東張西望｜公屋樓上倒水氣味超刺鼻！事主疑係漂白水，化驗結果出人意料？！

時事熱話

By Jennifer on 14 Dec 2022

Digital Editor

TVB節目《東張西望》新一集就有住喺葵涌邨嘅馮小姐指佢樓上經常會倒水，但水中有白色粉末，令馮小姐單位嘅窗戶經常留下一條條白色痕跡，加上味道難聞，馮小姐估計係漂白水，不過節目組將成份檢驗後結果卻出乎意料？！

Photo from 《東張西望》

公屋樓上單位倒漂白水？！

有一個好嘅隔離鄰舍十分難得，如果大廈住戶有奇怪行為，其實都會對其他人造成影響。近日住喺葵涌邨嘅馮小姐表示兩年幾前佢就發現大廳嘅窗台經常會有積水，起初佢以為係樓上冷氣機滴水，但後來發現竟然係樓上倒出！

Photo from 《東張西望》

而且水中有白色粉末，絕對唔係一般嘅清水。水中嘅白色物體更黏住咗馮小姐家中嘅窗戶，喺玻璃上留下一道道白色痕跡，十分礙眼，另外亦令窗門非常難打開，馮小姐稱最近樓上倒水次數越嚟越頻密，令佢不勝其煩。

Photo from 《東張西望》

由於樓上倒水附有漂白水嘅刺鼻味道，馮小姐曾經做實驗，將一條藍色毛巾放喺窗外，結果一夜間毛巾就甩色，令馮小姐認為樓上倒嘅係漂白水。

Photo from 《東張西望》

外牆出牆身剝落嘅情況！

馮小姐更觀察到大廈外牆出現大片疑似白色痕跡，甚至出現牆身剝落嘅情況，馮小姐更相信樓上倒嘅係漂白水。節目組就訪問咗專家，專家表示漂白水經過長時間積累，變乾後的確有機會留低白色嘅物體或痕跡，但大廈外牆一般都係混凝土，石屎對鹼性嘅抗性非常好，如果唔係長期、大量傾倒漂白水，對外牆嘅影響其實唔大。

Photo from 《東張西望》

馮小姐稱漂白水氣味刺鼻影響健康

馮小姐稱佢身體亦受到樓上倒「漂白水」影響，刺鼻嘅味道令佢鼻腔都覺得好痛，另外最近佢都起皮疹，表示情緒受到壓力。馮小姐樓上係空置單位，而再上一層就有人居住，馮小姐懷疑「漂白水」嚟自該單位。

Photo from 《東張西望》

樓上單位住戶拒回應倒漂白水

節目組上樓上竟恰好撞到該單位住戶出門，立即上前詢問，不過主持人梁敏巧提到「倒漂白水」後，樓上住戶即刻「耍手擰頭」拒絕回應，梁敏巧一直追問：「點解要咁做？」對方都無回答，一直搖手，更將手指放唇上做出「安靜」手勢，最後更衝入後樓梯避開節目組。

Photo from 《東張西望》

化驗結果出人意料！竟無漂白水成份

為咗證實樓上倒嘅係漂白水，馮小姐喺家中唔同嘅窗戶採集樣本並交由節目組轉交去化驗。經化驗，5個樣本都發現無漂白水成份，不過專家指出漂白水長時間放喺室外，有陽光、空氣嘅情況下可能已還原成普通嘅鹽，可能未必能檢測出漂白水成份。

Photo from 《東張西望》

設置遮擋物但仍然影響馮小姐

節目組通知馮小姐有關結果，佢亦十分意外，馮小姐坦言如果唔係漂白水嘅話佢更擔心樓主唔知倒啲咩落嚟。馮小姐決定向屋邨辦事處備案，職員表示同過樓上住戶溝通，傾過兩次對方從來都無承認佢做過有關行為，最終職員指會喺相關單位設置遮擋物，雖然情況略有改善，但仍未徹底解決，馮小姐指佢可能會去其他地方住半年，雖然想返屋企，但實在太討厭家中會聞到嘅刺鼻味道。