《解風東京》杜如風抵玩／食推薦！120蚊有找掃街美食／肉類大滿足拉麵店！（7-8集精選）

By Wing Ws on 16 Mar 2023

Digital Content Writer

TVB今個月播出由杜如風主持嘅《解風東京》介紹唔少疫情3年間新開嘅景點，除此之外，相信大家都發現，杜如風一改以往大買奢侈品嘅風格，多咗唔少平價嘅餐廳／景點，以下就為大家編選咗4個節目中嘅抵玩抵食之地，等大家「返鄉下」有多個行程選擇！

Photo from 《解風東京》節目截圖

押上新開平價迴轉壽司

呢間兩層高嘅迴轉壽司店喺2022年3月開業，店舖以「無接觸」設計，攞壽司嘅時候唔使接觸到個盤，連調味料、餐具都係收埋喺餐枱，店內嘅壽司有唔少款式，淨係壽司都有百幾款，加埋麵、飲品、甜品等，總共有150種餐點，除咗大家食日式料理會嗌到嘅刺身，仲有粟米、漢堡扒等選擇，大人細路都啱！而店內嘅壽司大多係132円（約港幣6元）起，連海膽都係290円（約港幣17元），非常抵食！杜如風覺得激拖羅、三文魚子呢兩款味道唔錯，納豆則較一般。食飽飯，大家要將碟投放到餐枱上嘅回收口作埋單，每5隻碟就可獲得一次抽獎機會，中獎後用手機掃平板上嘅QRcord，就可以玩餐廳出面1樓嘅扭蛋機及2樓嘅射擊遊戲，以獲得扭蛋！

Photo from 《解風東京》節目截圖

グローバル旗艦店押上
地址：東京都墨田區押上1-8-23 1F
營業時間：11:00 - 23:00

人情街120蚊有找掃街美食

杜如風帶大家嚟到下町人情街，挑戰以2000円（約港幣118元）「掃街」！呢條充滿古早味嘅商店街鄰近晴空塔，當中有好多價廉物美嘅街頭美食，杜如風先品嘗咗300円（約港幣17元）6粒「可樂餅球」，「可樂餅球」比起塊狀嘅「可樂餅」更方便進食，不過商店街上大多炸物都唔係即整，未必可以食到熱焫焫嘅炸魚、炸蝦。另外，仲有大過塊面嘅麵包，杜如風以180円（約港幣10元）買咗個栗子包，又平又抵食！而商店街內嘅飲品自動販賣機都係平過市價，全部只需100円（約港幣6元）。日本嘅生果出名貴，杜如風就喺商店街發現600円（約港幣35元）1公斤嘅柑賣，甜度十足！另有串燒店賣90円（約港幣5元）一條串燒，醬汁鹹甜結合，杜如風大讚雞肝串燒好味，最後仲吸引到幕後人員一齊食，味道獲得認可！喺人情街有一間長期有人排隊嘅章魚燒店，店內有各種特殊口味，如醬油、咖哩、pizza、辣pizza、明太子燒、梅子等，杜如風試咗350円（約港幣20元）咖哩味章魚燒，熱辣辣兼有大大粒章魚。最尾，食飽都仲有錢淨，真係勁抵！

Photo from 《解風東京》節目截圖

下町人情KIRAKIRA橘商店街
地址：東京都墨田區京島3丁目

直擊隅田川情人橋

墨田區有唔少新地方畀大家chill吓，隅田川喺2020年6月新開咗一條情人橋，方便大家直接橫渡隅田川，來往淺草同晴空塔。步道橋沿路景色優美，夜晚條橋仲可以見到燈飾，夠晒浪漫！杜如風建議大家喺黃昏嘅時候過嚟，呢個時間嘅景色係最靚！如果大家想加入行程嘅話，不妨行完淺草過嚟，過橋後再去情空塔～

Photo from 《解風東京》節目截圖

すみだリバーウォーク(SUMIDA RIVER WALK)
地址：東京都墨田區向島一丁目1番地 - 台東區花川戸1丁目1番地
交通：東武伊勢崎線「淺草站」北出口歩行約３分鐘或東京Metro銀座線「淺草站」５號出口歩行４分鐘

目黑區肉類大滿足拉麵店

呢間位於目黑區嘅拉麵店，附近幾乎冇乜商店，雖然位置唔顯眼，但間鋪係十間東京市內評分最高嘅拉麵店之一！醬油及鹽味拉麵都係售價1500円（約港幣91元），其中，醬油湯拉麵更被形容為一碗「優雅」嘅拉麵，當中有豬肉、鴨肉、雞胸肉、雲吞、雞蛋等多種配料，極之豐富！濃郁湯底配以吸收醬油湯香味嘅細麵，令杜如風舉手指大讚好味！不過呢間拉麵店每日限量100碗，約下午3點就會賣完，而客人更需提早到場登記，由朝早9:45起分成各個時間段，一般寫到10點半就滿額。所以大家有興趣嘅話，要早啲起身喇！

Photo from 《解風東京》節目截圖

Ramen Break Beats
地址：東京都目黒区目黒4丁目21−19

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

《解風東京》杜如風由平民市集玩到頂級豪食！走入職人市集/享受頂級和牛（3-4集重點）

13 Mar 2023

一連15集由杜如風主持的J2旅遊新節目《解風東京》播出至今一直大受好評，觀眾們都期待每晚跟著杜如風喺東京四圍飲！飲食食，而過去嘅一星期播出嘅幾集更加由當地人最愛行嘅市集，去到新宿最頂級嘅和牛專門店，第三集集中於豐島池袋，而四集則重點推介原宿、新宿及表參道，睇唔切嘅朋友仔就等我哋一齊嚟個回顧喇！

1）平民生蠔專門店

所有生蠔都係當日新鮮入貨，店內更有售由北海道到九州的生蠔品種，根據唔同嘅生蠔去用唔同煮法去料理，既可以生食又可以清蒸，而且價錢親民，蒸蠔/燒蠔放題只需要3980日圓 (約港幣$228)，足足可以食夠100分鐘！既可生食，又可清蒸！一碗份量十足嘅蠔飯售價只係700日圓（約港幣$40），難怪連杜如風都大讚：「估唔到呢度越平越好食！」

Photo from 《解風東京》截圖

Oyster Market Kaki Ichiba Tokyo Skytree
地址：〒130-0002 東京都墨田区業平2丁目19−4
營業時間：12:00-21:00
交通方法：都營地鐵「押上站」B3出口，步行5分鐘

2）陶壺煨蕃薯店

煨蕃薯就食得多！用陶壺煨嘅你又食過未呢？呢間喺墨田區專用陶壺炭烤蕃薯嘅蕃薯店，係專門售賣茨城「譽印」蕃薯與及島根「森之絹」蕃薯，標榜即買即食！而店內雖然設有幾個陶壺，但係一個陶壺只會燒10個番薯，務求每一個番薯都可以燒到好平均，店鋪專門售賣番薯乾，真空番薯與及自家製嘅番薯蛋糕，好味到連杜如風都要同工作人員一齊分享，大讚冬天食煨蕃薯比暖蛋仲要溫暖！

壺焼き芋・御芋-OIMO-
地址：〒130-0001 東京都墨田区吾妻橋3丁目4−9
營業時間：11:00-19:00 (星期一、四休息)
交通方法：都營地鐵「本所吾妻橋」，步行約10分鐘

3）雜司谷手創市集

每個月嘅第三個週末開放嘅「雜司谷手創市集」，超多本地手作職人参與，所以每次舉辦都吸引超過100位手作達人擺檔，而且更有唔少當地人同遊客去遊覽，人流可以話係超級之多，杜如風亦於市集用咗2500日圓（約155港元）買到即場雕名嘅印章「如風」兩個字，每一位手作職人嘅創作都係獨一無二。

Photo from 《解風東京》截圖

「雜司谷手創市集」
地址：〒171-0032 東京都豊島区雑司が谷3丁目15−20
營業時間：每個月第3個周末
交通方法：都營地鐵「雑司が谷駅」步行10分鐘

4）全自助古著店

呢間古著店由疫情開始就一直全自助，店入面一個員工都無，係講求自律嘅一間商店，而且價錢由2,000至4,000日圓（約港幣$115-229）左右，亦設有500日圓（約港幣$29）專區，以古著嘅價錢嚟講真係特級平，而且因為無員工仲可以毫無壓力咁周圍試衫！而全日本暫時亦只有池袋同吉祥寺有分店，千祈唔好去錯啊！

Photo from 《解風東京》截圖

SELFURUGI
地址: 〒171-0031 東京都豊島区目白２丁目４−８
營業時間：24小時
交通：都營地鐵「雑司が谷駅」步行10分鐘

5）@cosme TOKYO 美妝旗艦店

位於原宿嘅「@cosme TOKYO 美妝旗艦店」係美妝網站「@cosme」所屬企業「Istyle」嘅第一間實體店，佔地超過萬呎，云集600多個品牌，有超過200個美妝品牌進駐，商品總數達2萬件，可以話係全日本最出名嘅美妝用品都喺晒呢到，而且仲可以於現場用專業美容儀器去評估肌膚狀況，一定係女士嘅天堂！

Photo from @cosme

@cosme TOKYO
地址: 〒150-0001 東京都渋谷区神宮前１丁目１４−２７
營業時間：星期一至日 11:00–21:00
交通：JR原宿站步行 1 分鐘

6）新宿頂級和牛燒肉店

行完平民會去嘅地方，杜如風又點會待薄自己，呢間位於新宿嘅頂級和牛燒肉店，只需要32000日圓（約港幣$1,850）即可享用「豪華和牛盛宴」14味，而食材係選用嚟自和牛牧場嘅黑毛A5級和牛，確保所有牛肉肉質都細膩醇厚，而且每枱客人更加可以享用獨立房同有專人服侍！私隱度勁高，難過出名高要求嘅杜如風都話：「好犀利，一舊肉燒到兩種生熟程度」、「直情好似雪糕咁融喺口入面」。

Photo from 《解風東京》截圖

USHIGORO S. GINZA

地址: 〒160-0022 東京都新宿区新宿3丁目17-10 HULIC & New SHINJUKU 11F
營業時間：星期一 17:00-23:30/ 星期二至五 12:00-15:00 & 17:00-23:30 /星期六至日 12:00-15:00 & 16:00-23:30
交通方式：乘搭東京地下鐵銀座線至銀座站B3出口，再步行3分鐘