試當真拍片串haters變相串埋fans？Jessica一改女神形象，扮行乞阿婆！

By Wing Ws on 24 Mar 2023

Digital Content Writer

YouTube頻道「試當真」中Jessica（陳苡臻）一向以女神形象示人，但日前推出嘅新影片中，則打扮成行乞阿婆，令觀眾非常驚喜。不過，影片中Jessica與The Low Mays突然對住鏡頭「串觀眾」就引起網民不滿。

Photo from krisssica IG

着阿婆裝一改女神形象

日前，「試當真」發佈嘅「試映劇場」以《喺香港同情人真係好L煩》為題，並聯同The Low Mays一齊拍片，片中出現因「唔想返工」、「失明足球歌手」等理由行乞嘅人，似暗指中港通關後，香港出現以各類奇招嘅行乞人士，而Jessica身穿阿婆裝，手持寫有「30萬（不議價）賣身葬父」、PAYME QRcord及以梗圖作「亡父」相嘅iPad，則似扮演月前於旺角以內地導演徐紀周照片「賣身葬父」嘅女子，一改以往女神形象，網民大讚Ca姐「扮阿婆都有一手」、「好用心去演出」，仲叫佢同扮開阿婆嘅阿慈切磋。

Photo from 試當真Trial & Error YouTube

串haters搞到串親fans？

「試當真」似乎係想以影片串haters，喺影片嘅最後話鋒一轉，對住鏡頭話：「好似呢度最慘嗰個係你哋喎，係觀眾」、「你又咁樣畀試當真呃咗幾分鐘你人生嘅時間」、「你阿爸阿媽一定對你好失望」、「成個月都冇咁多人工」，Jessica更加入指：「你哋冇嘢做㗎咩？日日喺度上網，你哋冇工作冇屋企人？冇拍拖係咪！單身嘅！」、「仲睇緊試當真，唔係啩？」、「做自己嘢啦好冇呀」、「我好忙㗎，唔似得你哋咁樣」、「仲睇緊呀？傻仔」。

Photo from 試當真Trial & Error YouTube

不過相關言論就引起網民不滿，認為試當真串緊自己：「放工諗住開開心心睇條片點知被串」、「睇完真係覺得自己好可憐」、「試當真既觀眾度量真係高，比支持左咁耐既channel話你係比佢呃時間、窮、冇工作、冇屋企人、單身、冇人生意義、指住都唔會嬲」。同時，相較其他「試映劇場」系列，影片嘅dislike數高達1k。

Photo from 試當真Trial & Error YouTube

網民認為條片失敗

另有網民認為「試當真」製作水平唔達標，影片未有清晰表達背後含意，因此感到失望：「串hater唔緊要，但劇本好拍得好睇觀眾先會受落」，仲搞到fans、觀眾互串，令「矛盾加劇」。

Photo from 試當真Trial & Error YouTube

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

林明禎上哲學YouTube頻道觀眾反應兩極！主持零準備兼搞錯歌名？仲要女神幫手打圓場？

2 Mar 2023

哲學普及平台「好青年荼毒室」日前邀請女神林明禎作為其YouTube頻道嘅嘉賓，談到電影及各地文化。不過講到一半，其中一位主持就坦言話冇睇《飯戲攻心》，仲搞錯《一秒拳王》同《救殭清道夫》主題曲，搞到網民嬲咗，直呼尷尬，不過亦有觀眾認為明禎喺度遊花園，迴避咗唔少問題，令主持未能深入主題。

Photo from 好青年荼毒室 YouTube

主持冇睇《飯戲攻心》

明禎講到近2年開始學廣東話，其中一位「荼毒室」成員「頌頌」問到學廣東話覺得困難嘅地方，明禎就提到早排上映嘅電影《飯戲攻心》，問兩位主持有冇睇，頌頌就表示自己「準備睇」，明禎驚訝掩面指：「原來都有人冇睇過《飯戲攻心》嘅。」頌頌即表示：「我好少入戲院睇戲，唔好介意，我真係會睇㗎。」明禎仲即場教做「阿喵」嘅招牌動作，頌頌對鏡頭做完「好嘢」後，明禎就講笑咁話：「原諒你。」頌頌表示：「我嚟嘅時候呢，因為我知道有機會會上節目，我特登有睇你啲訪問嚟做功課，但冇理由喺巴士上睇一套戲呀嘛。」明禎就一臉嚴肅咁話：「而家好多地方都可以睇嘅，戲院都可以睇」、「支持香港嘅電影多啲」，講完仲打完場咁話：「好，這個節目今日就到此為止啦，拜拜。」

Photo from 好青年荼毒室 YouTube

仲搞錯咗《一秒拳王》同《長相廝守》？

講到出道初時就成為《救殭清道夫》女主角，頌頌問當時試鏡係咪要演殭屍，明禎即問：「你有冇睇《救殭清道夫》？」見到頌頌沉默不語，明禎講笑咁話：「換人。」頌頌即刻表示會補返，並指：「但我有聽你首歌，你有一首歌係自己作詞作曲㗎嘛」、「我有冇講錯先，係咪你半個鐘內作㗎嘛」，搞到明禎呆咗一呆，糾正指：「（嗰個人）唔係我」、「《一秒拳王》先係恆仔同周國賢用半個鐘寫出嚟嘅。」又指另一首先係自己寫，而唔係《救殭清道夫》主題曲。於是明禎講返試鏡嘅情況，兼講笑話：「我自己還要轉回來（話題）」、「你看我還要自己圓回來」。

Photo from 好青年荼毒室 YouTube

網民戥明禎唔抵

影片播出後，唔少網民戥明禎唔抵，覺得頌頌冇做功課先嚟，唔尊重嘉賓，搞到要明禎幫手兜：「長相廝守都接唔到，真係幫唔落口」、「唔識又唔做功課嘅就唔該主動舉手話做唔嚟／唔想做啦，要人哋interviewee幫你哋兜好冇意思」、「嘥咗！換人啦」、「真係好尷尬的主持」。對此，「荼毒室」嘅鹽叔喺影片下回應，指「有啲室友睇完可能覺得頌頌準備得不足，有啲唔專業，呢個的確係我哋做得唔夠好，會努力改善」，又提到訪問「唔預要討論電影內容」，所以冇叫頌頌「要睇足戲先上嚟」、「呢個的確係我做得唔夠好、諗得唔夠周詳，所以我都同大家講聲對唔住，係我陰咗頌頌」。另外，影片中明禎多次講笑咁問頌頌「有冇聽過首歌」、「有冇睇過套戲」，但影片結束後「即刻話頭先係節目效果，叫頌頌唔好介意」。

Photo from 好青年荼毒室 YouTube

觀眾力撐鹽叔頌頌，認為明禎遊花園

事實上，「好青年荼毒室」早前拍嘅「荼毒室有客到」系列都有邀請「Mill Milk」、陳柏宇、林奕匡等嘉賓，喺聽嘉賓分享嘅同時，會深入探討有關主題，不過唔少觀眾都好意外講哲學嘅「荼毒室」竟然可以邀請到明禎，但亦有觀眾覺得當中有啲主題未有深入去講，雖然鹽叔多次嘗試深入主題，但明禎就避重就輕，迴避咗唔少問題，認為：「作為娛樂清談節目係無問題，作為哲學節目就感覺唔夠深度」、「（明禎）有一半離題、有一半文不對題」，因此戥鹽叔、頌頌唔抵。