樊亦敏鄭伊健逆齡合照！35年前合作檸檬茶廣告，回顧歷代主角

鄭伊健近日喺紅館開演唱會，「三太」樊亦敏亦有到場支持，更公開同伊健嘅合照。兩位雖然都年逾五旬但keep得超好！原來佢哋喺曾一齊拍攝第一代檸檬茶廣告，事隔35年佢哋先終於有一張合照！

樊亦敏與鄭伊健合照，兩人年過50歲仍保養得宜

現年55歲嘅鄭伊健最近喺紅館開演唱會，吸引唔少圈中人到場，「三太」樊亦敏都有現身支持，佢喺IG公開合照並留言：「從上個世紀第一代陽光檸檬茶廣告到現在，我和鄭伊健終於有一張合照」

相中二人都keep得好好，完全睇唔出一個55歲、一個51歲，更有人提議佢哋再合作拍返輯檸檬茶廣告添！其實樊亦敏係1989年嘅廣告女主角，不過早喺1987年佢已出演過檸檬茶廣告，仲同男主角鄭伊健有對手戲，回顧下歷年檸檬茶廣告主角～

1986年：梁佩玲

1986年嘅檸檬茶廣告有好多青春男女出演，其中一位係梁佩玲，現年57歲嘅佢曾出演多套電視劇，佢亦曾飾演1996年版《笑傲江湖》嘅任盈盈。

1987年：鄭伊健

1987年版嘅廣告係校園故事，鄭伊健飾演帥氣校草，但女主角並非樊亦敏，而係Yvonne Yuen，樊亦敏係飾演同伊健打鬧嘅女學生，令女主角Yvonne Yuen呷醋，雖然未有正面，但樊亦敏之後都成為檸檬茶廣告女主角。

1989年：樊亦敏

當年嘅樊亦敏只得18歲，青春無敵，睇返佢1989年嘅廣告，睇得出佢保養得宜！

即睇更多人氣文章：
潮語2022｜0尊、大癲、kam4、點部署12大網絡潮語意思，唔識有代溝？！
東京迪士尼App教學懶人包 線上買Fast Pass/免費預約排隊超方便

1993年：賴沅貞，經典對白「乜咁啱嘅」

講到檸檬茶廣告不可不提1993年版本，女主角係賴沅貞，佢早已唔再喺娛樂圈發展。廣告中一句「乜咁啱嘅」成為經典，連周星馳都喺電影《食神》同鍾麗緹致敬！

1998年：張栢芝、黃宗澤

另一個經典嘅廣告，廣告男主角黃宗澤以飾演游泳小將，同依家都無咩點變，而女主角張柏芝嘅清純形象更令各大電影公司、廣告公司驚為天人，翌年周星馳賀歲片《喜劇之王》張柏芝以同一造型出演女主角，自此踏上演藝之路。

2017年：陳蕾、李拾壹，復刻鄭伊健經典版本

為配合檸檬茶嘅復刻版包裝，廣告亦翻拍鄭伊健牌，但男女主角大變，雖然背景音樂用返1987年版本，不過男主角由鄭伊健變成李拾壹，即時變咗走搞笑路線。

2018年：Dear Jane、蘇皓兒

由Dear Jane主唱主題曲，成個廣告走復古風，不過Dear Jane本身並非後生仔，所以有網民認為廣告無以前嘅青春感覺。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）