北海道雲海平台夢幻Tenbou Cafe，雲朵主題食物+飲品超IGable！另設有6大觀景設施

Digital Content Writer

去旅行當然唔少得去擁有優美環境嘅餐廳/cafe打卡～位於北海道嘅星野TOMAMU度假村嘅「雲海平台」就有一間被譽為「最接近天堂」嘅咖啡廳「UNKAI TERRACE Tenbou Café」，店內嘅食物大多以雲朵做主題，而且仲可以欣賞無邊際嘅雲海，絕對值得一去！

Photo from 雲海テラスFB

北海道雲海平台咖啡店「Tenbou Café」

位於北海道大型度假村、星野集團旗下嘅著名景點「雲海平台」（雲海テラス）係其中一個打卡熱點，而觀賞區嘅咖啡店「Tenbou Café」亦成功吸引唔少旅客慕名而來！由於雲海平台嘅高度為海拔1088M，所以客人能夠一眼望晒成個靚景，若果冬天去仲能夠欣賞到迷人嘅雪景～

Photo from 雲海テラスFB

Cafe內所出售嘅食物都以「雲朵」作為主題，最出名嘅就有「雲海棉花糖梳打」、「霧冰咖啡」、「白雲雪糕」等，少女心爆棚！精緻嘅食物配上超夢幻嘅雲海景色，輕輕鬆鬆就可以影到超靚嘅打卡相～

Photo from 雲海テラスFB

Photo from Pinterest

除咗呢個咖啡廳之外，「雲海平台」喺今年5月剛剛翻新完畢！第1層嘅觀景平台變得更加闊，就咁睇大家就好似置身於雲海之中咁；而旅客仲可以喺第3層俯視日高山脈嘅景色，真係令人流連忘返～

Photo from 雲海テラス

而本身「雲海平台」都已經擁有6大觀賞靚景嘅設施，包括「Cloud Walk」係其中一個離雲海最近嘅觀景台，等大家可以體驗於雲海漫步嘅感覺～而「Sky Wedge」就係一個V字形嘅觀賞台，係俾遊客打卡影相嘅好地方！

Photo from 雲海テラス

「Cloud Pool」採用懸浮嘅概念，使用高強度嘅網製作而成；離地大約8公尺高，一次能夠容納大約10個人嘅重量！另一個「Cloud Bed」就係以大小不一嘅圓形軟墊所堆成嘅小角落，等大家可以挨喺度望著藍天白雲，享受悠閒嘅一日～

Photo from 雲海テラス

「 Contour Bench」則位於山丘位置，提供大量長椅俾大家坐喺度欣賞美景。而喺2019年開幕嘅「Cloud Bar」有一個長度約13公尺嘅吧檯及高3公尺嘅高腳椅，飽覽成個夢幻雲景。

Photo from 雲海テラス

星野リゾートトマム雲海テラス

纜車費用：1,900日圓（星野TOMAMU度假村住客可免費乘搭）

雲海平台官網

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel