盤點2017年TVB最低收視劇集！附小編分析～第一位一定係呢套！

2017年嘅萬千星輝頒獎典禮係2018年嘅1月21日就會舉行～
正當人人都關注緊大熱嘅劇集嘅他時候～小編就同大家一齊回味舊年收視慘烈嘅作品！
真係替演員不值呀～咁辛苦拍完竟然無人睇！
今次就數收視低嘅頭五位啦！

第五位：踩過界 （平均收視：21點）

由Signal Wong黃浩信飾演盲人大狀嘅《踩過界》，同朱千雪未能承接《EU超時任務》個勢，首週收視只得20點。
其實小編覺得踩過界劇情都唔差，頭幾集都有製造唔少懸疑劇情，照計都有追看性，但敗筆就係係星期六、日「炮灰檔期」播出！
以往星期六日嘅收視不嬲都低，大家都出曬去玩，依家重要用黎播劇集～播乜都死呀真係！
如果放係平日播，話題性肯定十足，拎埋視帝應該都得呀！

第四位：我瞞結婚了（平均收視：20點）

由洪永城同黃翠如主演嘅我瞞結婚了收視低迷並不意外，劇情非常老套，都係瞞黎瞞去又三角戀，真係悶呀。
雖然洪永城同黃翠如呢對CP非常有看點～但結局真係略有趕收工之嫌，唔少網民都表示想打爆電視，
求其用黃翠如一人分飾兩角就大團圓結局，同BBQ有得揮～
而且小編雖然係洪永城Fans，但佢拍親嘅電視劇都未能入屋，有「收視毒藥」之稱，希望黎緊佢可以拍返啲好作品啦！

第三位：巾幗梟雄之諜血長天（平均收視：20點）

唔翻查資料都真係唔記得舊年有套咁嘅野呀～
呢套13年已經拍完嘅倉底貨拖到舊年先播，話題性已經低都無得再低～
收視最低果一集只得14.9，刷新大台收視最低紀錄！
而且女主角由鄧萃雯變成胡杏兒，頭幾集劇情不停強姦，重口味到爆，
劇情同前兩輯都無得揮，收視低都可以理解嘅。

第二位：雜警奇兵（平均收視：19點）

《雜警奇兵》又係一套炮灰劇，劇情上其實都幾有新意，加上有C君坐陣，理應唔差～
但本來假日劇放係星期六、日「炮灰檔期」收視已經夠慘烈，
但雜警奇兵更加創先例，一口氣係星期日播兩個鐘，結果當然死得更慘。

第一位：蘭花劫（平均收視：18點）

原來再舊嘅倉底貨都會有重光嘅一日，呢套拍完隔左十年之後先播嘅超級倉底貨《蘭花劫》非常順理成章地收視插水～
呢套野如果十年前播都可能會係大熱之作，但依家高清年代大台竟然選擇黃金時期重播低清劇，仲要係緊接超高清4K劇《不懂撒嬌的女人》播出！
一下子由4K跌到低清，真係對觀眾眼球嘅考驗！更有網民表示「只有字幕係高清」，
真係不禁想問大台一句：做咩姐你？

Text: Holiday editorial
（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載