【日本旅行】日本九州甜蜜出遊放閃 熊本天草拍拖必去浪漫景點

【日本旅行】日本九州甜蜜出遊放閃 熊本天草拍拖必去浪漫景點

旅遊攻略 日韓旅遊
By Susan So on 15 Dec 2022
Project Assistant

情人節想拍住拖甜蜜遊日本放閃,但又怕東京、大阪食買玩之旅唔夠浪漫,悶親寶寶?大可去日本No.1戀人聖地熊本天草。天草由下島、上島2個主島同120座島嶼構成,當地天然資源豐富,不但有大自然壯闊嘅絕美景色,亦有近海即時捕獲嘅海鮮、產地新鮮蔬果、美食美景共冶一爐。而天草嘅心型石、心型樹等拍拖必去甜蜜打卡景點,都係唔少情侶必到嘅婚攝最佳位置!

熊本天草3日浪漫遊提案

Day1:mio Camino AMAKUSA→Amakusa Gokyo Cruise→湯島(談合島)→日の出荘

Day2:龍ヶ岳展望所石→水天→おやつ家 菓音→HOTEL RYUGU→サンはらいっぱい 

Day3:千巌山展望所→L'isola Terrace Amakusa 

 

天草登貓島 搵心型樹打卡

唔少貓奴會選擇嚟日本嘅貓島,享受被成群貓咪包圍,超幸福!喺天草嘅湯島(談合島)就係一座貓比人多嘅小島,隨處可見200幾隻貓大爺喺到歎世界!呢座周長僅約4公里嘅離島,貓神石像、貓型路牌等多個打卡位大多集中喺碼頭一帶,島上仲有被視為戀人聖地嘅「♥の木」心型樹同被「日本浪漫主義者協會」認證為日本戀人燈塔嘅湯島燈台。

被視為戀人聖地嘅「♥の木」心型樹就喺碼頭不遠處,唔少日本情侶會喺呢到拍攝婚照!Photo from 遊日職人

落船即有大量唔怕人嘅貓咪歡迎大家,貓大爺們會直衝向大家求摸摸!Photo from 遊日職人

湯島設有唔少貓咪銅像、貓屋,真係好似「貓天堂」。Photo from 遊日職人

同其他貓島相比,慵懶嘅貓大爺隨處攤唞,又鍾意求摸摸,好明顯呢到嘅貓咪有被好好善待。Photo from 遊日職人

島上處處可見貓裝飾,就連路牌都有貓咪圖案,貓奴絕對會影相影到停唔到!Photo from 遊日職人

湯島(談合島)

地址:熊本縣上天草市大矢野町湯島

 

貓星人鬧鐘Calling 睇天草最美日出

前往貓島嘅接駁渡輪船程只需半小時,每日往返共有10班,不過強烈建議大家可以喺島上民宿住1晚。「日の出荘」呢間民宿由漁民主理,傳統樸實榻榻米房間均連接向海嘅小露台,朝早會有貓咪喺窗外Morning Call,叫醒大家去睇天草最美日出。

客房都喺民宿二樓,裝潢樸實,雖然房間無浴室,但可以到樓下嘅貸切溫泉泡湯,整個體驗就好似去咗日本人屋企作客一樣。Photo from 遊日職人

朝早會有貓星人喺連接房間嘅小露台做鬧鐘叫醒大家。Photo from 遊日職人

小島嘅日出同日落風景美不可言,強烈建議大家可以喺島上民宿住一晚。Photo from 遊日職人

民宿老闆係漁民,晚餐都係佢出海捕捉嘅新鮮漁獲,海鮮大餐用料豐富。Photo from 遊日職人

日の出荘

地址: 熊本縣上天草市大矢野町湯島913

電話:+81-(0)964-56-4075

房租:2人1室 1泊2食 每位¥11,000/HK$632起

交通:熊本站坐「快速天草號」直行快速巴士喺「上天草SANPARU」站落車,步行5分鐘到「江樋戶港」坐船約25分鐘,從碼頭步行5分鐘即達

 

遊船河睇天草五橋

天草五橋係當地人日常生活中心,加起來全長12公里嘅橋樑,完美將矢野島、永浦島、大池島、前島同天草上島5個島與九州本土連接起嚟。想盡覽天草諸島同天草五橋可參加天草五橋巡航,半個鐘航程會穿越橋底仰望五橋及近距離觀望小島,而日落時分嘅特別班次「日落巡航」更可睇盡入選「100選日本的夕陽」嘅美景。

坐上天草五橋巡航遊船河,即可近距離欣賞天草五橋以及天草小島互相映襯出嘅美景。Photo from 遊日職人

天草五橋嘅天門橋(1號橋)到松島橋(5號橋)之間嘅國道被稱為天草珍珠線,擁有風光明媚嘅景觀。Photo from 遊日職人

半個鐘嘅航程會穿越橋底仰望五橋及近距離觀望小島。Photo from 遊日職人

天草亦係釣魚發燒友嘅天堂,無人島同岩礁上嘅釣魚友會喺遊艇經過時同大家揮手示好。Photo from 遊日職人

Amakusa Gokyo Cruise

地址:熊本縣上天草市松島町合津6215-17(mio Camino AMAKUSA内)

電話:+81-(0)969-56-2458

營業時間:8:30am-5:30pm

交通:喺熊本站坐前往「天草(本渡)」直行快速巴士喺「前島」站落車,步行1分鐘

 

踩單車蜜遊 天草輕鬆攻頂路線

喜歡運動嘅情侶們可以喺「mio Camino AMAKUSA」租借單車,孖住踩單車前往可俯瞰天草諸島嘅千巌山展望所。路線大約3.3公里,由海邊踩到上山唔洗半個鐘,再沿住停車場旁邊嘅步道行路約1公里,步行5分鐘就已登上最高嘅觀景台,相當輕鬆。

沿路景色有山有海,由於部分路段要上山,大家想再輕鬆啲就可以租用電動單車。Photo from 遊日職人

標高162米嘅千巌山展望所,可以俯瞰天草諸島嘅優美景色。Photo from 遊日職人

千巌山展望所

地址:熊本縣上天草市松島町合津

交通:從「mio Camino AMAKUSA」租車處踩單車前往約30分鐘

 

天草近海有口福 抵食鮮活海鮮丼

四面環海嘅天草得天獨厚,當地嘅壽司店可以使用近海捕獲、價廉物美嘅新鮮海產。深受街坊歡迎嘅水天係當地老店,主要供應定食同海鮮丼,1日限量供應20碗活海鮮丼,有齊當地特産車海老、海膽及天然鯛刺身,份量極豐富。

活海鮮地魚丼¥1,600Photo from 遊日職人

原條池魚刺身定食¥1,500Photo from 遊日職人

水天

地址:熊本縣上天草市大矢野町中2524

電話:+81-(0)964-56-0098

營業時間:11:00am-2:30pm、5:00pm-9:0pm,周三休息

交通:從「mio Camino AMAKUSA」租車處自駕前往約10分鐘

 

甜上癮 賣萌貓型朱古力

喜愛貓咪嘅店主原來係嚟自天草湯島,佢所製作嘅甜點理所當然係超可愛嘅貓形!甜點使用天草農家嘅食材,招牌嘅貓形生朱古力蛋糕特別配上天草海鹽嚟提味,入口即溶,甜而不膩!

貓形朱古力蛋糕¥820Photo from 遊日職人

巴斯克芝士蛋糕(連飲品)¥800Photo from 遊日職人

おやつ家 菓音

地址:熊本縣上天草市大矢野町上1478三習堂店舗2F

電話:+81-(0) 964-27-9787

營業時間:10:00am-2:00pm、3:00pm-8:00pm

交通:從「mio Camino AMAKUSA」租車處自駕前往約12分鐘

 

奢華溫泉旅館 天草浪漫海外婚禮

相信係全天草最難訂房嘅人氣溫泉旅館 ,喺天草合共有本館「HOTEL RYUGU」、別館「天使之梯子」及最奢華嘅旅館 「天空の船」外,仲擁有自家教堂同婚宴禮堂。難得旅館坐擁無遮擋嘅天草海景同大片綠油油嘅後花園,唔少情侶會特登嚟拍婚照同舉行海外婚禮,留下一生難忘嘅回憶!

擁有自家教堂同婚宴禮堂,可以影到大量靚景作背景嘅婚照。Photo from 遊日職人

教堂被天草之海包圍,喺呢到能夠享受一生人難忘嘅美好證婚儀式。Photo from 遊日職人

毗鄰本館嘅仲有更高級嘅別館「天使之梯子」,房內擁有自己嘅獨立私人溫泉。Photo from 遊日職人

HOTEL RYUGU 

地址:熊本縣上天草市松島町合津6136

電話:+81-(0)969-56-3333

房租:2人1室 1泊2食 每位¥18,100/HK$1,042起

交通:從「mio Camino AMAKUSA」租車處自駕前往約2分鐘

 

長過前臂!燒天草大王雞翼

唔好以為天草只有海鮮高質,其實呢到仲有被美食家視為最佳地雞嘅天草大王!獲得米芝蓮推介嘅「サンはらいっぱい」,就係以天草大王料理作主打, 招牌名物燒雞翼長過前臂,勁誇張!

天草大王 大手羽先¥700Photo from 遊日職人

天草大王刺身 ¥1,300Photo from 遊日職人

サンはらいっぱい 

地址:熊本縣上天草市松島町合津3323-3

電話:+81-(0)969-56-1915

營業時間:5:30pm-10:00pm,周六日及假期12:00nn-2:30pm、5:30pm-10:00pm  

交通:從「mio Camino AMAKUSA」租車處自駕前往約8分鐘

 

情侶蜜遊天草 戀愛成就心型石

位於雲仙天草國立公園嘅「龍ヶ岳展望所」標高470米,可遠眺景色。唔少人會走到山頂斷崖嗰頭嘅巨石影1張驚險打卡照,而拍住拖嚟蜜遊嘅情侶就會嚟戀愛嘅心型石朝聖。

心型石位於「龍ヶ岳展望所」山崖邊,大家影相時要小心。Photo from 遊日職人

前往龍ヶ岳山頂展望所嘅山路,可以睇到好多心型樹葉。Photo from 遊日職人

龍ヶ岳山頂展望所

地址:熊本縣上天草市龍ヶ岳町大道

交通:從「mio Camino AMAKUSA」租車處自駕前往約53分鐘

 

天草浪漫海景餐廳開餐

臨海嘅複合設施「L'isola Terrace Amakusa」,有齊天草特產店、餐廳、酒吧、麵包店同雜貨店,半露天餐廳Plate Cafe L'isola正正面對無敵海景,主廚嚴選當地食材入饌,新鮮度滿分,唔少日本人喺天草舉行婚禮後,喺呢到舉行派對𠻹!

香草鹽麴漬天草鯛魚¥1,880(午餐)Photo from 遊日職人

劃分成室內及戶外位置,海景餐廳環境開揚闊落。Photo from 遊日職人

L'isola Terrace Amakusa

地址:熊本縣上天草市松島町合津北前島6215-16 

電話:+81-(0)969-56-3450

營業時間:9:00am-6:30pm

交通:喺熊本站坐前往「天草(本渡)」直行快速巴士喺「前島」站落車,步行1分鐘

 

落地即租車+單車周遊天草

由熊本坐高速巴士約個半鐘就嚟到上天草市,建議先到觀光交流中心,呢到唔止有齊當地嘅觀光資訊,仲有天草食材及雜貨專賣區、BBQ場同攀岩體驗區,大家亦可以喺呢到租到唔同型號嘅單車同色彩繽紛嘅SUZUKI HUSTLER小車,方便大家自駕遊覽上天草區。

喺一般連鎖租車公司只會得最普通嘅白色私家車,但呢到就可以租到色彩繽紛又可愛嘅HUSTLER。Photo from 遊日職人

想踩單車遊天草一樣得,有齊電動單車、越野單車同公路車可以揀。Photo from 遊日職人

喺觀光資訊櫃枱,有識得中文嘅接待員。除咗觀光資訊外,亦有天草遊覽船購票處。Photo from 遊日職人

mio Camino AMAKUSA

地址:熊本縣上天草市松島町合津6215番17

電話:+81-(0)969-33-9500

營業時間:9:00am-5:30pm、BBQ 10:00am-4:30pm

租金: 電動單車 日租¥1,500/HK$86、租車(SUZUKI HUSTLER)日租¥8,000/HK$460

 

Text:HolidaySmart editorial
Photo source:遊日職人
Featured for:遊日職人

 

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel