嘅媽媽因為發現乘客正嘗試用手機拍低小朋友嘅樣貌，令佢突然激動咁企起身咁大喊「你細路仔都影！」，不禁開始用普通話批評拍片者「憑什麼拍我小孩！」，仲疑似想用手搶過對方嘅手機。同時間，車廂內嘅其他乘客就已經「㩒鐘」向車長報告事件。
Photo from 「大埔TAI PO」 FB群組
Photo from 「大埔TAI PO」 FB群組
最終列車於大學站停駛，需由港鐵職員協助
最終列車喺大學站短停駛咗一陣，而港鐵嘅職員亦到場了解情況，當中有乘客不滿「停車太耐」而出聲。由於2名媽媽講嘅係唔鹹唔淡嘅廣東話，所以部份乘客誤會二人係內地人，而佢哋就立刻反駁「不要發我小孩就okay了！還有不要以為所有說普通話的都是大陸人」澄清自己係台灣人！
Photo from 「大埔TAI PO」 FB群組
即睇更多人氣文章：
網民不認同「小孩就必須坐」的講法！
片段上載後隨即引起網民熱議！唔少網民都唔太理解呢2名媽媽口中所講嘅「小孩一定要坐」嘅道理，認為若果佢哋真係必須要坐低就應該選擇搭頭等「驚細路仔跌咪攞條孭帶孭住佢囉」、「細細個唔係應該學讓座㗎咩？！」等留言。不過都有部份網民表示理解2名媽媽因為拍攝到孩子而情緒激動，但大部分網民都唔認同佢哋嘅「讓座」理論。
Photo from 「大埔TAI PO」 FB群組
Photo from 《模範的士》劇照
2名媽媽疑似「現身」解釋事發經過
隨住事件嘅熱度不停上升，有網民自稱受呢2名「台灣媽媽」拜託喺FB專頁「屯門友」解釋事發經過，指佢哋上車後用英文禮貌地詢問對方可唔可以讓座，而當時乘客亦願意。其後，該媽媽就向小朋友解釋關愛座係「在台灣我們從小被教育博愛座是老弱婦孺，或許香港的定義不同，但至少在台灣從小就是看到年幼的孩子我們會讓座。」
Photo from 「屯門友」FB
指事件已經交由警方處理
直到有身旁嘅乘客突然詢問2名媽媽「點解一定要讓座俾小朋友」，並開始攞起手機拍攝影片先引起爭吵！最後佢哋表示事件已經交由警方處理，揚言「這位媽媽也沒有勉強任何人應該讓座，他也有詢問對方意願，再者，他只是在跟自己的孩子說話，卻被別人轉身過來教育⋯⋯⋯如果是你，有什麼感覺？」
Photo from 「大埔TAI PO」 FB群組
解釋：台灣從小就是看到年幼的孩子，我們會讓座
雖然「台灣媽媽」們就事件作出解釋，不過網民們似乎都唔理解「嫁咗去香港就跟返香港規矩就係咁多」、「需要 / 請求讓座本身無問題，問題係態度老馮咁，咩國籍都係咁話啦～」等，大家都認為需要人哋讓座並唔係問題，最重要嘅係態度問題！不過都有台灣網民留言表示佢哋都並唔知道「要讓座俾小朋友」嘅定律。
Photo from 「屯門友」FB
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
3歲男孩地鐵「爭位」坐女乘客大腿上，家長堅拒道歉：小孩沒有錯！男童一句話被網民批評任性？
28 Sep , 2022
Photo from 微博
網絡瘋傳「杭州地鐵讓座」影片！
過往都曾經出現過唔少因為「讓座」而引起嘅爭執，呢個話題一直都係網民嘅熱門討論話題。日前，網上正瘋傳一條喺杭州地鐵發生嘅影片，當中男童及其家長嘅態度令網民覺得非常過火，但都有部份網民認為男童冇做錯？！
Photo from 微博
3歲男童坐女事主大腿，同行家長「火上加油」？！
據悉，3歲男童喺一進入車廂後就立刻衝去「搶位」，但佢就走到女事主嘅附近嘅位置，並直接坐喺女方嘅大髀，扭動身體時更唔小心碰到佢嘅胸口位置！其後女事主忍無可忍企起身想同男童嘅家長理論，但對方卻居然立刻佔據埋佢嘅座位，令佢當場憤怒批評二人。
Photo from 微博
Photo from 《抓住幽靈》劇照
女事主當場批評二人！
從影片中所見，女事主已經開始同男童嘅家長理論緊，情緒激動咁話「讓他在這裏鬧半天」、「信不信我把你送去派出所（警局）」等；而與男童同行嘅家長就拒絕向女事主道歉，仲反駁「小孩子不懂事嘛」、「你和3歲孩子一樣嗎？小孩沒有錯！」，頓時令氣氛變得更加緊張！
Photo from 微博
Photo from 微博
即睇更多人氣文章：
男童發脾氣：小孩子坐坐還不行啊！
而男童當時已經坐喺座位上不停爆喊，期間亦有細細聲講「小孩子坐坐還不行啊！」而女事主隨即批評大人嘅管教方式，指「小孩就是你們大人在教的，你們（家長）反覆的教他，所以他就可以逃避所有事情！」而在場嘅其他乘客都幫手安慰男童及女事主嘅情緒，最終要由地鐵職員出面調解開先可以！
Photo from 微博
Photo from 微博
最終由地鐵職員幫手調停
據悉與男童同行嘅並非佢嘅父母，因為該女士喺片中話「他（男童）父母在上班」。當地鐵職員到場後，男童嘅家長講述事發嘅經過，但男童依然一臉委屈咁不停話「小孩子還不能坐」，即使到站之後佢扭計話「再坐一站才下車」，令同行嘅大人都無晒辦法！
Photo from 微博
Photo from 微博
網民批評男童態度！
呢段影片迅速喺網上瘋傳，唔少網民都認為男童嘅行為的確非常任性「不小心撞到人就應該要道歉」、「長大後真的不得了」等，男童任意妄為嘅態度受到網民批評！部份網民就覺得男童嘅外型或者口吻根本唔似3歲小朋友，從言談間可見佢根本就係恃住自己年紀少，所以先會直接「搶位」。
Photo from 微博
Photo from 《幼兒園》劇照
大人管教問題成主因？！
而大部分網民都將問題歸咎落大人嘅管教方式上，認為大人毫無歉意嘅態度都非常有問題「連男童的家長都覺得沒問題」、「這家人也太奇怪了」等。但有少部分嘅網民就覺得女事主講話太大聲，反而會嚇親小朋友，仲認為3歲嘅男童應該只係唔小心碰到佢嘅心口，絕對唔係專登？！
Photo from 微博
Photo from 《BB來了》
Photo from 微博
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
