王思聰又換新女友，歷任伴侶年齡維持20歲？！最愛網紅臉

娛樂新聞

By Jennifer on 05 Jan 2023

Digital Editor

內地前首富王健林獨生子王思聰感情生活向來豐富，最近佢戀情曝光，女友叫「小肉安」，佢更於網上晒出王思聰嘅相片公開戀情，並「宣示主權」稱呼王思聰為「我可愛的八歲寶寶」。有網民發現王思聰歷任女朋友嘅年齡都非常年輕，基本維持喺20歲左右。

Photo from 微博

中國前首富獨生子王思聰帶大批網紅出巡

王思聰父親係中國前首富王健林，「千億富二代」嘅身份令佢相當受關注，而王思聰本人行事向來高調，更好中意喺網上公開發表意見，但上年佢因為上海封城發言而被禁言，微博帳號被註銷、微信朋友圈及群聊功能亦被永久禁用，此後佢就低調咗好多。

Photo from 微博

雖然王思聰行事低調，但一舉一動依然備受注目！早前佢現身北京環球影城，當時仲有一大班網紅跟隨出入，尤如皇帝出巡！唔少內地網友大呼羨慕！喺出巡之後王思聰沉寂咗一排，最近佢被影到喺海南三亞拖住一位女生，疑似戀情曝光！

Photo from 小紅書

王思聰新女友年僅20歲，稱呼王思聰為「8歲寶寶」

女方嘅身份好快就公開，叫「小肉安」，年僅20歲，亦係一名網紅。小肉安嘅正面相亦曝光，相片似乎係於車廂中拍攝，小肉安更用Hermès手袋出行，十分富貴。網友更拍下小肉安挨住王思聰膊頭嘅相片，兩人感情相當唔錯。

Photo from 小紅書

Photo from 微博

女方仲喺微信朋友圈公開佢哋嘅關係，原來1月3日係王思聰35歲生日，小肉安影住男友並留言：「生日快樂我可愛的八歲寶寶」，語氣盡顯寵溺之情，不過估唔到係女方寵王思聰，更稱呼佢做「8歲寶寶」，果然戀愛會令人不理性。

Photo from 小紅書

歷任女友年齡維持20歲，王思聰成「中國里安納度」？！

新女友公開後，有網民就指王思聰一直以嚟女朋友嘅年齡都維持喺20歲左右，王思聰歷任女友約有20人，其中比較出名嘅有張予曦，佢係演員，同王思聰分手後接拍偶像劇做女主角，人氣持續上升，佢2014年自稱係王思聰女友，但僅一個月後就發文宣佈分手，雖然戀情「見光死」，但佢成功由網紅轉型做演員，堪稱係「王思聰最成功前女友」。