有線出身藝人分享舊照，少女黃翠如獲讚凍齡！N年前嘅有線有陳柏宇？

By Wing Ws on 17 Feb 2023

Digital Content Writer

開台30年嘅有線電視日前（14日）宣布獲政府批准交還本地收費電視節目服務牌照，將於6月1日停播。講到有線電視，除咗「終於cut到」，相信大家對過往播出嘅節目同旗下藝人都有唔少記憶點。有線「熄燈」嘅消息一出，有唔少有線出身嘅藝人紛紛於社交平台發文，並貼出昔日舊照，懷緬喺舊公司工作嘅時光。事隔10多年，有人樣貌青澀，同而家好大分別，亦有人個樣凍齡咁冇變過！

Photo from 潘杰寧 FB

少女黃翠如獲讚凍齡

相信唔少觀眾都睇過黃翠如拍嘅旅遊節目，黃翠如日前貼出於有線拍節目時嘅旅遊照，並指：「這個電視台的八年，遊走了三分一個地球。記錄了我的人生，也讓我經歷了人生，體會生命，也感恩生命。感激可以從這?，得著太多，感受太濃。謝謝在電視台裏每一個陪伴過我的你。」帖文一出，唔少人大讚少女嘅黃翠如天生麗質：「越大越靚」；有唔少網民分享對黃翠如主持過嘅節目深刻片段，表示鍾意節目中直率可愛嘅黃翠如，大讚夠貼地，更有人講笑咁話：「細細個睇你」。

Photo from 黃翠如 FB

洪永城唔記得拉褲鏈？！

講起黃翠如，相信大家都即時醒起佢嘅拍檔洪永城。洪永城同貼出過往旅遊照指：「十八年如一日，同一行工作，無怨無悔。」又講笑咁話「當年cut唔到你哋唯有join你哋」，當中有一張相「唔記得拉褲鏈」，非常搞笑。好拍檔黃翠如都有留言。

Photo from 洪永城 IG

N年前嘅有線竟然有陳柏宇？

當年喺YMC台做主持嘅葉文輝（啤梨）今日都分享曾經喺有線電視拍節目嘅截圖，不過網民就覺得啤梨當時睇落瘦好多！另外，近日有網民分享咗一套YMC台嘅閃卡，當中，着黃黑間條衫嘅年輕版啤梨睇落同而家唔同樣，同陳柏宇撞樣咁，搞到網民誤會：「點解有陳柏宇嘅」。

Photo from 葉文輝 FB

Photo from FB群組 90年代回憶 (新版)

Photo from FB群組文人多說話

潘杰寧分享青澀樣，post真誠感想

現時喺體育節目見到嘅主持潘杰寧，亦曾喺有線出演旅遊節目《活得很滋味》，為人熟知。杰寧昨日（16日）貼出過去嘅舊照兼分享感受：「唔知有幾多 followers 係由有線年代開始睇我主持？有嘅可以留言 say 個 Hi，我估你哋一係睇 #活得很滋味一係睇 #體育王所以識我？可以順便話埋我知」，當時嘅杰寧額前有瀏海，睇落非常青澀！杰寧分享指：「鏡頭前成日笑笑笑，但靜落嚟嘅我，即使係咁耐以前，眼神中都流露住倔強固執，呢種性格令我行嘅每一步路都唔太舒適」，而喺有線電視嘅工作係杰寧畢業後嘅第一份工，4年經驗令佢感悟良多：「嗰時諗住玩幾年冇所謂，依家諗返就發現其實唔係，但絕對冇後悔當年呢個決定，因為我好滿足依家嘅我所擁有嘅經歷、價值觀、堅持、信念。」