download HolidaySmart 假期日常 app
盤點7個關於飛機的冷知識!座位上方三角形標誌有隱藏含義/高空下會影響味蕾?

盤點7個關於飛機的冷知識!座位上方三角形標誌有隱藏含義/高空下會影響味蕾?

生活熱話
By Stephanie on 01 Oct 2023
Digital Content Writer

自從開關後,好多港人都出埠搭飛機解「旅行癮」~不過其實飛機上隱藏住好多大家未必知道嘅細節位㗎!宜家等我哋為大家搜集7個飛機冷知識,你哋又知道幾多個呢?!

以下為大家搜羅7個搭飛機嘅冷知識~Photo from 《特務搞飛機》劇照

1. 飛機座位上方「三角形」標誌

台灣中華航空早前喺FB出post向大家分享獨特嘅飛機小知識,指機艙內某些座位嘅上方會有好細嘅「三角形」記號,但原來呢個記號係「專門為空服員設置的」!華航解釋由呢個座位嘅窗戶向外看嘅視角會係最廣,等機組人員可以迅速留意機翼嘅情況並向機師匯報。唔少網民都立刻錯重點咁話「以後都要選擇這個座位了!」,希望可以欣賞廣闊嘅天空景~

原來飛機座位上方擁有三角形嘅標誌,即係代表該座位嘅窗戶所望到嘅景色係最廣嘅?!Photo from 華航FB

2. 機上的濕度與沙漠差不多

唔知大家有冇發現喺搭飛機嘅時候皮膚特別易乾呢?原來機艙內加壓空氣嘅濕度一直都保持喺20%以下,同非洲撒哈拉沙漠嘅平均濕度差唔多!而喺乘搭飛機嘅時候,體內每小時大約會流失220克嘅水分,所以大家記得要定時補充水分,尤其係搭長途機!

喺飛機內,人體體內嘅水分流失得好快,所以要記住飲多啲水啊!Photo from TVB

喺飛機內嘅濕度同非洲沙漠嘅濕度差唔多!Photo from 《繼承者們》

3. 總是從飛機左側登機?

其實大部分飛機都會係左側登機,原來係源於航海時期嘅安全原因!為咗令船隻泊岸時冇咁容易相撞,所以船隻都統一以左邊靠岸,而飛機亦因為安全理由而順從呢個守則。直到宜家,大部分嘅飛機依然選擇跟從呢個守則,喺左邊上落客及行李;右邊嘅下方則有維修人員負責加油、檢查等工作,令工作嘅效率變得更快。

大部分飛機都係喺左側上機,跟隨過往船隻停泊岸邊嘅規矩Photo from 《拖行李箱的女人》劇照

即睇更多人氣文章:

4. 飛機窗底部有小洞

據悉飛機窗底部嘅小孔就係「呼吸孔」,由於機艙內嘅空氣係加壓過嘅,機內較高嘅氣壓將會從呢個小洞排出。若果小洞嘅作用達到極致,最先裂開嘅將會係外面嘅玻璃窗,咁就可以保持機艙依然係密封及安全!另外呢個小孔亦可以防霧及排濕,令大家可以繼續欣賞窗外嘅美景~

而飛機窗嘅底部有個小洞,係為咗排走高氣壓,以及防霧排濕。Photo from 《特務搞飛機》

5. 飛機座位與窗戶不對齊

據悉好多航空公司嘅座位同窗戶唔對齊,全因為利益問題!喺航空公司嘅角度方面,佢哋當然希望能夠增加一架飛機所乘載嘅客人數量,所以為咗能夠擁有更多嘅座位而調節座位之間嘅間距。根據外國網站指出,喺1975年時飛機座位腳部空間平均係88.9cm;直到2015年已經減少到得平均78.74cm。

飛機內嘅座位同窗戶對唔齊,全因航空公司想整多啲座位?!Photo from 《緊急迫降》劇照

6. 起飛及降落時將燈光調暗

美國飛行員Patrick Smit曾經喺佢嘅著作《駕駛艙機密》(Cockpit Confidential)解釋原因,指將燈光調暗係為咗令乘客嘅眼睛適應黑暗嘅環境;一旦突然遇到事故導致失去電力都能夠令大家尋找到逃生嘅方法,而呢個時候著燈嘅緊急標誌亦會變得更加清晰!同樣地每次起飛或者降落時都需要打開窗戶,當遇到緊急情況時大家都能夠依靠自然光逃走!

飛機起飛及降落時都會將燈光調暗,原來係同安全問題有關!Photo from 《緊急迫降》劇照

7. 飛機餐特別不好吃?

唔知大家又鍾唔鍾意食飛機餐呢?!其實當我哋喺加壓嘅機艙裡面時,我哋對甜味及鹹味嘅感知能力將會變得遲鈍,令大家都覺得食物好似冇咩味咁~而且機艙內嘅低氣壓及濕度都會影響到我哋嘅嗅覺,令大家喺進食時真係會出現味道差異!

原來喺高空之下,大家嘅味蕾及嗅覺都會變得遲鈍!Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel