《中年好聲音》入圍名單出爐!至少9位都「有背景」!屯門娜娜/李玟姐姐李思林

《中年好聲音》入圍名單出爐!至少9位都「有背景」!屯門娜娜/李玟姐姐李思林

電視電影 娛樂新聞
By Stephanie on 04 Nov 2022
Digital Content Writer

無綫近年似乎非常熱愛舉辦選秀節目,近日為咗鼓勵唔同年齡層嘅觀眾追夢,大台正預備拍攝《中年好聲音》引起熱議。經過重重嘅面試關卡,節目組成功選出100位參賽者入圍,而早前公開咗其中38位參賽者嘅身份,其中有好多位參賽者本身已經高人氣,部份人嘅屋企人都係名人嚟㗎!

《中年好聲音》已經選出100位入圍參賽者,當中有38人出席咗記者會。Photo from 東張+

大台全新選秀節目《中年好聲音》招募參賽者,反應熱烈,逾3千人報名參加大戰歌喉。近日,節目組成功從中選出100位參賽者進行比賽;其中有38位參賽者喺昨日(3日)出席記者會,首次同大眾見面!而比賽評審肥媽(Maria Cordero)、車婉婉、資深音樂製作人伍仲衡、唱片監製張佳添等人都一齊出席,人脈超廣嘅肥媽仲搞笑咁話「哇!一嚟到咁多識嘅人嘅」,可見參賽者都「份量十足」!

《中年好聲音》嘅評審有:肥媽、車婉婉、資深音樂製作人伍仲衡、唱片監製張佳添Photo from 東張+

「屯門娜娜」

當中喺面試期間已經人氣極高嘅「屯門娜娜」(董幸兒)亦成功入圍!佢表示收到入圍通知嘅電話時非常興奮,冇諗過自己最終真係能夠入圍;仲話將來可能會喺表演時加入舞蹈,務求展現最好嘅一面~

人氣極高嘅「屯門娜娜」成功獲得參賽資格!Photo from 東張+

佢坦承冇諗過可以成功入圍,感到非常高興!Photo from TVB

李思林(李玟姐姐)

歌手李玟(Coco)嘅二家姐李思林(Nancy)都入圍,佢曾經喺1992年參加香港小姐競選!佢喺接受訪問時表示心情緊張,直言自己好少參加類似比賽「對上一次喺評判面前表演已經係30幾年前。」揚言過往自己並冇參加歌唱比賽係因為怕有壓力,但宜家佢已經下定決心要踏出第一步喇~

李玟嘅二家姐李思林成功入圍!Photo from 東張+

渴望突破自己而決定參賽!Photo from TVB

不過Nancy表示其實妹妹李玟尚未知道佢參加比賽,但佢亦深信家人會全力支持佢。佢坦承「我本身推薦我大家姐參加,但佢話唔好啦壓力好大㗎,有個咁出名嘅啊妹(李玟)」,令Nancy決定想展現另一面俾觀眾睇「俾個機會我展示下俾大家睇!」

Nancy表示大家姐因為擔心妹妹李玟人氣太高,驚太大壓力而唔敢參加比賽!Photo from 李玟微博

即睇更多人氣文章:

陳早怡(陳欣健女兒)

陳早怡坦承自己喺最後一刻先通知爸爸陳欣健參賽嘅消息,而佢謙虛表示自己唱歌並唔叻,當初亦只係同2位朋友參加嘗試下,點知卻竟然成功入圍,令佢都感到喜出望外!過往佢只係試過參加多倫多嘅社區歌唱比賽,比賽經驗唔多。

陳早怡(陳欣健女兒)指好遲先通知爸爸參賽嘅消息Photo from 東張+

陳早怡曾經參加過多倫多唐人街嘅社區唱歌比賽。Photo from TVB

曹敏寶(曹敏莉妹妹)

廣告
廣告

剛成為人母嘅曹敏寶獲姐姐曹敏莉極力支持參賽,其實佢同大部分參賽者一樣感到十分緊張「其實呢件事好熱血嘅,到宜家中年呢個階段可能要放棄好多嘢先可以參賽」,認為今次將會係一個美好嘅經歷!

曹敏莉嘅妹妹曹敏寶獲姐姐支持參加比賽Photo from 東張+

睇得出姐妹間嘅感情非常好!而曹敏寶亦剛成為人母Photo from 曹敏莉IG

《愛回家》「賈名媛」邱芷微

大台藝人邱芷微最為人熟悉嘅角色係《愛回家》裡面嘅「賈名媛」,喺劇中經常同林淑敏大鬥一番。佢曾於IG上載千字文指自己2007年參加過唱歌比賽「估唔到我第二次參加比賽,雖然初衷不變,但係已經變成「中年」這個category 」揚言雖然只係得男友一人支持,但都希望透過節目追夢!

《愛回家》「賈名媛」邱芷微亦有參賽!Photo from TVB

佢表示周遭嘅朋友都反對佢參加,只有男友落力支持!Photo from 東張+

入圍嘅仲有「黑妹」李麗霞嘅女兒蔡穎秋、JW嘅閨蜜支嚳儀、鄺文珣嘅丈夫應德榮、歌手周吉佩等,位位「有背景」㗎!

「黑妹」李麗霞嘅女兒蔡穎秋Photo from 東張+

JW閨蜜支嚳儀Photo from 東張+

鄺文珣嘅丈夫應德榮Photo from 東張+

出道多時嘅歌手周吉佩Photo from 東張+

「玻璃朱」未能成功入圍?!

而參加面試時引起熱議嘅48歲KOL「玻璃朱」朱庭萱並未有現身記者會,唔知道佢究竟有冇份入圍呢?!當時佢喺面試自稱參加過18區歌唱比賽,仲榮獲灣仔區冠軍;過往曾有人邀請佢去試音但佢卻婉拒對方,令佢覺得成為一生遺憾。喺參加《中年好聲音》面試時,佢表演葉蒨文嘅《我要活下去》,但只係唱咗大約1分鐘就被叮!

「玻璃朱」朱庭萱表示自己攞過灣仔區唱歌冠軍!Photo from 玻璃朱IG

玻璃朱喺參加《中年好聲音》面試時只係唱咗1分鐘就被叮走!Photo from 東張+

大呻表演失準原因

其後仲出post大呻係被電視台嘅安排打亂咗,導致表演失準「入到入面又坐多一個半鐘,勁凍冷氣好彩著咗長袖衫。之後就再安排到試音室門口等,我去咗洗手間出嚟後,突然就同我講我係下一個唱!嘩大佬好突然,兩個幾鐘頭未開過把聲冇講過嘢。又係嗰句,盡做啦。」

玻璃朱疑似不滿電視台面試嘅安排,導致佢最終面試時表現得唔太好Photo from 玻璃朱IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel