洗唔洗得甩陣亞視味？8個過檔TVB嘅亞視出身藝人，你又buy邊個呢？

隨住亞視大勢已去，執笠前已經有唔少喺亞視出身嘅藝人紛紛過檔無線，而且知名度仲大大提升添！不過有網民就認為，有啲出身亞視嘅藝人唔多唔少都有陣「亞視味」，每次一望到佢地都覺得好有亞視嘅影子！

1. 陳展鵬

雖然唔少網民都覺得煎pan最重「亞視味」，但其實陳展鵬係首先喺無綫電視藝員訓練班出身再去亞視發展，然後先再回巢TVB㗎！

其實煎pan回巢之後捱咗幾年先至獲得力棒，講到代表作一定係《城寨英雄》嘅「拳佬」，好多人都話佢係由呢套劇開始先洗甩亞視味，你又點睇？

之前煎pan著過黑色透視魚網外套show肌，仲戴埋單邊黑波波耳環，唔少網民就覺得佢嘅時裝觸角「非常獨特」！

2.鮑起靜

要講呢期最hit嘅電視劇又點少得《同盟》，有鮑姐呢啲老戲骨加持真係唔同啲！

而《同盟》亦都係鮑姐喺TVB嘅處女作，由1979年麗的電視做到亞視都成30年，之後除咗有幫香港電視拍劇之外，仲憑電影《天水圍的日與夜》獲得香港電影金像獎最佳女主角獎添！

3.田蕊妮

阿田其實係由1993年亞視舉辦嘅《未來偶像爭霸戰》入行，不過發展一直浮浮沉沉，03年離開之後做過DJ又演過電影，之後06年先至轉投無綫！

跟住喺TVB好快就上位，由《讀心神探》、《巨輪》開始已經坐穩女主角個位，而且因為有觀眾緣嘅關係亦都攞埋「最佳女主角」同「我最喜愛電視女角色」，成功喺大台發圍！

4.袁文傑

原來游生本身都係無綫電視藝員進修班出身，不過畢業後就去咗做model無簽到無綫！

95年加入亞視，當時仲係亞視力捧當家小生之一，不過始終都係半紅不黑，星途平平。

16年重返TVB之後，憑住《不懂撒嬌的女人》霸氣型男總裁「游生」成功俘虜少女同師奶心！唔少網民都表示袁文傑冇乜亞視味，反而好入到屋添！

5.萬綺雯

講到萬綺雯，我諗所有人都會諗起《我和殭屍有個約會》！一套神作雖然令佢成為亞視一姐，但絕對唔足以令佢紅.......所以12年加盟無綫拍左套《老表，你好嘢！》，雖然一路都有拍下劇，不過比起其他女藝員，都唔算被力捧......

6.陳煒

由亞洲小姐出身嘅煒哥，亦都曾經係亞視力捧對象，雖然大家都識佢不過曝光率始終唔高。不過憑住有女人味得嚟又型型地嘅性感形象，係大台都算入到屋，亞視味亦都唔算大濃！

7.江美儀

江美儀係繼田蕊妮同李綺雯之後第三個由亞視轉投無綫嘅女藝人，過檔之後憑住出色演技好快深受觀眾愛戴，證明演技好係真係可以戰勝亞視味架！

8.林韋辰

之前有人話過總之開電視見到林韋辰就知道嗰個台係亞視！但其實佢又係無綫藝訓班親生仔，之後先去亞視發展！近排係《踩過界》亦有演出，你又覺得佢重唔重亞視味呢？

不過有「亞視味」又唔代表唔係一個好演員嘅，只要真係有演技觀眾都一樣受落！你又覺得以下８個藝人邊個最重亞視味呢？（笑）

Text: Girls Editorial
Photo Source: Facebook、Weibo

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）