TVB童星20歲羅梓龍變美男！冇咗BabyFat練成腹肌！而家做埋老細？！

By Wing Ws on 13 Mar 2023

Digital Content Writer

曾經喺TVB眾多電視劇中飾演主角童年、兒子嘅童星羅梓龍唔經唔覺已經大嗰仔，今年20歲嘅佢已經有5年冇拍劇，改於社交平台展示近況。不過網民就發現記憶中嘅羅梓龍已經唔同晒樣，冇晒往年嘅青澀樣又靚仔咗唔少，上年仲開鋪做埋老細！

Photo from 《逆緣》劇集截圖

2002年出生嘅羅梓龍3歲已經開始做模特兒，曾經拍攝唔少報紙、雜誌及平面廣告嘅硬照，2009年起開始拍廣告、電視劇，至今所參演嘅電視劇逾25部，代表作包括《超能老豆》李思捷個仔谷筱楠（燒腩仔）、《逆緣》中黎耀祥個仔賀嘉誠等，同唔少一線演員合作過，而最後播出嘅作品係《堅離地愛堅離地》中飾演初中生王子駿，當時15歲嘅羅梓龍個樣同細個嗰陣無咩點變，標誌性嘅baby fat加大眼，睇落都係咁可愛！

Photo from 《堅離地愛堅離地》劇集截圖

距離上一套作品相距5年，唔少人都發現羅梓龍個樣有啲轉變，一減青澀嘅少年樣，唔止塊面變尖，IG上更post咗騷肌相，令唔少人心心眼，大讚靚仔！近日，羅梓龍仲晒出同女朋友一周年親密照，睇落好sweet！

Photo from lo.marcus IG

雖然未有喺幕前演出，但羅梓龍不時擔任服裝品牌等模特兒，成片有模有樣。去年1月，羅梓龍仲同屋企人開咗間生酮漢服外賣店，仲有間火鍋店，After Class成員姚婥菲都有撐場。年輕輕輕已經成為老闆，認真叻仔！

Photo from hk__opss IG

Photo from lo.marcus IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

TVB御用童星陳偲穎近況曝光！大嗰咗變清純少女！望大學畢業後參選港姐

3 Feb 2023

TVB有唔少劇集都會用到小演員作為角色嘅仔女、童年人物，講到劇集中出現嘅童星，相信大家對陳偲穎都有深刻印象，6歲入行嘅陳偲穎出演超過25部TVB劇集，如《一屋老友記》嘅菲菲、《跳躍生命線》嘅諾兒等，令觀眾深刻，唔經唔覺大家心目中嘅可愛小妹妹陳偲穎已經15歲，1年多未有出現喺電視上嘅佢睇落仲大嗰咗唔少！

Photo from 陳偲穎 IG

出道9年拍逾25套戲

陳偲穎係家燕媽媽藝術中心培訓嘅童星，6歲入行開始拍劇，第一套拍嘅係楊怡、張繼聰及林夏薇主演嘅《收規華》，飾演林夏薇嘅童年角色。有唔少觀眾熟悉嘅電視劇亦可以見到佢嘅身影，如《宮心計2深宮計》、《金宵大廈》、《白色強人》等，曾演出王君馨、唐詩詠、高海寧等多位女星嘅角色童年，因此被網民稱為TVB「御用童年」。除此以外，亦有獨立角色，包括《一屋老友記》中嘅菲菲、《超能老豆》嘅阿一及《跳躍生命線》嘅諾兒。