傳大台邀請佘詩曼/楊茜堯回巢拍現代版宮廷劇！二人2009年合作拍《宮心計》創收視佳績

By Stephanie on 01 Nov 2022

Digital Content Writer

今年已經唔少大台藝人離巢，當中大多數都係女藝人，而近日Do姐（鄭裕玲）、唐詩詠等人都決定往外闖。有傳大台為咗挽救局面，不惜重金邀請佘詩曼、楊茜堯（前名楊怡）一齊拍攝新劇，希望幫手挽回劇集收視率？！

Photo from TVB

大台藝人離巢熱潮

大台藝人今年似乎掀起一陣「離巢熱潮」，截止9月為止已經有至少15名藝人約滿後離開電視台。喺10月，為大台效力40年嘅鄭裕玲（Do姐）亦決定離巢，表示若果將來有合適嘅節目唔排除會再合作；而近年備受力捧嘅唐詩詠都決定離巢，據悉當時高層曾落力挽留，可惜對方去意已決。儘管如此，近日唐詩詠都有份出席劇集《超能使者》嘅宣傳活動，相信佢同大台係「和平分手」。

Photo from 鄭裕玲IG

Photo from 唐詩詠IG

將會重金邀請佘詩曼、楊茜堯回巢？

有傳大台為咗挽救現時「女藝人不足夠」嘅問題，決定重金邀請過往嘅2大花旦佘詩曼及楊茜堯（前名楊怡）回巢拍戲，打算走雙女主角路線，等兩位好戲之人再度喺劇集中大晒演技～

Photo from 楊茜堯IG

Photo from 佘詩曼微博

二人再度合作拍劇？

據悉，呢套劇集名為《新聞女郎/新聞女王》，並由鍾澍佳監製，劇本係參考美劇《晨早直播室（The Morning Show）》。鍾澍佳監製曾接受媒體訪問承認寫緊劇本，不過暫時就尚未決定演員名單。睇嚟真係有機會見到2位再次同台鬥演技喇～

Photo from 《The Morning Show》

即睇更多人氣文章：

港媽帶4歲女兒遊日本被迫滯留？大呻因航空公司大意導致未能返港，卻反遭網民批評？

男友獨自旅行原來係去整容？質問下解釋背後原因港女知真相後超震驚

2009年《宮心計》合作收視超高！

佘詩曼同楊茜堯對上一次合作已經係2009年《宮心計》，平均收視為34點，大結局嘅收視更達到50點，被網民稱為「大台神劇」之一！當年劇集仲成功令佘詩曼及楊茜堯一齊獲提名做「最佳女主角」，可惜二人最終都係輸咗比《巾幗梟雄》嘅鄧萃雯；而楊茜堯則獲得「我最喜愛電視女角色」。

Photo from TVB

佘詩曼離巢後北上發展吸金力強！

不過隨住二人發展方向唔同，現時佢哋甚少有機會合作拍劇。離巢6年嘅佘詩曼近年北上發展，喺2018年憑內地古裝劇《延禧攻略》「嫻妃」一角，於內地嘅知名度大幅上升，工作機會增加，吸金力極強！據悉，佢喺香港坐擁4個物業，身家亦過億，絕對係圈中嘅小富婆～

Photo from 《延禧攻略》

Photo from 佘詩曼微博

楊茜堯婚後專心相夫教子

另一方面，楊茜堯喺2015年時曾傳出因為唔肯續約，而導致被大台雪藏；直到2016年佢正式離巢，主力發展舞台劇事業及北上工作。之後佢亦曾以部頭合約短暫回巢拍攝，喺2020年佢誕下囡囡「小珍珠」，再於2020年誕下兒子Eden，現時將重心集中喺照顧家庭。而佢最近出現嘅劇集為《家族榮耀》，喺今年初播出，而佢丈夫羅子溢都有份出演。