【小編試食】邪惡軸心！中環食期間限定鴨肝雙層漢堡，超厚漢堡扒啱哂食肉獸！

人有時候就係想放縱一下，唔使時刻就住就住，想食乜野咪食咗先算，滿足口腹之慾真係好治癒～～邪惡食物多到數都數唔哂，小編今次要介紹一款最新嘅邪惡漢堡！因為漢堡加入咗鴨肝，而且有兩層超厚漢堡扒，同快餐店嘅漢堡比較，簡直大幾個碼啊！

Photo from PressLogic

位於中環嘅ON Dining Lounge，係米芝蓮一星餐廳，最近特設期間限定小酒館Le BistrO by Philippe Orrico，喺午市同晚市時段推出邪惡法式漢堡（＄188）。有別於一般漢堡，因為入面係無蔬菜㗎！名乎其實嘅啖啖肉！

Photo from PressLogic

漢堡當中包括兩塊各重110克、草飼牛肉加入鴨肝打成嘅漢堡扒，然後配上燒過嘅法國芝士同濃郁波爾多牛骨髓醬汁，口感豐富，極為滿足～～雖然加入鴨肝，但份量剛好，食到香味又唔會油膩！

Photo from PressLogic

不過呢個漢堡對於女士嚟講，實在係一個太大嘅挑戰，建議兩個人share，無咁大罪惡感～～（笑）食肉獸一定要去試呀！

Photo from PressLogic

女士們想食得有儀態又light啲？可以叫個二人Afternoon Tea Set（＄398），每日下午3點至5點供應。下午茶塔分咗三層，包括上層英式鬆餅、中層咸食同底層甜品，配咖啡或茶。

Photo from PressLogic

有啲Afternoon Tea Set好睇唔好食，不過呢個就相反，食品幾有質素，小編覺得最吸引係底層嘅甜品啊！每款都好味，而且唔會太甜，大推朱古力蛋糕同榛子泡芙！可能因為係法國餐廳，所以啲甜品咁高質～～

Photo from PressLogic

Photo from PressLogic

On Dining Kitchen & Lounge
地址：中環安蘭街18號28-29樓

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載